الغرام المستحيل

part 10 😃

في واحد زنزانة رقم ديالها 116 كبيرة وحيوطها گاع مقشريين ومخططين فيهم سجناء اللي عندو شي كلمة راه كاتبها تم ... وفيها بزاااف ديال ناموسيات وحدا فوق من وحدا ومجنبينهم على الحيط باش لوسط يبقا خاوي ويحطو فيه لكراسة اللي كانو بزاااف وطابلة اللي كياكلو فوق منها ... وموجودين تم جميع الاصناف تاع لبشر .. هالمشرطين لكمامر هاللي مقطوعة ليه يد هالي خصاه ودن وكاينين حتى رجال لكبار اللي محكومين بالمؤبد مهم لحبس مخلط وكلها وهمو .... كان متكي فوق ناموسيتو اللي كانت لتحت  وحاط يديه تحت من راسو ووشام إيديه باين وشعرو دهبي اللي زاد غوفل هو ولحيتو وتحت عينيه كحال بين عليه سهر ... لابس سليب سماطي في لكحل وسوال سرفيط حتى هو كحل ... ساكت ومغوبش ممسوق لحتا حد ولا لنظرات اللي كيديرو فيه لحباسة لأنه مللي دخل عمرو هدر مع شي واحد فيهم مابغيش يضسرهم عليه باركة عليه غي همو ... بعد غدا عندو لمحاكمة وراسو مرفوع معاها بشحال غيحكمو عليه ويعلم الله شحاال غيعطيوه واش 6سنين ولا 7 ... هو عارف بلي سعد دار ليه محامي ولكن قضيتو صعيبة حيت فيها تهريب لمخذرات وهما مكفاهمش هادشي لا دارو ليه حتى تكوين عصابة .... واحد شوية وهو كيفكر جات ليه في بالو ليلى مللي گال ليه سعد راه حالتها حالة وكانت كتبكي عليه ملي ساقت لخبار بلي هو في الحبس ... وهي اللي واقفة مع مو في هاد المحنة واخا جرحها وقصحها في قلبها اخر مرة شافها فيها إلا انها مشداتش في قلبها من جيهتو ... واش حتى لهاد درجة كتبغيه ؟ وفين هي يارا لوقت اللي خاصها تكون معاه فيه هي غبراات ومبقا عرف عليها حتى شي خبار؟ وهو في دوامة افكارو حتى كيسمع شي صوت مدعدع بالگارو ديال واحد من لمحابسية واقف عليه فوق راسو وقال : مالك اصاحبي لاقط علينا غوباشتك منين جيتي ونتا هي مبرطم

شاف فيه أوس ومجاوبوش وعاود دور راسو مابغاش ينوض صداع وهو اصلا معصب وماعندو گانة لحد

نفس داك شخص دوى ثاني وگال لصحابو : هاد خينا باين ليا نيت معفر وطالق علينا شبابو غالي

بداو كيضحكو لمحابسية على كلام صاحبهم .... اما أوس غي سمع كلامو ناض ليه بعصبية ضربو بكلاك حتى رعفو .... بدا كيتسمع سقيل في ديك زنزانة كلشي مصدوم من لفعلة لي دار أوس حيت داك خونا هو لي كان حاكم لكروة ❌( لسيلون زعما) ... داك خونا مارضاش قدام خياتنا لخرين اللي كان كيتحكم فيهم بغا يدير فيها راسو واعر ... هز يديه ببونية بغا يضرب أوس وهو يشدها ليه أوس ولواها وبقا كيعطيه بقبضات متتالية بصمت بلا مايهدر ولا يتكلم .... مزااال لخرين اللي كيحاولو يفكو كيهدرو حتى كثر لغا وسمعوه لحراس اللي حاضيين تم وجا اللي مكلف بديك زنزانة وبدا يدرب بالعصا في دوك لحديدات ديال سيلون وكيقول بالغوااات : سكتوووووونا

لحباسا غي سمعو صوتو وهما يجمدو حيت عارفين الا مشاو حتى شدو شي واحد كيقتلوه عصا ويلوحوه في لحبس الانفرادي سيمانة في ظلام مايعرف ليلو من نهارو ... اما أوس قرب ليه هذاك خونا جارو من لكول ديالو مرخي وسخفان بين يديه وشاف فيه بتحذير بلا ما يدوي معاه ولاحو حدا رجليه هز راسو في لخرين ودوز عليهم بعينيه كاملين بتهديد زعما الا حاول شي حد يتطاول عليه غيطرا ليه كفس من هكا ... رجع لبلاصتو ودار نفس نعسة اللي كان داير قبيلة غي هاد لمرا حط ايد وحدة على عينيه و غفاا حيت كان عيان ومع ذالك راد لبال مع لخرين حيت في أي لحظة يغدروه جاب الله نعاسو خفيف وكيحس بالغاشي الا جا حداه