كرونيك: مهمتي_دمرت_حياتي

06

✍مهمتي دمرت حياتي✍

الجزء 6:
بعد ساعات كانت فالشومبرة لي عطاوهالها فالفيلا ترتب في حوايجها فالدريسينڨ، سمعت دقديق على الباب فتحت لقاتها الخدامة: مدموزال تسنيم اذا راكي قاعدة قاتلك مدام زهرة اهبطي تتعرفي على العايلة.
تسنيم بتاسمت: اوك راني جاية.
خرجت الخدامة خذات تسنيم نفس وخرجت هابطة للصالة كل ماتقرب تسمع اصوات كثيرة مختلفة الاعمار، نزلت من الدروج والعيون الكل ولات عليها طفلة فاتنة الجمال بريئة الملامح جسمها جسم حورية بحر وضحكتها تأسر الانسان، وصلت لنص الصالة وقفت زهرة بدات تعرفها عليهم واحد واحد ؛ بدات ب بنتها صونيا ارملة ؛ مراة طيبة باينة من ابتسامتها الدافية وترحيبها بتسنيم ، ثم ولدها الحفيد البكر لي هو خليل 34سنة، وقفت صافحاتو وسهات في عيونو لي كيف البحر ابتسامتو السحرية وهو سرح في براءة جمالها مافيقهم من سرحتهم غير صوت زهرة لي فاتت لكارمن 26 سنة بنت فؤاد ،مجرد ما قدمت تسلم عليها لاحظت نضراتها لي كيف القرطاس وباينة ماحملتهاش (تسنيم عندها حاسة سادسة تخليها تميز آراء الناس وفاش يفكرو)، بعدها تقدمت سيدرة اخت خليل الصغيرة عمرها 17 عام طفلة ضحوكية مرحة، تسنيم مدت يدها تسلم عليها وهي تتلاح عنقتها بادلتها تسنيم العناق فرحانة من تصرفها حست انها مرحب فيها على عكس تصرف كارمن معاها.
تعرفت على العايلة كامل لي اغلبهم فرحو بيها وهي اصلا تنحب خاطر عاقلة وحلوة وبشوشة. ناضو تعشاو مع بعضهم ومن بعد بقاو سهرو كيف كيف، و فؤاد مابانش هي سهرة كاملة تحاول تحقق فيهم وتشوف اذا كاينة حاجة تدعو للشك وعلاش تكلفت بمهمة التجسس عليهم هوما بالذات فالاخير استسلمت وقالت خليها للايام.
طول السهرة كارمن تخزر لتسنيم خزرة ناقصة مش طايقتها، شوي ونطقت موجهة كلامها : على حسب ماقالتلنا جدة انك بنت عائلة صديقة لعائلتنا فالاكيد رح تكون عائلة لاباس عليها، وصراحة مفهمتش يعني عائلة غنية مقدروش يشريولك شقة هنا؟ ياا سيدي غير يستأجرولك، اه ولا يمكن عائلتك للاسف بخيلة ومن النوع لي مبدأهم في الحياة جمع الأموال وعدم صرفها؟؟؟ ( وتبسمت باستهزاء)
كانت رح تتكلم زهرة قاطعتها تسنيم(بابتسامة على محياها) : لا والله الصراحة ولا وحدة من هاذ الاحتمالات لي خممتي فيهم لانو بصراحة حنا اخر همنا الدراهم وزيد عليها مانخمموش بهاذ المستوى. ف بكل بساطة السبب لي خلا عايلتي يبعثوني هنا هو حذرهم وخوفهم عليا واحتياطهم لأنو بالنسبة لعايلتي انا اغلى من الدراهم او الشقة، وبما أنو جدي صديق العائلة فأكيد رح يكون مطمن اكثر وانا في ايدي امينة تحت مسؤولية جدة زهرة.
زهرة(خزرت في كارمن ودارت لتسنيم حكمت يدها وقالت) : ههه ماديريش على كارمن دمها خفيف وتحب تضحك برك. (رجعت خزرت في كارمن) مش هك!!
كارمن(بابتسامة صفراء) : اه هههه هيه مجرد سؤال وتلطيف للجو.
زهرة: هيا يا جماعة سامحوني تصبحو على خير نروح نرقد تعبت ، ونتي ابنتي تسنيم راكي تعبانة من السفر روحي ترتاحي.
صونيا: نوضو كامل نرقدو راح الحال.
الكل: تصبحو على خير.
وناض كل واحد فيهم طلع لبيتو، كاين لي رقد مباشرة وكاين لي بقا يخمم ويخطط.

#يتبع😊