شــمــس إلــيــاس

الجزء الثاني - الفصل العاشر

الفصل العاشر
بقلم عبدالرحمن الرداد
*************************************
قال النبي ﷺ: من قال حين يصبح وحين يمسي سبحان الله وبحمده مئة مرةٍ غفرت خطاياه وإن كانت مثل زبد البحر 
*************************************
خرج من المطبخ بعد أن قام بسكب العصير في الكأس وتوجه تجاه ابن عمه قبل أن يقول:
- اشرب يا هاني، البيت بيتك اللي بتقوله ده عيب والله متستأذنش وبعدين ايه سبب الخلاف ده؟
أخذ منه كوب العصير وردد بحزن واضح:
- مش عارف اقول ايه ولا ايه يا إلياس بس كل اللي اقدر اقوله إن فلوسه من مصدر حرام وأنا الحمدلله ربنا هداني وعرفت الصح من الغلط، خدت عهد على نفسي بإني مش هاخد قرش منه تاني وهشتغل واصرف على نفسي
اقترب «مراد» وربت على ظهره وهو يقول:
- أنت بتعمل اللي يرضي ربنا ويرضي ضميرك، متزعلش واعرف إن ليك أخوات في ضهرك
ابتسم وهز رأسه بالإيجاب ليقول:
- تسلم يا مراد
عرف «إلياس» أن «هاني» علم بعمل والده وابتسم لتصرفه الصحيح فهو لم ولن يصبح مثل والده وتعجب من تلك الثمرة الجيدة التي جاءت من شجرة فاسدة. اقترب وجلس على يمينه ليقول بهدوء:
- أنت هتشتغل معايا يا هاني وبالنسبة للفلوس متشيلش همها
نظر له وقال بحيرة:
- بس أنا مهندس اتصالات مليش علاقة بالبرمجة
هز رأسه بالإيجاب وقال بهدوء:
- عارف، أي مهندس بيكون دارس برمجة بس مش بتعمق وأكيد خدت تدريب في الكلية قولي نوع التدريبات ايه
تذكر ما أخذه من تدريبات أثناء دراسته وهتف على الفور:
- خدت ccna و cyber security من شركة سيسكو
رفع حاجبيه وقال بإعجاب:
- طب ياعم عاش أوي ده أنت دارس شبكات أهو
حرك رأسه بالإيجاب وردد:
- أيوة بس ايه علاقته بشغلكم؟
اعتدل وقال بتوضيح:
- شركة برمجة مش كل شغلها برمجة يعني فيه مثلا جزء الـ security وتوصيلات السويتشات والراوتر والكلام ده بيحتاج مهندس فاهم شبكات ده أنا أصلا هحط شرط في القبول إن اللي هيشتغل لازم يكون دارس كورس سيسكو وأنت واخده يعني هتفيدنا جامد
هز رأسه بتفهم وردد باقتناع:
- عندك حق، خلاص تمام أنا معاك وفي نفس الوقت هبقى مع الناس اللي هتتدرب وأهو أنمي مهاراتي
هنا صاح «مراد» بسعادة:
- أيوة كدا، الشركة لمت الحبايب كلهم
ابتسم ونظر إلى «إلياس» ليقول بتساؤل:
- أنا بتصل بكرم من امبارح مش بيرد ليه؟
ابتسم وربت على كتفه ليقول:
- ممكن بس من الموضوع اللي حصل، شوية كدا وهيروق متقلقش
ضيق ما بين حاجبيه وهتف بحيرة:
- موضوع ايه؟
تعجب من سؤاله ولكنه أجاب:
- موضوع أختك مريم يا هاني أنت نسيت اللي حصل ولا ايه
هز رأسه بمعنى لا وهتف بجدية:
- أنا بقالي يومين برا البيت وقافل موبايلي أصلا ومعرفش حاجة، ايه موضوع مريم ده؟ حصل لمريم حاجة أو تعبانة
ندم «إلياس» أنه قام بفتح هذا الموضوع وعرف الآن أن «هاني» لا يعرف الأمر منذ بدايته. صمت لثوانٍ قبل أن يقص عليه ما حدث ولكن بطريقة هادئة لا تجعله يغضب وما إن انتهى حتى قال هو:
- مريم اتجننت ولا ايه؟ إزاي تعمل حاجة زي كدا؟ استحالة أختي تفكر في كدا أصلا أكيد حد خلاها تعمل كدا وهي نفذت من غير ما تكون عارفة عواقب اللي بتعمله
نظر إلى «إلياس» وتابع:
- مريم مش وحشة يا إلياس وسامحها علشان خاطري، أنا هكلمها وهفهمها إن اللي عملته ده غلط
هز رأسه بالإيجاب وربت على كتفه ليقول:
- أنا عارف إن مريم مش كدا وعارف إن قلبها نضيف وإنها كويسة، زي ما أنت قولت تلاقيها نصيحة حد من صاحباتها وهي على نياتها نفذت من غير ما تعرف عواقب اللي بتعمله، أنا اضطريت اعمل اللي عملته علشان سمعة كرم اللي اتدمرت ظلم وعلشان تعرف عواقب اللي عملته