وأد القلوب

Part 13

"وأد القلوب"
بقلمي: وردة الخُـــزام

چنت اضنك غير عنهم الله يا مكبر عَــمــاي!🖤

★★★★★★★★★★★

بــــــــارت 1️⃣3️⃣

من صعدت الدرج عمتي مجانت جوة استغربت هي مو بالكثرة تصعد فوك شي كُلش نااادر، بعدني ع الدرج واجت مثل اللقطة السريعه براسي  من نزلنا وهي عبرتنا صعدت فوك!

لا ياربي ااااادم ،صرخت وشلتها ركضة…بس غير  رجليه يعينني اكمل الدرج احس ميقون ع المشي بعد .. روحي تعلگت ب ادم واني اذكر كلامها اريد بس اوصله ،بألف ياويل وصلت الغرفة فتحت الباب بقوة بسرعة جفلت و رتدت  للخلف ،ركضت عليه شلته وحضنته الصدري وجسمي كله يرجف ونفسي مااسيطر عليه من الخوف والركض الهث وحاضنه ادم الصدري الي كله على بعضه نتفه بحضني صاير، ابوس بي واجر النفس گوة، كعدت بالگاع مبهوته  وهي لسه على وگفتها، من خوفي عليه وادعي بس كون ممسويتله شي حتى ماحجيت شي وياهه ولا فتحت حلگي بكلمه.

اني من دخلت هي جانت مگنبصه يم سريره ومدنگه عليه .. بس مااخذ ذنبها، لأنه مااعرف اذا جانت ناوية شر بجيتها اله؟ لو يمكن الله حنن گلبها واجت تشوف حفيدها بدون مااشوفها حتى لتبينلي تحبه!
ماگدرت اجزم سبب وجودها هنا على الرغم مااستبعد كُلشي منها، هي الي تكرهني هالگد ممكن تحب شي راجع الي؟!

بقيت كاعده بالكاع وحاضنه ابني الي وهي انسحبت من الغرفة بهدوء بس عيونها تنطق حقد وغيض وكره ..

بقيت ب النص سَـآعــهْْ على گعدتي احس الهبطة موتت حيلي، حيلي كله باد .. سوسن من شافتني تأخرت مانزلت اجتي صعدت وراي …

- ها ولج وين صرتي، تحجي وهي واكفه بالباب ولازمه اليده ..
- سوسن بعد مااعوفه وحده وانزل
- عگدت عاحبها، ليش شكو شصار!
- سولفتلها الي شفته .. گالت
- شوفي منگدر ناخذ غيبتها، احتمال اجت بس تشوفه ومجانت نيتها سوء! ،مع ذلك هم مااستبعد هالشي عنها صارلي سنين وياهه وكلشي اتوقع منها .. ع العموم انتِ ديربالج منا وجاي الحذر واجب
- اي هو هيج، انوب من تنزل وحده منه الثانية تبقى يمه وهكذا …
- تمام … يلا اني نازلة دخلت الكيكه بالفرن لتحترك

نزلت هي، واني بقيت بغرفتي، گمت حطيته ب سريره شايلته بأيد وحده والثانية بس اسم لازمته ..

مانزلت جوة بعد هي كملت الكيكه وجابتها وصعدت يمي .. وخلينا حبشكلاتنا وگعدنا ناكل ونضحك ونسولف ..

سوسن: تدرين شنو ناقصها هالكعده؟
-مخليه الحباية بحلگي اريد اكرز ورديت عليها: شنوو؟
- ناقصها نفتح فيلم حتى تكمل
-ييي والله ،زفرت بحسره: بس شوفت عينج رجلي المصون شلح الغرفة من كلشي ضلت بس هيكل

- سهلة نشيل تحضيرتنه ونروح غرفتي

وفعلا نقلنا لغرفة سوسن وادم جبنا ويانه .. فتحنا فيلم كوميدي خربنا ضحك دموعنا گامت تجري بدون منحس بيها.  كملنا لملمنا الهوسة، ورجعت الغرفتي وسوسن نزلت جوة ..