جميلة : كلمي ليا عفا بنتي ليلى
وجدان : ليلى! ولكن ليلى مكايناش معايا وگعما شفتها ليوم
جميلة يله فتحت فمها باش تهضر قاطعها صوت تيليفونها كيصوني هزاتو وتحققات من رقم لي كان مولاه غريب ومعرفاتوش شكون
جميلة : ألووو
ليلى حنحنت وخرج صوت من حلقها متحشرج وماقاداش تهدر : يما
جميلة بلهفة : ليلى بنتي ... فينك وعلاش مجيتيش لدار ... اجي بعدا ديالمن هاد نمرة
ليلى ضغطات على حناكها وقالت بصوت خافث : هادي نمرة ديال لبوليس
جميلة بصدمة : لبولييس 😳
وجدان قربات عندها وقالت بقلق : اش كاين كيفاش لبوليس
جميلة ضربات على فخاضها : أويلييي على لمسخوطة اش درتي ... تي أش وصلك عندهم
ليلى ببكاء : والله أيما مادرت حاجة هئ هئ راه بغاوك تجي حتى نتي وجيبي معاك لكارط ديالك (قطعت )
جميلة بصدمة بقات دايرة تيليفون في وذنها يله كتستوعب هاد الأحداث لي بنجات ليها عقلها ... حطات وجدان يدها على كتفها وداخلها كياكلها الخوف وقالت : أش واقع اخالتي واش ليلى وقعات ليها شي حاجة
استوعبات جميلة وشافت فيها : لبرهووشة شدينها لبوليس
وجدان : أويلي وعلاش اش دارت
جميلة ماجاوبتهاش ومشات كتجري لجيهت دار راضية عاضة في كبدتها وكلها كترجف من لداخل وعقلها كيصور ليها جميع سيناريوهات الخايبة عن سبب وجود ليلى عند لبوليس ... وراضية مكانتش أقل منها من ناحية ضغط ولدها لي كيعاتب فيها وكيحاول يفهم سبب تغييرها المفاجئ
راضية وهي كتشوف فيه كيمشي ويجي قدامها : أنا مفهمتش لاش داير هاد لحالة كاملة
أوس وقف ودار عندها بعصبية وقال بصوت رجولي قوي : معرفتيش علاش هاا ... نسولك نتي نيت فين كنتي من صباح ونتي خارجة ومعامن كنتي
راضية : الله يهديك أولدي راه قلت ليك قضيت غي شي غراض وجيت
أوس برك فوق سداري وشد فراسو : بغييت نثيقك ولكن شي حاجة لداخل فيا كتقول بلي كتكذبي
راضية ضرها قلبها وعينيها غرغروا ... هي باغا تصارحوا مي مقدراش وخايفة لامايتقبلش رجوع الشخص لي سمح فيهم وخلاهم كيعانيو من وراه
أوس بانكسار : كنتمنى تكون هدرتك بصح حيت إلا كان العكس غتهرسي أي حاجة زوينة كتجمعنا
راضية تشنج عليها قلبها وحرقها اكثر وخافت لاتخسر ولدها وسندها لي كان معها وعاش معها أصعب أوقات حياتها ... حسات بلسانها تربط ليها وطاحت دمعة كترجم ألم الحرب لي فداخلها مابين انها تخبروا وبين انها تخبي عليه حتى يجي لوقت المناسب وتصارحوا ... خرجهم من تفكيرهم العميق صوت دقان ديال لباب بجهد ... ناض أوس عاقد حجبانو متوجه للباب وموراه راضية مدهشرة وكلها فضول اتجاه لي كيدق بهاد جهد ... حل عليهم أوس ولقا فوجهو جميلة و وجدان و على محياهم آثار الخوف و القلق ... شاف فيهم ب استفهام؟؟ عن سبب حالتهم المقلقة و قال : ياك لباس ا لالة جميلة
أنت تقرأ
الغرام المستحيل
Actionالقصة كتهضر على وااااحد البنيتة في عمر الزهور و غاتكون ضحية ديال الحب من طرف واحد لشخص اصلا عندو اخرى في حياتو و كيبغيها 💜 نتمنى القصة تنال اعجابكم و دعموها 😘
