Friends | فريندز

الفصل الواحد والثلاثون (١)

حدث في الفصل السابق..

- انتي مكبره الموضوع ليه، ايه المشكله يعني، قالك بحبك وخلاص، الدنيا اتهدت؟؟

- غايبة بقالك يومين، و كلمتك كان موبايلك مقفول

- اقوله يا بابا ركز معايا يا بابا حس بيا مفيش خالص زيك كده بالضبط

- بسسس بسسس دكتور حاتم بسسس

- طلع المسدس الي في جيبك من غير اي مقاومه

- البنت زي القهوه لو انت اهملتها ومهتمتش بيها هتبقى بارده حتى في مشاعرها اتجاهك

- كلاكيت تاني مره فزت عليك اعترف بالفشل

- خلاص بس كفايه علشان حاسه اني هرجع

- هو شاب كويس و مؤدب والحقيقه انا موافق عليه و امك مرتحاله وموافقه وده كفاية

- متزعلش منها ، هي بتشتغل علشانك

- يااا حبّيبه.. على فكره اصواتكوا عاليه اوي الحقيقه

- أنا كنت عارفه ان ده هيحصل في يوم من الأيام

- غباءك ده هو الي وصلنا لهنا

- خلاص يا سارة قولتلك عادي ايه المشكله بتعيطي ليه بس؟؟!

- دي واحده كانت متجوزه على سنه الله ورسوله و محصلهاش نصيب مع الحيوان الي كانت متجوزاه انت مال اهلك

- يادي النيله رجعنا تاني للحوار ده

- ولأول مره اجرب شعور سيء جديد عمري ما حسيته قبل كده

___________

" الغيرة شعور فطري موجود عندنا كلنا بدرجات متفاوته، بنحس فيها تلقائي كأنه شعور تهديد ان في طرف ثالث ممكن يبوظ العلاقة، وهو شعور شبه بيكون بين الغضب و الضيق و الحزن و مشاعر كتير مع بعض منكم تخرج في صوره خناق مع الشخص الاخر وهو مش فاهم ليه، هو ممكن يكون شيء يبدو أن هو شعور حلو.. بس هو اكتر شعور سيء ممكن تحسيه لأنه بيخرج منك السوء "

انهت ندى جملتها ببساطة وبصت لسارة الي قاعده أمامها في سريرها في عتمه الليل حيث رمقتها سارة بطرف عينها تخبئ مشاعرها الداخليه اتجاه الأمر

" ايوه يعني انتي عاوزه ايه دلوقتي؟ "

بصتلها ندى بعدم تصديق
" مش انتي الي بتسألي! عاوزه تعرفي ايه الشعور الي حسيتي بيه ده؟! "