وأد القلوب

Part 18

"وأد القلوب "

بقلمي: ورده الخُزام

ودعتك لسان وگلب مبري العشگ والذمة
مادام مو نفس الحلم كلمن يروح لحلمة
ماشفت منك بس حزن
ينفتح شباج السجن
بس ما يفوت نسمة
انت الكتاب الحافظة ولليوم ما مفتهمة
ماريد يبقة بخاطري ولا اريد احس بذنبك
واتمنى اوصل مرحلة لا اكرهك ولا احبك

-مُهند العزاوي

★★★★★★★★★★★★★

بــــــــارت 1️⃣8️⃣

فتحت عيوني بالمستشفى ومخليلي اوكسجين ويمي عمر واحمد

- عمر شنو الي صار؟
- ها ولج صحيتي، عفيةة بنية بزون بسبع ارواح !
- سكتت مالي حيل ارد عليه، رجع حجالي الي صار بعد مافقدت الوعي ...

بعد ماشردوا هوه وشهد وخلوني يمها رأسا مخابرين على احمد، من طاب للغرفة لاگيها تضرب براسج بالحايط وانتِ فاقدة مخلصج من ايدها، طلع شايلج ويركض اني وشهد من شفناج هيج كلنا ماتت، شهد ضلت تصرخ وتبجي وراج واني واحمد ركضنا بيج لهنا...

- وشهد؟ احمددد شهد شلون عفتوها وحدها وياهه؟!!
- لتخافين بمجرد ماطفينا القرآن رجعت على وضعها.. اتصلت على امي تروح يمها

- زين .. لعد طلعني منا احمد تدري بيه مااتحمل ريحه المستشفى
- حتى لْـۆ حبيبتي اتحملي غير تصيرين زينه؟
-مابيه شي زينه والله
تجاهلني ودز عمر يسأل الدكتور..

شوي واجه عمر

- يلا خلونا نطلع ،الدكتور كال ماعدها شي تگدرون تطلعوها

اجاني احمد دنگ عليه بأيد وحده رفعني وشالني
- احمد مابيه شي اگدر امشي والله
- لا يابة تدلل اميرتي
ضحكت وضميت راسي بصدره

راد يطلع بينا لبيتنا ماقبلت كتله وديني لبيت نغم بالي يم شهد

طلع لبيت نغم .. بس وصلنا تلگتنا شهد تبجي وتشبك بيه

-لج والله گلبي وكف عليج، گلت خلص موتتج
-حجيت ملطفة الجو  وارفعلها حاجبي .. اييي كلش واضح لعد منو الي خلاني يمها وطفر!

ضحكت وتمسح بدموعها وتگولي: شسوي بذاك الوقت الروح عزيزه

دخلنا جوة، بس شافتني نغم اشرتلي اجي يمها ودموعها تجري

ترددت اروح صح هي هسه متأذي بس مو بيدي بعد الي سوته بيه كمت اخااف منها، احمد هزلي راسه بمعنى روحي ..

رحتلها واني ميتة خوف وبنفس الوقت گلبي يوجعني عليها حالتها صارت صعبة حييل.
عصرت ايدي حييل وتهزلي راسها بمعنى شلون صرتي؟

-زينة عمري

ضلت تحاول تحجي وياي بس ماافتهم شنو تريد .. كالت ماما

- يلا تعالوا نطلع خلوها ترتاح ..

گمت من يمها غطيتها وبست راسها وطلعنا ..