كرونيك: مهمتي_دمرت_حياتي

09

✍مهمتي دمرت حياتي ✍

الجزء 9:
في صباح كانت جالسة معاهم على طاولة الفطور، ناض خليل وتكلم معاها: تسنيم راني نستنا فيك برا كملي فطورك براحتك ونوصلك للفاك.
جات تنطق سبقتها كارمن: خليل انا راح عليا الحال مزروبة اذا توصلني في طريقك و تسنيم مادامها مش مزروبة تروح في عقلها.
شاف خليل مع تسنيم ورجع شاف فيها: اذا مزروبة يديك الشيفور انا مزال عليا الحال. وخرج خلاها معصبة رح تطرطق. ناضت هزت حوايجها وخرجت برا مخزرتش معاه هزت طاكسي ومشات، اما هو فماداهاش فيها اساسا وبقا يستنى في تسنيم لي بعد دقائق قليلة خرجت حادرة راسها تبسملها حللها الباب ونطالقو. طول الطريق وهي سارحة تخمم، هي مش غبية ولا صغيرة بش متفهمش بلي خليل مهتم بيها بزاف دايما يوصلها للفاك ويرجعها ، يخرجها ساعات وقت الغداء يتغداو برا بحجة انو باغي يبدل جو ويرتاح معاها، وثاني لاحظت بلي كارمن تحبو وتحوس على اهتمامو وتحاول تخليه يقربلها بأي طريقة وكذلك فاهمة بلي كارمن متحبهاش وتتعامل معاها بالخايب خاطر معاملة خليل ليها. كل هاذ الافكار واحساسها بالذنب تجاه خليل لي خلاتو يتعلق بيها بدون وعي منها، وكارمن لي حست انها انسانة عاشقة وهي حرمتها من حبها، كانت سارحة تخمم في هاذ الشي ومالاحظتش بلي هاذي مش طريق الفاك وبلي راهم قريب يخرجو من المدينة، مافاقت غير لما وقف خليل السيارة وتكلم يتبسم: هيا يا صغرونة ليوم نخطفك ونخليك تغيبي من الفاك ونتسكعو شوي ههههههه.
شافت فيه تسنيم و دورت راسها تشوف حولها، كانو قدام مدينة الالعاب(parc d'attractions) دارت لخليل داهشة: وش هذا! علاه جينا هنا؟ وش نديرو؟
ضحك خليل: ههههههههه بالشوي عليك وشبيك تخلعتي غير نتمسخر معاك مش خاطفك غير خاطف يوم من حياتك تقضيه معايا وبوحدنا من بدايتو لنهايتو. وش قلتي؟
تسنيم فضلت انها تعيش كل دقيقة من يومها في وقتها متسبقش الاحداث وماتخممش في حوايج يقلقوها في هاذ اليوم، تبسمت: اوك ههه
دخلو لمدينة الالعاب اول حاجة داروها راحو شراو ليتيكي تع الالعاب ومن بعد شرالها غزل البنات وبداو يتمشاو و يشوفو مع الالعاب لي تعجبهم يجربوها، وقفوا قدام السيارات الكهربائية خزرو مع بعضهم بنظرات شريرة ونطالقو ركبو كل واحد فيهم في سيارة ويخبطو في بعض ويضحكو، بعدها مشاو للبالونسواغ قعدت هي وهو يمرجح بيها يحكيو ويضحكو، مشاو بعدها للعبة الاخطبوط الدوار ركبو مع بعضهم وكي بداو ارجل العنكبوت يدورو بدون وعي منها حكمت يدو وزيرت عليها وغمضت عينيها وهو يضحك عليها.
بعدما هبطو مشاو رتاحو شوي من الدوخة لي شدتهم و مشاو لمطعم تغداو في جو تع ضحك وحكايات. بعد الغداء فاتو على القارب الهزاز، هنا توقف خليل ودار عندها بنظرات شريرة. خليل: نتراهنو اذا ركبتي فيه نعطيك وش تحبي. 😏
تسنيم: لا نتا اكيد هبلت مستحيل نركب فيه ندوخ مستحيل، انسى 😕
خليل: ههههه زعما نتي مثال للمراة القوية يخي خوافة يخي وديجا قتلك نعطيك وش تحبي.. وش تحبي ههه
تسنيم: مممم..اكيد وش نحب؟ 😏
خليل: وي كلام رجال 😁
تسنيم: اوك هيا بصح كون متأكد بلي نتا لي خاسر 😉
ركبو مع بعضهم وهي منين ركبت وهي تشهد ودخل وتخرج فالنفس بالسيف كابشة في مقبض الكرسي ومرعوبة، خزر معاها خليل وضحك بعدها شدلها يدها وزير عليها بش يطمنها. بدا القارب يتحرك مع الاول بالشوي من بعد السرعة ماشية وتقوى وهي مش قادرة تفتح عيونها وتخزر تحت غير تعيط قريب تبكي. ما توقف هذاك القارب الا و روحها حستها خرجت، نزلو من القارب وهي فاقدة توازنها ووجها صفر قطرة دم مفيهش حكمها خليل مخلوع عليها ومشا جلسها على كرسي وبدات هي تتقيأ حكملها خليل شعرها ومشا جابلها قرعة ماء غسلها وجها وعتاذر منها بشدة لأنو حس بالذنب. تسنيم: هه ذرك جاي تقلي سمحيلي قتلك راني ندوخ..أااايما روحي رح تخرج بفففف معادش ندير رايك خلاص.
خليل: مادامك رجعتي تهدري وتتحلفي ولسانك طوال معناها تنحات عليك الدوخة هيا مالا نوضي ندورو شوي يضربك الهواء.

تمشاو جهة مساحة خضراء مخصصة للجلوس فالظل وقعدو تحت شجرة يتفرجو مع الولاد الصغار يجريو ويلعبو فرحانين.

#يتبع😊