قصر الصياد

حلقة خاصه بارت ٦_

نظرات تتبادلها الاختان احداهما تنظر للاخرى باستياء غير مصدقه فعلتها والأخرى تنظر لها بتحدى عجيب نظرات تنطق عنها بدل لسانها وكأنها  تجيب وبكل جرأءه نعم ذهبت إليه ،نعم إشتقت لصوته لصورته  فوجدت قدماى تسوقاننى دون وعى منى لأجد نفسى أمام بيته ،تتكحل عينى برؤيته ويطرب قلبى بسماع صوته

اخرجتها أختها من صمتها هذا ونظراتها التى تشى بالكثير تقول بعتاب _ليه يانعمة ؟

نعمة بهدوء_وفيها إيه بس مش فاهمه مكبرة الموضوع ليه

تنهدت بغيظ من اختها_يابنتى انتى فين وهو فين ليه بتعشمى قلبك فى الفاضى ،محدش هيتعب غيرك فى الاخر

لتقول نعمه وهى تفك دبابيس حجابها وتنزعها عن رأسها_وعلى الفاضى ليه ،أنا عندى فرصه كبيرة ولازم أستغلها

_يابنتى ده راجل متجوز ،عايزة منه ايه بس ،انتى كده بتلعبى بالنار

ضيقت نعمه عينيها فى غضب وقالت بحدة_بقولك ايه يا لبنى ،انا مش بعمل حاجه غلط  ،وبعدين ما انا عارفه انه متجوز انا مقلتش حاجه

_يبقى تخليكى شاطرة وتخرجيه من دماغك

نظرت لها مطولا بنظرات حالمة ماكرة_ما انا  فعلا لازم اخلينى شاطرة ومخليهوش يضيع من ايدى ،قدامى مهمه كبيرة وخاصه لما شوفت زوجته ،بنت الايه طلعت جميلة أوى

هزت لبنى رأسها لا يعجبها حديث اختها_يانعمه انا عايزة مصلحتك فوقى

لوت نعمة شفتيها فى تبرم_يوووه يا لبنى خليكى انتى فى خطيبك وسيبنى فى حالى ،مش ناقصه وجع دماغ

لبنى بضيق_انا اللى غلطانه انى بنصحك

نعمه_وفرى النصايح لنفسك ،المهم بابا فين

لبنى وهى تجلس الكرسى جوارها_نزل الشغل من شويه

قالت نعمة باندهاش فأبوها مازال مريضاً ولا تريده ان يخرج فى حالته هذه_ ازاى تسبيه يخرج

لبنى بحزن_اعمل ايه هو اللى أصر بيقول زهق من قعدة البيت

تنهدت نعمة بحزن _ربنا يشفيه أنا السبب فى اللى حصله

قامت لبنى من مكانها ووقفت جوار اختها ورتبت على كتفها _كلنا عارفين ان اللى حصل ملكيش ذنب فيه ،انسيه يانعمه

سقطت دمعه من عينى نعمه لكنها سرعان ما مسحتها وقالت وهى تحاول ان تضحك_تصدقى انا مبسوطه باللى حصلى ده علشان هو السبب فى انى أشوف مروان ويكون قريب منى بالشكل ده

لوت لبنى فمها وقالت وهى تضربها على رأسها _ياشيخه خضتينى عليكى
دفشتها نعمه بعيدا  _طب ابعدى كده خلينى اشوف الشنط دى فيها إيه

فتحت نعمة الحقائب على الطاولة امامهم وجدت فيها الكثير من الاشياء التى يحتاجونها فى المنزل ومأكولات ايضا وفى حقيبه اخرى خمنت محتواها فتحتها فوجدت بها الادويه التى يحتاجها والدها شهريا والتى لا ينسى مروان ابدا ان يرسلها له