كرونيك: مهمتي_دمرت_حياتي

14

✍مهمتي دمرت حياتي ✍

الجزء 14:
عند ابطالنا 😍
دخل خليل للكوزينة وتبعاتو تسنيم لي كانت مستغربة، بقات واقفة تستنى فيه وهو يلبس في مريول الكوزينة تلفت عندها لقاها تخزر فيه داهشة ضحك وضربها بخفة لنيفها بصبعو : رح نفذ الشرط مادامني خسرت في المنافسة، بصح نتي رح تكوني المساعدة تاعي 😆
ضحكت تسنيم :هههههههه حاضر شاف💪

بدات توجدلو فالخضر وكل شي يحتاجو حطاتو قدامو، وهو يقص فالبصل ودموعو هابطين وهي تضحك عليه.
حط البصل المرحي والثوم مع قطع الدجاج فالزبدة والزيت على نار هادية بش يتقلى، بعدها بدا يحضر فاللحم المرحي ويسلق البيض، تحت نظرات تسنيم :هيا قلي مفهمتش وش رح طيبلنا اليوم؟؟
خليل: يا لالة رح ندير اكلة في حياتك مارح تنساي طعمها، هي اصلا فيها كل شي بنين وزيد كيعاد من تحت يديا رح تكون بنتها مضااعفة.
تسنيم: اوووه شكار روحو، اوكي يا سيدي قابلة مننساش طعمتها بصح حتى اسمها بغيت نعرفو بش ما ننساهش هو تاني ههههه.
خليل:ههه اسمها طاجين الرخام.
تسنيم: ههههه الرخام ڨاااع 😂 البوطاجي لا!!
دار عندها وضربها برشة فرينة، بعدما كانت ميتة بالضحك عقدت حواجبها وهي كللللها بيضاء بالفرينة، اصبح هو لي يضحك عليها. مارضاتهاش تلفتت هزت باكية الفرينة ولاحتها كلها فوق راسو.
تسنيم: مش غير انا لي لازم نطلع نغير حوايجي وندوش 😛
خليل: يا مهبولة وش درتي شوفي كفاه رجعتي الكوزينة، هيا ابداي نظفيها صاحيتي احسن ما يدخل شي حد ويبداو بالهدرة لي معندها معنى.
تسنيم: نوو مش رح نظفها وحدي نتا لي بديت donc نتعاونو (وحطت يديها على خصرها)
خليل(وهو يمسح في روحو ويغسل) : يا بنتي راه راح الحال ذرك يتحرق الطاجين ونرجع نخسر مرة اخرى.
تسنيم اووووف اوك على جال العشاء برك رح نظفها هاذ المرة والا والله مانقيسها وحدي.
تلفتت تنظف فالفرينة وهو كمل طيابو ومرة على مرة يشوف معاها تمتم وحدها وهو يضحك عليها.

المهم بعدما كمل تحضير الطاجين طبعا تحت تعليقات تسنيم وبسالتو هو، نطق خليل: شوفي هاهو الطاجين حاضر يعني لي عليا درتو بقا دورك نتي تقديمو في الطبق وتزيينو لانو هاذ الامور خاطيتني.
تسنيم : مالا تعترف بلي انا لي حضرتو ونتا ما تصلح لوالو، لانو الاهم هو تقديمو خاطر العين تاكل قبل من الفم، يعني وببساطة انا المشرفة عليه نتا غير المساعد ديالي😌
خليل:ههههه يااااك الالة!! عندي ساعة وانا واقف نحضر هاذي ونزيد هاذي و متحمل تعليقاتك السخيفة وتجي نتي في اخر الحلقة تحطيه في طبق التقديم وتقوليلي انا لي حضرتو ونتا غير مساعدي (رقق صوتو ويقلد في صوتها)
و تسنيم تحط فطاجين الرخام في طبق التقديم وتضحك.
بعدما كملو حضرو طاولة الاكل تلمت كل العائلة وهوما يتبننو فالاكل ويمدحو في تسنيم، لانو طبعا خليل قالهم انو هي لي حضرت العشاء مش هو.
كان قاعد مقابلها ويخزر معاها كفاه تاكل وتتبنن وكي تهز راسها فيه وتلقاه يخزرلها تلعبها تشرب فالماء وانو مش عاجبتها الماكلة وراهي تجوز فيها غير بالماء فوق خاطرها 😅
كملو العشاء وتلمو يسهرو شوي من غير خليل لي خرج برا وفؤاد لي دخل للبيرو تاعو، وتسنيم طوول السهرة وهي عينيها على باب البيرو وتخمم في فؤاد وتخطط كفاه رح تدخل للبيرو تاعو بدون ما يفيق بيها حد.
كملت السهرية وكل واحد دخل لغرفتو. دخلت تسنيم لغرفتها وبقات رايحة جاية تحاول تلقى كفاه تدخل للبيرو وتستنى فيهم يرقدو، راحت غيرت ملابسها ولبست بيجامة وصل منتصف الليل خرجت من غرفتها تتسحب على رؤوس اصابعها حفيانة وهازة تلفونها مدايرة بيه الضوء (🔦torche)، نزلت فالدروج بعدما تأكدت انو كامل رقدو، واتجهت للبيرو فتحاتو شوي دخلت راسها طلت مالقات حد وهي تدخل ورجعت الباب فقط ما سداتوش بش تسمع اذا جاء كاش واحد، وقفت في بلاصتها تشوف اذا كاين اي حاجة تثير الانتباه، دارت وراء المكتب لقات قجر حاولت تفتحو لقاتو مغلوق بالمفتاح بقات تحاول معاه حتى سمعت حد وقف عليها، حست الدم جمد في عروقها.

🐹شكون يا ترى؟؟؟
توقعاتكم وتشجيعكم 🐹

#بونوي😊