كرونيك: مهمتي_دمرت_حياتي

16

✍مهمتي دمرت حياتي ✍

الجزء 16:
لما طلعت تسنيم لغرفتها بقات تمشي وتجي وهي متوترة خافت لا يشك فيها وتتفضح على انها جاسوسة ساعتها تخسر مهمتها وتخسرو هو، قاطع حبل افكارها صوت هاتفها هزاتو لقاتو باباها، خذات نفس كبير و ردت: الووو
باباها : ميرنا بنتي وش حوالك؟؟
تسنيم: لباس الحمد لله
باباها :الحمدلله. مهم جدك راهو يسقسي كاش اخبار جديدة؟؟؟
تسنيم: مزال مابان والو، راني دايرة جهدي
باباها: ممم لازمك تزربي خاطر ماكانش وقت بزاف، تهلاي في روحك
تسنيم : اوك سلام.
تكات تسنيم في فرشها وتخمم كفاش رح توصل لشي حاجة تخليها تزرب تكمل هاذ المهمة وتتهنى، حتى غفات.
مرو ايام قليلة، خليل سافر لبضع ايام لانو عندو خدمة ضرورية بحكم انو عندو اجونص للسياحة والسفر فأكيد سفراتو رح يكونو بزاف .
اما تسنيم فكانت وين يتحرك فؤاد تكون وراه عل وعسى تلاحظ شي حاجة، لكنو مش مخلف من وراه ولا شي يثير شكوكها حتى من مكتبو سمحتلها الفرصة تدخلو مرتين وتفتشو لكن مالقات شي من غير سلاح مرخص باسم فؤاد، وبعض الاوراق لي كانو باللغة الروسية فور مالقاتهم بعثتهم لصديق قديم عايش في روسيا بش يترجمهملها.
قاعدة فالجامعة متوترة تستنى في اتصال من صديقها الروسي بعد مدة من الانتظار دخلت للفيستيار ،حطت صاكهاا وبدات تعدل في مكياجها، سمعت موبيلها يصوني هزت بزربة لكن خاب ظنها كي لقاتها غير زهرة تنهدت وردت عليها : الو
زهرة: تسنيم بنتي مزلتي فالجامعة؟؟
تسنيم : هيه جدة مزلت عندنا تعويض تع واحد الموديل (وعضت على شفتها لانها اعدى حاجة عندها الكذب خصوصا على زهرة لانها تعاملها مليح و تحبها ودايما تعيطلها تسقسي عليها وهي توهم فيها انها صح راهي تقرا)
زهرة : اوك بنتي ..مالا حبيبة ماتبقايش بالجوع كولي حاجة بش تقدري تركزي واتهلاي في روحك وماطوليش بنتي اوك!!
تسنيم (عينيها دمعت من طيبة زهرة وبالمقابل هي جاسوسة على عايلتها) : ماتخافيش جدة كليت ريحي بالك.
زهرة : مليح بنيتي ربي معاك ويبعد عليك ولاد الحرام.
قطعت تسنيم وهي تحس في روحها مخنوقة كل ما تكذب على زهرة تستحقر نفسها، قاطعها موبيلها يصوني، و هاذ المرة كان صديقها الروسي هزت عليه بسرعة : الو باسم طمني قدرت ترجمهم؟؟
باسم: اهلين والله الحمدلله ونتي بخير؟
تسنيم: اوووف باسم مش وقتو بليز ازرب قلي.
باسم: امممم مادامك متلهفة لهاذ الدرجة معناها لازمني نطلب وش نحب مقابل هاذ الترجمة، صح!!!
تسنيم (بصوت عالي)؛: بااااسم
باسم: هههههه خلاص خلاص غير ضاحك معاك، احم يا لالة هاذ الاوراق عبارة على كونترا
تسنيم: كونترا؛!!! تع واش!!!! وبين شكون؟؟؟
باسم: بالشوي برك، هاذ الكونترا تع شراء اسلحة حديثة في السوق، روسيةالصنع.
تسنيم: اسلحة!!!! وشكون شراهم؟ اكيد الكلب فؤاد، بصح وش يدير بيهم؟؟
باسم: يابنتي وش بيك مزروبة! بالشوي عليك رح نكمل.
تسنيم: ازرب ونتا خرجتلي قلبي، قاعد تنقط عليا بالكلمة
باسم: اوك يا لالة تسنيم. نكمل وبزايدي ما تقاطعيني، هاذ الكونترا مش اوريجينال يعني نسخة فقط وهي ب اسم كلوديا مارتيز.
تسنيم: زعما شكون تكون هاذي؟ و وش علاقتها بفؤاد؟ اكيد شريكتو، و كفاه حكاية مش اوريجينال يعني ممكن تكون الاوريجينال بقات عند البائع والنسخة عند المشتري صح؟
باسم: لا مانظنش، لانو عموما البائع والمشتري تكون عندهم نسختين اوريجينال يعني هذا فؤاد يا اما مش هو المشتري وما عندو حتى علاقة او يكون شريك هاذي كلوديا.
تسنيم: لا منظنش ما تكون عندو حتى علاقة لانو لو هكاك منلقاوش عقد خطير كيما هذا في مكتبو.
المهم باسم خويا شكرا بزاف نردهالك في ساعة الخير نشالله.
قطعت معاه وهي في حيرة من امرها مافهمت والو، هزت موبيلها ورسلت رسالة لباباها خبراتو بالمستجدات، رفدت صاكها وخرجت.
اليوم صباح فاقت تسنيم بكري مع الفجر دخلت غسلت حالتها وخرجت صلات بعدها توجهت للدريسينغ لبست ملابس رياضية وخرجت من الغرفة هابطة تحت بش تمارس الرياضة كعادتها كل صباح، وصلت للدروج هبطت اول درجة وتوقفت وهي تسمع في فؤاد يحكي في التلفون : حضرو رواحكم مطولوش راني جاي، وخبر الجماعة يتاكدو من كل شي ومايغفلوش مش من مصلاحتنا يصيرلنا مقلب المرة لي فاتت، هاذ المرة لازم نلحقو قبل ما تتسلم السلعة ولازمنا نستردوها وندمو الكلب هذاك لي وثقت فيه وعاونتو بعدها سرقلي السلعة وهرب بيها.
تلفت وجا خارج بعدها رجع يجري دخل للبيرو رجعت هي خطوات وراء بش ما يشوفهاش ،بعد ثواني شافاتو خارج ويخبي في سلاحو وراء ظهرو.
بقات واقفة تستوعب بعدها هبطت تجري خرجت برا الفيلا تشوف في سيارتو خارجة من السور، راحت تجري خرجت برا الفيلا وقفت طاكسي وطلبت منو يتبع سيارة فؤاد. طول الطريق وهي على اعصابها خاايفة من الشي لي رح تشوفو وخايفة تخفق في هاذ المهمة وتكون سبب في تعرض عائلة امها للخطر او انها تكون مش قد المسؤولية ويكشفوها ساعتها وش رح دير ،رغم انها متدربة مليح لكن الانسان دايما عندو تخوف ولو بسيط انو يخفق في مهمتو .

#يتبع😊