وأد القلوب

Part 32

"وأد القلوب"

بقلمي: ورده خُزام

★★★★★★★★★

بـــــــارت 3️⃣2️⃣

فزيت جسمي كله يأذيني ،رجلي مصبوبة، باوعت الكل يمي امي ابويه احمد عمر..  الوجوه حزينه  والاجساد مكتسيها السواد .

عمر اجاني يركض، اول سؤال سألته:

- مهيمن وووين؟؟ شهد وين مريم وينهممم
جاوبني مهيمن وينصي براسه يضم عيونه عني:
- شهد ومهيمن بالبيت بس .. حجاهه ونزل عيونه مني وامي طگتها بجيه
- صررخت ومريم؟ مريم ووووينهاااا
مسحت دموعها ماما وحجت: ماتت

عطت بعلو صوتي مامصدگة مريم الي قبل لحظات يمي راحت؟
- شدتحجين ماما شنو ماتتتتت، لا الله عليكم جيبوهااا ولج يووم ليش ماتت

گمت اصرخ واريد اكوم من السرير اجه عمر حضني وعيونه مدمعه
اباوعله اتوسله بعيوني: عفية عمرر تشاقوون مو؟
- لأسف جان نزف براسها وملحگو عليها

گمت ابجي ولامة رجليه لصدري اني منحوسه اي شخص يدخل حياتي ويقترب مني يمووت
كل شخص اتعلق بي واحبه لازم اخسره!

ضلو يمي ومبين التعب بوجوهم. وره وقت مر گتلهم
- اريد اطلع منا اختنكت
عمر: باجر نطلعج حالتج مامستقره
- هاهيه روحو اني ابقه وحدي

حجيت هيج ودرت وجهي نمت .. همه ضلوا بينهم يسولفون منو يبقى، اخر شي راحو وبقت بس نغم يمي.

اول ماطلعوا سألتها بس بروح باهته بهدوء وبرود: همام ماخابر؟
-هه خابر؟ همام صارلة 5 ايام ساكن حديقة المستشفى حتى مااكلج نايم لا گاعد ويحش جگاير كله مطبك

خلافنا وكلشي صار نسيته حسيت الدنيا بهاللحظة ماكو اقصر منها!
بلحظة تفقد انسان من حياتك ويصير غائب ..

- وينه هسه؟

گامت باوعت من الشباك: ماكو، هسه اخابره

خابرته بشرته اني صحيت ماصدكها انطتنياه بس خليته على اذني اجاني صوت البجي مالته
گمت ابجي على بجيه، انوب گمت اسكت بي وهو يشهك ...

سده وگال اني جاي

انطيته لنغم كتلها: حـ يجي

گعدت نغم تحجيلي ع الحادث وشلون بقيت 5 ايام فاقده الوعي كل ضني اليوم الحادث!
انوب حجتلي على حالة همام ويتعارك وي الدكتور خاصه من واكف گلبي ربع ساعه متخبل تخببل لحد ماراجع النبض بيه ..

اخر شي طردتها من الغرفة ترستني سلبية فوك سلبيتي ..

دتطلع ودك تليفونها همام
سألته شنو
گالت: ديسأل خاف اكو احد بالغرفة

ثواني وطبوا هو وامه، امه اجت سلمت عليه وباستني براسي
المرة لسانها حلوو تاكلك بالسلام تبوس بيه وتكولي:
- سلامتج بنيتي متشوفين شر العدوج حبيبة
-اشكرج خالة شجابج مناك لهنا
- كلشي لخاطر عيونج اسوي