وأد القلوب

Part 27

"وأد القلوب "
بقلمي: ورده خُزام

مو هسّه حَتحس بنقص
باچر يفر بيك الزمن
واخذ الثار براحتي
يل علمتني على السهر
باچر ترد متعوب الي
(وماتلگه مثل ولايتي) ...

★★★★★★★★★★★

بــــــــــارت 2️⃣7️⃣

عفوا ممكن سؤال؟
- حجه وهو صافن: تفضلي
- اني وين شايفتك؟ وجهك مألووف بالنسبه الي بس مدا اذكر!

ابتسم وگال: تذكرين من ركض وراكم الجلب بالليل؟

عگدت حاجبي استرجع بسرعه  اجه ابالي الولد الي وصلنا بليلتها: انت ابو السيارة الي وصلنا صح!!

-بالضبط
باوعت حسام جابها واجه رجعت التفتتله: فدوة اريد اختي منك احنه بعد ما يأسنا من حالتها يلا جبناهه
- لتهتمين ان شاء الله اسوي كل الي يطلع بأيدي

اجه يمنا حسام ووياه نغم، سلم على الولد وتعارفوا بعدها اخذنا للغرفة الي مخصصة الها ..

بقينا اني وحسام ننتظر وهو صاح ممرضة تاخذ نغم وراح هو وراها ..

ورة نص ساعة دخلنالهه جانت حالتها مستقرة ومخليلها اوكسجين، ضلينا لليل بالمستشفى تحاليل وفحوصات وجيب وودي، ل 11 بالليل يلا كملنا ومن باجر يبلشون وياهه علاج كيمياوي.

تعبنا كلش ونغم ازيد بعد، بس حالتها من ناحية الخنكة الي جانت عدها خفت ،وخطية الولد ويانة ويانة ابد معافنة ل 12 حسام تشكر منه وكاله احنه تعبنا نروح فندق نحجز حتى انام ونرتاح ومن الصبح احنه يمك ..

سأل هو: عدكم مكان معين حاجزين بي لو توكم تروحون؟
حسام: لا والله لسه .. احنه الصبح بوجهنا اجينا لهنا، بس مو فد معضلة الفنادق موجوده هسه نحجز
- لا مادام ماحاجزين تعالوا للفندق مالتي
اعترض حسام مقبل گاله كلفناك هواي .. هاي الفنادق ونحجز لتشيل هم، بس هو اصرر گاله ابدد!

اخذنه بسيارته وحسام خله سيارته يم المستشفى .. صعد حسام ليگدام يمه واني ونغم ليوا الي استقر تنفسها بس مع ذلك مااستغنت عن الاوكسجين اخذناه ويانه للفندق للطوارئ.

بس صعدنا تجيت راسي ع الجامة ميتة تعب بس اريد الگة مخده حتى احط راسذ وانام ..

فاتح الجامات والهوى يضرب بالوجه يجنن، گمت اباوع للشوارع والهوى يلعب بشعري، لا ارادي صدت عيني ع المرايا شفته صافن بيه، انتبهت مشتغلة اغنية شمسين بالسيارة .. ماانتبهت شوكت شغلها مجان بالي يمهم رجعت اباوع من الجامة متجاهلة نظراته الي، شگد صلف هذا؟ كدام حسام ولا مهتم يباوع .

وصلنا للفندق مالته اخذنه غرفتين وحدة لنغم وزوجها ووحدة الي.  اخذت مفتاح غرفتي وعفتهم يمه يتشكروه ..

فتحتها وگبل نمت جفي حتى مابدلت ملابسي .. لهنااااك وجان تجيني رفل تعاتبني تگولي: ليش هيج ناز نسيتيني؟
هيج يمي ومتجين تزوريني!
تعاي ناز مشتاقتلج، ليش هيج گطعتي بيه وانتي تدرين كل الزين مالي احد غيرج منو يسأل عني.