_دومي حبيبي وجوزي وسندي وكل حاجة ليا في الدنيا
رمقها بنظرة ثاقبة متفحصة وهو يشك في تلك المقدمة التي يعرف ما وراءها جيدا
لذا هتف وهو يكمل ارتداء ملابسه بينما هي تقشر حبات الموز وتأكلها
_عايزة إيه هاتي من الآخر يا ديدو
هتفت هي بتدلل وهي تقضم قطعة من الموز
_ايه يا دومي مش بعبرلك على حبي وامتناني ليك
رفع حاجبه باستنكار وهو يراها تأكل الموز بنهم
_ممم مع كمية الموز اللي أكلتيها دي ..مفتكرش
ادعت هي الغضب وهتفت متبرمة
_الحق عليا إني بسمعك كلام حلو .
أكمل ارتداء ملابسه وهتف بلا اهتمام
_تمام يا حبيبتي.. أنا لازم أنزل علشان اتأخرت وهجيلك بالليل
اقتربت منه ووضعت يدها على كتفه وهتفت بتردد
_ادهم .... ممم كنت عايزة أقولك حاجة مهمة
استدار اليها راسما على وجهه علامات الانتصار
_ما أنا قلت من البداية الداخلة دي وراها إن
عادت للخلف مدعية الحزن
_بقى كدا يا أدهم طب زعلانة منك
قبل هو جبينها بحب
_لا حقك عليا.. ها قولي عايزة إيه قبل ما أنزل .. أجيبلك شجرة موز يا روحي وأنا راجع!!
قالت وهي تضع آخر قشرة موز بعد ان قضت على صينية كبيرة مليئة بالموز بمفردها
_لا أنا مبقتش أحبه زي الأول خلاص نفسي مبقتش جاية عليه
نظر لقشر الموز على شكل الهرم وهتف بتهكم
_اه واضح يا روحي
هتفت بدلال
_طب مش هتسألني عايزة اطلب منك ايه
أمسك أيدها وقبلها بحب
_حبيبتي تطلب وأنا أنفذ
قالت جملتها سريعا وكأنها تطلق صاروخا
_أنا غيرت رأيي ومش عايزة أولد.
انفجر هو ضاحكا فلم يستطع كبت ضحكاته الساخرة
_ههههه .. نعم يا ديما يا حبيبتي.. مش عايزة تولدي .. امال اللي في بطنك ده نعمل فيه ايه !
هتفت بهدوء
_بسيطة يا أدهم .. نسيبه في بطني إيه المشكلة
_لا مفيش أي مشكلة خالص
قالها وأبعدها عن طريقه ليهم بمغادرة الغرفة لتلحق به وهي تقول
_ها يعني موافق يا أدهم
ليهتف بحنق
_موافق طبعا يا روحي ... سيبيه سنة ولا اتنين أهو يكون كبر كدا ويخرج على المدرسة علطول
_طب والله فكرة
قالتها بحماس ليصيح بها هو عاليا
_ايييه!! هيه ايه اللي طب والله فكرة.. إنتي جرا لعقلك حاجة يا ديما .
هتفت هي بصوت باكي
_ادهم اسمع أنا بقولك أهو انا مش عايزة أولد وده آخر كلام عندي
زفر هو بحنق وهو يكظم غيظه
_طب أقولها ايه دي بس يا ربي
_أولد انت يا أدهم أنا مش هولد وده قراري ومش راجعة فيه.
أخذ نفسا عميقا ثم أخرجه محاولا التحكم في غضبه ثم هتف بابتسامة سخيفة
_حاضر يا روحي أولد أنا زي ما تحبي .. ها لسه عندك حاجة عايزة تقوليها قبل ما أنزل
رمقته برضا لأنه أراحها ثم هتفت بعد تفكير
_ممم عايزة موز
ليهتف هو بتبرطم مسموع
_دي شكلها حامل في قرد فعلا ماهو مفيش كائن طبيعي بيأكل الكمية دي من الموز إلا القرود .
أنت تقرأ
قصر الصياد
غموض / إثارةالجزء الثانى من همسة امل الجزء الثالث من لماذا يا ابى عندما تكون العائلة فى المقام الاول_عندما تكون العائلة متحدة _تكون قوة لا تقهر قصر الصياد حاصلة على التريند الاول _مسابقة_
