قصر الصياد

حلقات ادهم وديما ٤

ديما مردتش بعدها لان البنات كلهم حاوطوها وقعدوا معاها فهو خرج برا مع الشباب اللي بدؤا يهنوه هما كمان.

مروان لاحظ ان ادهم ساكت ووشه مكشر فراح عنده وقال
_مروان متزعلش من ديما أنت عارف تأثير البنج وتقريبا كدا لسه بتخرف ومش عارفة بتقول ايه.

أدهم ابتسم لمروان ابتسامة خفيفة مقدرش حتى يكملها لانه حاسس ان جواه نيران مفيش حاجة هتطفيها الا لو راح دلوقتي وفجر راس ديما بعد الكلام اللي يشيب اللي سمعه منه بس متكتف ومش عارف يتحرك الا لما يواجهها الأول وهو لحد دلوقتي مش عارف يقعد معاها لوحدهم علشان يواجهها باللي قالته .

ديما فضلت في المستفى كم يوم في رعاية الممرضات ومامتها ومامة أدهم معاها طول الوقت.

وبعد كم يوم كمان ديما خلاص روحت بيتها وبردو مامتها ومامة ادهم مسابوهاش ولا بقية العيلة لكن أدهم عرف يلاقي الوقت اللي يتكلم معاها فيه بالليل

بالليل ولما ديما نيمت البيبي في سريره كان ادهم مراقبها ومنتظرها تخرج علشان يواجها
لقاها بتخرج وبتنادي عليه
_ادهم ممكن أعرف مالك، من يوم ما ولدت وانت مش على طبيعتك.

ادهم قال بجمود
_مالي يعني ما أنا كويس أهو، ولا شكلي مش عاجبك وشايفاني مخيف قدامك.

ديما قالت باعتذار 
_أدهم البنات حكت لي انا قلت ايه في المستشفى، أنا أسفة اوي والله العظيم انا مكنتش فايقة ولا عارفة بقول ايه، ووالله مش فاكرة انا قلت ايه ولا كنت بعمل ايه.

لقته بيبص ليها بنظرات حادة وكأنها سهام بتخترقها وكأنه في اللحظة دي بيبص على عدو مش زوجته حبيبتة قلبه اللي اختارها من وسط بنات العالم كله وارتضاها ليه زوجة

ديما خافت في اللحظة دي ورجعت لورا وقالت
_أدهم انت بتبصلي ليه كدا، أنا عارفة اني اتسببت ليك بالحرج وقدام الناس، بس والله مش مقصودة أبدا، وانت عارف ده، أدهم انا ممكن أكون مجنونة في بعض الأحيان ومتهورة لكن....
آدهم قرب منها ومسك إيدها وضغط عليها جامد وقال بصوت كله غضب وشر
_لكن، لكن إيه ياريتها جت على اللي قلتيه قدامهم مكنتش ههتم ما أنا متعود على عبطك وغباءك ومتحملة على أساس إنك واحدة محترمة وصاينة حرمة بيتها وصاينة جوزها في غيابه مش خاينة زيك.

ديما على قد ألمها من ضغطة ايده على دراعها وتعبها لانها لسه والدة الا ان ألمها من اللي بيقولوا وبيتهمها بيه كان أقوى آلاف المرات
علشان كدا بصتله بصدمة ورمشت بعنيها أكتر من مرة وقالت بصوت مهزوز
_أدهم انت، انت بتقول ايه!

أدهم بصلها باحتقار وقال بصوت زمجره كأنه أسد مفترش
_ايه مش فاكرة فارس أحلامك اللي نفسك تهربي معاه، ولا مش فاكرة كمان انك اتجوزتيني شفقة وانتي أصلا مش بتحبيني ونفسك تتخلصي مني علشان تروحي لحبيب قلبك