كرونيك: مهمتي_دمرت_حياتي

21

✍مهمتي دمرت حياتي ✍

الجزء 21:
دخل خليل يجري لونو مخطوف وينهج : وين هي ؟ راهي لباس؟ كشما صارلها؟
زهرة : لا تكالما اولدي ماصرالها والو لباس غير جروح خفيفة برك.
خليل: وش صار احكيلي بالتفصيل، الوالدة قاتلي غير راهي جات ولاباس، قوليلي وين كانت وعلاش نهار كامل مختفية وحد ما علابالو وين كانت؟
زهرة: يا ولدي قاتلنا، خرجت دير سبور وسهات تخمم بقات تجري مافاقتش غير وهي طايحة في حفرة وغيبت، كي فاقت خرجت من الحفرة ورجعت. يعني ما صارلها والو وما كاين حتى حاجة تستدعي الخوف المهم جات لاباس.
خليل: جات لباس! انا نوريلها جات لباس والخلعة لي خرجتها منا.
طلع خليل يجري فالدروج الخطوة فيها ثلاث درجات.
صونيا (وقفت) : اووه امي اجري لا يتهور ويدير للطفلة حاجة تعرفيه كي يتقلق يولي مايشوفش قدامو.
طلعو وراه يجريو.
تسنيم كانت خارجة بالكاب دوبان من الدوش، هازة فوطة وتنشف في شعرها، حتى دخل عليها تسونامي هايج، عروقو بارزين حواجبو معقودين جبهتو مكمشة وعينيه حمر كي الدم. تمشى بخطوات سريعة وقف قدامها وحكمها مزير عليها من ذراعها ويخض فيها.
خليل: كفاش تخرجي وحدك بلا ما تعلمي حد؟ لا ومبكرة وزيد عليها مدينة معندكش بزاف منين جيتي ليها؟ ماخفتيش على روحك؟ خارجة في وقت غير الكلوشارات لي تلقايهم برا مروحين بعد سهرية طويلة جايبين الكاو، ماخممتيش بلي ممكن يتعرضلك كاش واحد منهم ساعتها يشوفك كي الكادو المغلف على صباح ربي يفطر عليك؟ ماقلتيش كاين لي رح يتشطن عليا؟ تخيلي كانت الحفرة لي تحطي فيها غامقة ولا كان روڨار خلاص، وقتها يصيرلك كيما صار لعياشي (الله يرحمو) حد ما يجبدك واصلا حد ما يسمع بيك، واصلا هذاك الخشخاش علاه مدايراتو كيعاد ما ترديش كي نعيطولك؟؟
تسنيم ترعبت من شكلو، اول مرة تشوفو بهاذ الحالة متعودة ديما تشوفو هادي ويخمم مرتين بش يتصرف، بصح هاذ المرة عرفت بلي زبلتها. تشجعت ونطقت بصوت يرجف: ا.. انا ماقصدتش نحيركم عليا، وما حطيتش في بالي رح يصير لي صار، قلت ندير سبور كيما عادتي ونرجع قبل ما يفيقو كيما متعودة، ماقريتش بحساب هاذ الشي، س.. سمحوني.
هبطت راسها وطاحت دمعة من عينيها المغرغرين، خلات خليل يهدى ويندم لانو حكا معاها بهاذ الطريقة ورفع صوتو عليها. نزل يدو لي كابسة على ذراعها، مسح على شعرو استغفر ورجع شاف معاها هزلها راسها وتكلم: انا حكيت معاك بهاذ الطريقة من خوفي عليك، متصدقيش الشي لي حسيتو وقت قالولي بلي من لبارح ما عليك حتى خبر، طول النهار وانا ندور من بلاصة لبلاصة على امل نلقاك، ماخليتش بلاصة تخطر على بالي ومامشيتلهاش، كل ما نتخيل انو حاجة سيئة ممكن تصيرلك نحب نهبل.
بقا مدة يشوف مع عيونها المليانين دموع، هبطت دمعة على خدها كانت محصورة رفع يدو مسحها بصبعو وقرب بشفايفو باس بلاصتها بعدها عنقها وقال: البسي حوايجك ونشفي شعرك ذرك شوي ونرجع.
صونيا وزهرة بعدما شافوه تهدن ورجع يحكي بهدوء وصوتو رجع طبيعي خرجو خلاوهم وحدهم يعني ما حظروش للبوسة ههه.
خرج خليل من الغرفة ونزل للكوزينة يحوس على علبة الاسعافات الاولية، اما تسنيم بقات واقفة مدة تستوعب الموقف وضميرها يأنب فيها على الكذب لي كذباتو عليهم وبين عينيها عيونهم لي مليانة خوف عليها.
بعدما لبست ثيابها وشيحت شعرها سمعت دقديق فالباب، كان خليل داخل وهاز العلبة، ماتوقعتهاش منو ابدا.
خليل: وش لي يوجع فيك؟ كشما كاين جروح هاتي نداويهملك.
تسنيم: ااا.. لا خلي عليك هات نداوي وحدي بلا منتعبك.
خليل: ههههه ماتخافيش راني نعرف نداوي، راني ديجا مداير فورماسيو على الاسعافات الاولية قبل ما نفتح لاجونص توغيستيك.
تبسمت تسنيم وقاتلو: جروح في ذرعيا مجرد خبشات مش تع نداويهم، بصح رجلي لي زلقت حاستها دارت ومش قادرة نحطها معدولة ونمشي عليها، فالدوش لحت عليها ماء سخون خفت شوي بصح نظن لازمها مرهم.
كانت قاعدة فوق البوف تع الكوافوز نزل على ركبتو، هزلها رجلها وبدا يمسدلها فيها وهي طول الوقت تشوف مع كل تفاصيلو. كي كمل لف عليها باندة وجبد مرهم اخر تع ليسيكاتخيس حطهولها على الخبشات لي في ذراعها، بعدها توجه لبيتو يرتاح وهي تسطحت فالفرش تخمم في احداث اليوم.

#يتبع😊