كرونيك: مهمتي_دمرت_حياتي

34

✍مهمتي دمرت حياتي ✍

الجزء 34:
لما وصلو للمدينة، توجهو لمكتب التحقيق، احمد مقدرش يبقى واقف على رجليه قعد على الكرسي، بعدها جاء سي ابراهيم وطلب منهم يدخلو فارس بش يبداو معاه.
دخل فارس وعلى وجهو نظرة مستفزة وابتسامة ساخرة بالجنب. قعدوه بعدما فكولو ليمينوت وخرجو بقا مقابل سي ابراهيم وأحمد. شاف معاه أحمد وقال بصوت ضعيف منهك : علاه؟
نطق فارس: وش هو لي علاه؟؟
خبط سي ابراهيم الطاولة وقرب وجهو لعند فارس: مش رح نضيعو معاك وقتنا، رح تبدا تحكي كلشي من الاول.
تبسم فارس: صح ماوصلتش لمبتغايا بصح معليش المهم حققت جزء منو.
يا سيدي لا نتا ولاهو عندكم الحق تسقسيو علاه، تعرفو علاه؟؟
ههه خاطر الشي لي وصلنالو ولي راني عليه حاليا بسبتكم. (تلفت لأحمد) تتذكر نهار نحاول فيك تخليني نحقق حلمي نترجى فيك تخليني نشارك في المسابقة لي كانت بالنسبة ليا فرصة عمري، تعرف لو خليتني وقتها نشارك فيها كنت انا لي رح نربح! تعرف بلي لي ربح مستواه مايسوا شي قدامي تعرف قداه سهرت ليالي وانا نتدرب على العزف! تعرف بلي لو ربحت انا كنت حاليا رح نكون بمستوى Dj Tiesto في عهدو!!تعرف بلي دمرتني ودمرتلي مستقبلي، même pas سمعتني وقتها قلتلي: كلمتين نقولهملك خليك من لعب الذراري لي راك دير فيه وغدوة تلتاحق بالجماعة لي رح نبداولهم التدريب.
ههه تصدق بلي بعدما دخلت نتدرب قلت ماعليش مش مشكل خلي ندير وش باغي بابا وفي نفس الوقت مانخليش حلمي، بصح تعرف وش هو لي غيرلي وجهة نظري،و أصبح بين عينيا غير كفاش ننتقم منك!!! اكيد متعرفش، انا نقلك.. نهار عرفتك على حقيقتك وحش ماترحمش، مارحمتش حتى ام ولادك لي كانت مرتك، لما طلقتو كنا انا و ميرنا صغار منعرفوش السبب وماحاولتش نعرفو قلت عادي ماتفاهموش طلقو.
بصح بعد دخولي للجيش معاكم عرفت الحقيقة عرفت حقيقتك الكحلة، عرفت بلي كنت معذبها ومشربها المرار كرهتلها معشيتها مررتلها حياتها، من عنف ضرب كلام قاسي تخسار الهدرة عدم مراعاة مشاعرها كأنثى وفوق هك كأم ولادك ياحسرة، نظام كالعسكر داخل البيت ولما هاذ المسكينة طلبت منك الطلاق حرمتها من الخروج من الدار وعنفتها وكي هربت ورفعت عليك قضية خلع، مارضيتهاش لروحك خرجت فيها الكلام وطعنت شرفها كي ربحت هي القضية بعدها تزوجت ما خليت ما عملت في راجلها بش ما يبقاش في منصبو، بقيت وراه حتى دمرتو وكي خسر منصبو منعت كل الشركات من توضيفو عيشتهم في كابوس ،بالسيف ما فتح مشروع صغير يدخل منو قوت دارو، امي كنت كل مرة تحطملها خدمتها شحال من ديفيلي كانت تصاميمها لي رح تربح بصح بسبب الرشوات لي كنت تمدهم كانت تخسر ولحد الآن رغم امكانيتها كبيرة ومصممة رائعة بصح بسببك راهي خدمتها منحصرة فال atelier وفي ديفيلي صغار. كل هاذ الشي خلاني نحقد عليك ونخمم نردلك ولو جزء صغير من الشي لي درتو فينا كامل، خليتني نحط يدي في يد فؤاد وطلبت منو يساعدني على تدميركم وهو ماكانش من العاكسين. ليلة قبل من وقوع الطائرة لي فيها العساكر كنت هربت وكي صارت الحادثة استغليتها وخليتكم تصدقو اني كنت فيها واني مت، زورت هوية جديدة وشخصية جديدة نتوما لي صنعتوها.
وللأسف خدايمك يا بابا غير مازادو، حتى ختي ميرنا ما سلمتش وكيما دمرتني انا دمرتها هي، وقت لي كان عندها اهم ديفيلي بالنسبة ليها ولأمي، كانو رح يحضرو ليه اهم المصممين يعني فرصة ميرنا وامي بش يتألقو وتبان موهبتهم، نتا وش درت؟ هههه رجعت دمرتهم كيما دمرتني، وش رح نقلك من غير وكيلك ربي صدقني مش ندمان على الشي لي درتو رغم راحو فيها ناس ابرياء بصح صدقني ذنبهم في رقبتك. انا لي كنت وراء عمليات التفجير ل ديبوات السلاح وانا لي فجرت قداه من معسكر وانا لي تسببتلكم في خسائر مادية وبشرية، كل من غلي ليكم.
بالنسبة لفؤاد هو في الاول ساعدني بش ننتاقم، نزور هويتي، نوهمكم بلي توفيت فالحادثة، بصح فالاخير انا لي وراء كل شي خاطر هو كلب ما يتوثقش فيه سرقتلو الأسلحة لي ستوردها مرتين. وحتى انو وصل هددني بميرنا لي نتا ماخفتش عليها وبعثتها لوكر الأفعى لصالحك وهي ماهمكش فيها.
كل هاذ الشي ومزلت تسقسي فيا علاه؟؟
أحمد غير ساكت ويشوف معاه وسي ابراهيم نطق: الظاهر عاجبك لي درتو حتى لو كل هاذ الشي دارو فيكم بااك، يبقى واحد منكم وما يعطيكش الحق دير الشي لي درتو، على كل نتا حاليا مجرم ولازمك تاخذ عقابك رح تفوت للمحكمة وهي تقرر.
فتح سي ابراهيم وأحمد بش يخرجو حتى وقفهم فارس : رح نطلب منكم اخر طلب، بغيت نشوف ميرنا ونعتاذر منها لانو هي الوحيدة لي متضررة من كل الجهات.
خرجو من الغرفة وطلبوا من الحراس ياخذوه للزنزانة حتى يوم المحاكمة.
#يتبع😊