كرونيك: مهمتي_دمرت_حياتي

26

✍مهمتي دمرت حياتي ✍

الجزء 26:
في الصباح خليل خرج بكري قبل ما يفيقو كلهم. تسنيم فاقت عملت روتينها الصباحي وقفت فالدريسينڨ تختار وش تلبس حتى سمعت دقديق فالباب. مشات فتحت لقاتها سيدرة: صباحو برانسيس
تسنيم: صباح الفل باربي، باين نهاري رح يفوت تووب لاني صبحت على هالوجه الزين
سيدرة: هههه عينيك الزينين حبيبتي.
بعدما قعدو في الفوطوي لي مقابل التلفزة تكلمت سيدرة: شوفي منيش من النوع لي نبدا نلف وندور رح نجيك من الاخر، نسقسيك سؤال جاوبيني عليه
تسنيم: ههه خوفتيني بهالجدية تاعك، سقسي
سيدرة: احم، في هاذ اليومين شكون لي تلاقيتي معاه فالمطعم وتغديتو مع بعض.
تسنيم تفاجئت ماتوقعتش رح تسقسيها السؤال هذا، بدات تساؤلات في راسها يعني تكون شافتني؟؟
تسنيم: وش هاذ السؤال؟
سيدرة: بليز جاوبيني بعدها نوعدك نجاوبك على كل اسئلتك.
تسنيم: احم هو واحد قالك يا سيدي معجب وباغي نرتابطو وانا صديتو و وضحتلو الامور بلي مايمكنش يصير هاذ الشي وخلاص كل واحد مشا في طريقو.
سيدرة : بصح الشي لي شفتو يقول انو مش مجرد واحد متعرفيهش و حطيتيلو نقط على الحروف كيما راكي تحكي.
تسنيم: وش شفتي وضحيلي بش نقدر نشرحلك؟
سيدرة عدلت جلستها ونطقت: شوفي تسنيم نعزك لدرجة كبيرة وحاطاتك في مقام اختي الكبيرة وفي نفس الوقت صاحبتي على هاذي رح نقلك كل شي بش تعرفي تتصرفي، شفت صور ليكم في زوج كاين لي قاعدين تحكيو وتاكلو وكاين وحدة قراب بزاف لبعض وكأنكم متعانقين يمكن كنتو خارج المطعم.
تسنيم: صور؟؟ شوفي هو جا وقالي الشي لي قلتهولك وكي رفضت نسمعو جبدني ليه وهددني انو رح يهزني على كتافو ويعملي فضيحة قدام الناس، على هذا قبلت نتغدا معاه وبعد الغداء وضحتلو الامور ومشيت.
سيدرة: اه اوك يعني ما بيناتكم حتى حاجة؟ مش معريفة قديمة!
تسنيم: يا بنتي انا نقلك معجب وحطيتلو النقط على الحروف ونتي تقوليلي معريفة قديمة! الله يهديك. وذرك قوليلي وين شفتي الصور؟؟
سيدرة: عند خليل
وقفت تسنيم مفزوعة : عند خليل!!!
رجعت قعدتها سيدرة: ما تخافيش، لبارح جا حالتو حالة معصب بزاف، كي حكيت معاه نعتلي الصور قتلو اكيد سوء تفاهم ولي بعثهم نيتو خايبة، على هذي جيت نتأكد منك لاني نعرف مش رح تخبي عليا، وذرك الاهم انك تنوضي تبدلي حوايجك ونروحو عند خليل للاجونص وتشرحيلو وش كنتي تقوليلي خاطرو خرج صباح بكري معصب وبلا ما يفطر.
#يتبع😊