كرونيك: مهمتي_دمرت_حياتي

36

✍مهمتي دمرت حياتي ✍

الجزء 36:
لما دخلت ميرنا ناض باباها وجدها سلمو عليها و رحبو بيها، قعدت مقابلتهم وتستنى فيهم وش يقولو، بقات تحول في نظرها من باباها لجدها ولا واحد قادر يبدا، لوهلة خافت انهم يزيدو يطلبو منها طلب اخر خارج على قدراتها، واتخذت قرار وقتها انو مهما زادو طلبو منها رح ترفض مهما كان الثمن ،بعد مدة نطق جدها.
سي ابراهيم: بنتي حنا مؤخرا عرفنا حقيقة رغم صعيبة لكن من حقك تعرفيها.
ميرنا: حقيقة!!! بخصوص شكون؟
سي ابراهيم: تخصنا كلنا بنتي، عايلتنا كاملة، شوفي نتي تهدني رح نخبروك بالشوي.
ميرنا: جدي ماني فاهمة والو واعصابي تشنجت، بليز اهدر.
احمد: احم بنتي.. شوفي فالفترة الاخيرة صارو عدة انفجارات وتهجمات على عدة معسكرات وبالاخص المعسكرات لي حنا مكلفين بيها ونمولوها في أنحاء البلاد. كنا شاكين في فؤاد لأنو عندو سوابق ومتهم في العديد من القضايا الشي لي خلا اصابع الاتهام توجه نحوه، لأنو صاحب اعمال مشبوهة واعتقل عدة مرات لكن بفضل نفوذو قدر يخرج من الاتهامات كي الشعرة من العجين، وحنا لما بعثنالك لعايلة المرجاني، كنا شاكين فيه انو هو وراء عمليات التهجم على العساكر وسرقة اسلحتهم ثم تفجير المعسكرات، كنا باغيينك تجيبيلنا الدليل والمعلومات لي تساعدنا نتخلصو منو ومن امثالو. والصراحة نتي نجحتي لكنا ماكناش متوقعين انو كي يتكشف فؤاد رح تتكشف معاه حقيقة توجعنا بزاف (هبط راسو مقدرش يكمل حتى نطق سي ابراهيم)
سي ابراهيم: الحقيقة يا بنتي انو فؤاد مؤخرا كان عندو شريك وبعدما استحكم هاذ الشريك طعنو في ظهرو ورجع هو عدونا بالمرتبة الأولى.
ميرنا: اه صح انا سمعتو مرة يحكي على حاجة كيما هك و..
قاطعها سي ابراهيم: خليني نكملك بنتي، المشكل حاليا هو هاذ الشريك.
(هبط راسو سكت لفترة وكمل) هو منا وفينا يا بنتي غدرنا لأسباب حسب ما قال، بصح مهما كانت اسبابو هو جرحنا وطعنا، صدقيني طعنة الاعداء الغرباء ماتضرش كيما طعنة الاحباب... احم الشريك يا بنتي هو توأمك فارس.
فور ما قال الكلمة، سكت يشوف مع ردة فعلها، هي بقات تشوف معاه مدة بعدها بدات تضحك بطريقة هستيرية
ميرنا : 😂😂😂لا ههههههه جدي ظاهر فيك خرفت بكري ههههههه وانا لي كنت نقول مازالك شباب ورح نزوجك عن قريب هههههه طلع عندك زهايمر رغم انك تقرأ ديما القرآن، زعما كفاه حكمك زهايمر! لازمك طبيب في اسرع وقت جدي.
سي ابراهيم: بنتي ميرنا، اسمعيني الشي لي سمعتيه صعيب بصح هذا هو الواقع. نتي غير مصدومة.
ميرنا: وشمن مصدومة الله يهديك. جدي فارس الله يرحمو توفى من فترة في حادثة وقوع الطائرة،ياك نتا بنفسك حضرت للجنازة الجماعية ورحت زرت اهالي الموتى،وفارس من بينهم يعني مبقاش كاين.. بحححح
سي ابراهيم: هذا لي اوهمنا بيه يا بنتي، هو هرب وتعاون مع فؤاد على تزوير شخصية و وثائق بش ينتاقم منا واوهمنا بلي مات فالحادثة تع الطيارة يا بنتي. ركزي معايا وديري عقلك ماناش في وقت الصدمات يا بنتي معندي علاه نجيبك هنا ونتمسخر بيك، لي سمعتيه هو الحقيقة انو خوك ما ماتش وهو المجرم وراء العمليات لي صارو بمساعدة فؤاد، يعني طول الوقت وحنا في دار غفلون نروحو نزورو قبر فارغ وهو حي يرزق.
#يتبع😊