كرونيك: مهمتي_دمرت_حياتي

22

✍مهمتي دمرت حياتي ✍

الجزء 22:
في الصباح تسنيم ماخرجتش من الفيلا، لانو خليل منعها من الخروج حتى ترتاح رجلها على الاقل يومين. بعدما خرجو الكل، خليل لخدمتو .فؤاد مقدرتش تعرف وين راح، سيدرة تقرا زهرة و صونيا راحو لسونتر التجميل بش يديرو مساج وكارمن في غرفتها متنوضش بكري لانها تبات سهرانة.
نزلت تسنيم تتجول فالفيلا بعدما فطرت، فجأة خطرتلها فكرة انو تدخل لغرفة نوم فؤاد بالاك تلقى الحلقة المفقودة وتفهم لي صاري. طلعت تتسحب ودخلت للغرفة، كانت غرفة كبيرة طاغي عليها اللون الاسود ذات طابع رجولي، تقدمت جهة الدريسينڨ وبدات تفتش فجيوب الفاست لي معلقين بعدها فتشت القجر تع الاكسسوارات والساعات لانو فؤاد من النوع لي رغم كبير في العمر الا انو متهلي في روحو اغلب ازياءو سبور مع اكسسوارات. ما لقات حتى شي يجاوب اسئلتها، تلفتت وراها تقلب بين الثياب حتى لمست يدها خزنة قربت منها رح تحاول تفتحها بعدها خممت انها متعرفش بزاف امور على فؤاد يعني لا تاريخ ميلادو ولا حتى شي، فجأة خطرت على بالها تكتب اسم بنتو(كارمن) وبالفعل تفتحت الخزنة، من فرحة تسنيم ماصدقتش انها فتحتها بقات دقائق تستوعب بعدها مدت يدها وفتحت الباب، لقات مبلغ من الدراهم وباسبور فؤاد بالاضافة الى دفتر عائلي، قلبت وجها لانها ما تحصلت على حتى حاجة تساعدها في حل اللغز لي راهي فيه. بدات ترجع في الدراهم والباسبور للخزنة كي هزت الدفتر العائلي بش ترجعو طاحلها من يدها وطاحت منو صورة،طبست هزت الصورة قلبتها لقاتها صورة امراة جميلة عيونها رمادي تشبه لكارمن بزاف تقول صورة لكارمن بعدما تكبر، قالت اكيد تكون امها حلت الدفتر بش ترجعها فيه لكنها تفاجئت لما فتحاتو على صفحة الازواج وقرات اسم الزوجة (كلوديا مارتيز) ، دهشت وفمها تحل من الصدمة هي تعرف انو ام كارمن روسية، و كارمن دايما طالعة هابطة لروسيا بصح ما توقعهتاش تكون شريكة فؤاد في شراء الاسلحة باسمها، ولي صارت متأكدة منو انو كارمن عندها يد فالموضوع مادامها تروح لروسيا باستمرار، هاذ الشي يدل على انو كارمن هي الوسيط بين فؤاد و كلوديا. رجعت كل شي لبلاصتو وخرجت من الغرفة مسرعة لغرفتها.
طول اليوم وهي في غرفتها تحاول تتاصل بباباها وموصلتلوش يمكن عندو خدمة ضرورية. وصلت لعشية جات زهرة وصونيا وحتى سيدرة، توجهت تسنيم لغرفة سيدرة دقدقت ودخلت.
تسنيم: سلام باربي
سيدرة (ناضت عنقتها) : اهلا حبوبتي وش راكي؟ علاه خرجتي من غرفتك ونتي مازالك تعبانة لو عيطيلي كنت جيتك انا.
تسنيم: لا راني مليحة حبيبتي، ديجا مليت طول ليوم فالغرفة وانا تعرفيني منحملش نبقى في فرد بلاصة هههه، قلت نجي نحكيو شوي.
سيدرة: يوووو مرحبا والف مرحبا
تسنيم: ههه اهيه كفاش فات نهارك؟
سيدرة : والله ماكان حتى جديد نفس الروتين، قراية طول ليوم وكي نخرج للساحة نقرا روايتي المفضلة😍(السفاح العاشق) تعرفي قصة توووب ننصحك تقرايها كي يكون عندك فراغ.
تسنيم: ممم عنوانها يجذب، علاواش تحكي؟
بدات سيدرة تحكيلها على احداث القصة، وبداو فالحكايات حتى سقساتها تسنيم على كارمن وحياتها كفاه.
سيدرة: كارمن انسانة مستهترة كل همها الدراهم والخرجات، بصح تغيضني خاطر والديها منفصلين وهي عايشة نص حياتها هنا ونص في روسيا مع امها، وامها انسانة مادية بزاف، هي اكبر من خالي فؤاد بسنة او اثنين تعرف عليها وقت كان في روسيا رحلة مع صحابو، وبعدها بفترة قصيرة جات هنا للجزائر، تزوجو مدة من بعد ماتفاهموش، هي تع سهريات وتمسخير اعز حاجة عندها الدراهم قادر تبيع والديها على جال الدراهم. صارت بيناتهم بزاف مشاكل فالاخير فضلو يطلقو ،كل واحد فيهم يعيش في بلادو بصح يبقاو اصدقاء، خالي فالاول بحكم انو كارمن كانت بيبي طلب منها تخليها عندها حتى تكبر ويجيبها بصح طليقتو ماقبلتش لانو رح تقيدها. خلاها خالي عندو وجابلها مربيات حتى كبرت، يمكن هذا من اهم الاسباب لي خلاتها كارمن لي تشوفيها حاليا بالاضافة الى جيناتها لي وارثتهم عن امها.
تسنيم كانت تتنصت بكل اهتمام ومتبعة كل تفصيل. بعدها تكلمت: مممم مسكينة رغم طبيعتها وشخصيتها بصح نظن انك تعيشي بين والدين منفصلين وكل واحد فيهم عايش حياتو ونتي فالنص حاجة صعيبة بزاف، انا حاسة بيها (وتنهدت)
سيدرة: سامحيني تسنيم يمكن ذكرتك بوضعك، والله ماكان قصدي
تسنيم: لااا حبيبتي، معندك حتى ذنب وحتى نهار حكيتلك على حياتي قبل ،يعني معاناتي بين والديا حكيتلك خاطر حبيتك ونعرف ماقصدكش تجرحيني نتي غير حكيتيلي عليها. بغيت نسقسيك! عندها بزاف كارمن من اخر مرة سافرت فيها لروسيا؟؟
سيدرة: ممم لا مش بزاف يمكن بتاريخ •••••••، علاه تسقسي؟
تسنيم: ااه، لا والو غير سؤال على بالي. هيا مالا نخليك ترتاحي شوي وبعد تراجعي دروسك.
رجعت تسنيم لغرفتها و اتاصلت بصديقها باسم.
#يتبع😊