كرونيك: مهمتي_دمرت_حياتي

20

✍مهمتي دمرت حياتي ✍

الجزء 20:
وصلت زهرة عند تسنيم تعنق فيها وتبوس وتحمد في ربي على رجوعها حتى تكلمت صونيا: ماما بزايد خنقتي البنت خليها تريح وتتنفس وتحكيلنا، شوفي حالتها.
بعدت زهرة خطوتين وبقات تشوف مع حالة تسنيم؛ شعرها طالع للسماء ثيابها معمرة غبار و وحل، يديها مجرحين جروح خفيفة وجها اصفر و تعبان، باختصار حالتها تشفي العدو.
زهرة (حكمتها من يدها ومشات بيها لوسط الصالون) : ارواحي تقعدي يا بنتي، الله يا ربي وش لي وصلك لهاذ الحالة يا بنتي؟
صونيا: ماما بالشوي خلي سع نجيبولها كاس ماء تبل ريقها من بعد تحكيلنا. فااطمة يا فااطمة
فاطمة: تفضلي مدام
صونيا: جيبي كاس ماء فيه سكر لتسنيم.
راحت فاطمة جابت الماء ،شرباتو زهرة لتسنيم، من بعد نطقت.
تسنيم: جدة سمحيلي خلعتك عليا، راني مليحة ذرك متخافوش. صباح خرجت كيما العادة ندير سبور وكنت مدايرة كيتمان في وذنيا محسيتش برجليا وين ماخذيني، كنت سارحة نخمم حتى لقيت روحي طايحة في حفرة صغيرة كانت مغطية بالاعشاب مشفتهاش وغيبت، كي فقت لقيت روحي مزلت ثما خرجت ورجعت هنا.
زهرة: الله يا بنتي، علاه ما تركزيش كون صارتلك شي حاجة وش نديرو و وين نلقاوك و وش نقول لسي ابراهيم، مقدرتش نحافظ على حفيدتك لي حطيتها عندي امانة!! اووو والله قلبي يا بنتي كان رح يوقف من الخوف عليك.
تسنيم هزت يد زهرة وباستها : سامحيني جدة والله ماتتعاود بإذن الله، و ديجا راني قدامكم ما بيا والو غير جروح خفيفة.
صونيا : الحمدلله على سلامتك بنتي، المرة الجاية متبعديش وديري سبور غير فالجردة تع الفيلا متخرجيش، بش حتى لا وقعت حاجة بعيد الشر نكونو عارفين بلاصتك. المهم ذرك جات سلامات، نروح نعيط لخليل نقلو بلي جيتي احسن ما يبقى مشطون ويحوس عليك.
تسنيم: خليل!! علاه جاااا؟
صونيا: هيه جا الصباح وكي حكينالو خرج ديراكت يحوس عليك، نروح نطمنو ونخبرو يرجع.
راحت صونيا تعيط لخليل وتسنيم استاذنت من زهرة بش تطلع تدوش تبدل عليها وتداوي الجروح لي في يديها ورجلها.

#بونوي😘جام لكل جزء قريتوه