وأد القلوب

Part 30

"وأد القلوب "

بقلمي: ورده خُزام

لتلومني انتَ السبب
والصار كله من ايدك
وياك واصل مرحله
احتاجك و ماريدك.

★★★★★★★★★★

بـــــــــارت 3️⃣0️⃣

طلع مهيمن يركض وكلنا وراه والصدمه لسه بينا، شغل السيارة گوة لحكنا صعدنا وياه يسوق وهو بغير عالم لسه مصدوم مرتين راد يسوي حادث تالي بابا عاط بي نزله وهو صعد يسوق بمكانه ..

راح صعد بمكان بابا ودنك راسه ايديه وبلش ينحب ويبجي، ما چنا بحالة نواسي كلنا دخلنا بخبر لا ع البال ولا ع الخاطر .. ماما الي خلصتها بس تدك وتلطم واني بس دموعي تصب سكته.

وصلنا لبيت عمي جسمي قشعر من شفت التابوت مخلينه بنص الاستقبال وعمي گاعد ع التابوت ويصرخ مثل النسوان والناس ملتمه داير مدايره تواسي بي

وامها الي املخه نفسها لا مخليه ثوب ماشاكته لا شعر ماكافشته ..

مهيمن راح للتابوت ويصيح بالناس
-كلكممم وخروو وخرووو

راح گعد يم التابوت: ها نور هو هذا  الوعد؟
مو دنحضر لعرسنا مو گتيلي منتظره هاليوم على احر من الجمررر
مو وعديتيني تبقين وياي لحد منشيب سوه؟
حاجيني شلووون تعوفيني شلووون؟!!!
كاعد يم التابوت ويحاجيها انوب گام يدك ع التابوت ويصرخ بعلو صوته بأسمها

صرخ لحدما صوته راح واحنه يمه نبجي ع حاله بعده ما لحگ يتهنى بيها ،حالته تكسر الگلب، تعب من الحجي خله راسه ع التابوت وصار يوون
الناس اجت تريد تشيل التابوت وهو ميقبل يهده نايم فوكه

نزل بابا لمستواه وگعد يقنع بيه ويهدي ،اخذه لحضنه يواسيه واشرلهم يشيلوه ..

اخذوا التابوت وطلعوا واهلها يكسرون الكلب حالتهم،
بابا اخذ مهيمن وطلع وراهم واحنه اني وماما استلمنا الفاتحه ..

بعد ما سألنا على سبب وفاتها المفاجئ اتضح وره خطوبتها بفتره قصيره مكتشفه عدها سرطان وبمراحلها الاخيره!
ومن رايدين اهلها يفاتحون مهيمن بهالشي هي مقابله ومذممه عليهم ميحجوله لحد ماتموت ..
مرايده تگضي اخر ايامها بالمستشفيات
ومرادت مهيمن يعيش وياهه هالمعاناة ..

خلصنا ايام الفاتحه يم بيت عمي ومهيمن بعد ماشفته ابد، ومن اسأل يكولولي لسه بالنجف يم گبرها 
3 ايام نتصل عليه ماكو، لحدما كفينا الفاتحه وراحو وراه احمد وعمر ..

گتلهم اروح وياكم ماقبلوا خاصه ماما تخاف عليه لان بالفاتحه مرتين وكعت وتخربطت، طول ايام الفاتحه اني الاكل مطاب لبطني، لسه ممستوعبه نور الي چنها ورده مفتحه هيج بلمح البصر تموت!!
لو مهيمن الي طاير بيها ويحبها تالي انسحبت من اديه بكل سهوله ..

بتواسيل قبلت ماما اروح وياهم ..

طلعنا للنجف، وصلنا گبرها واحس عيوني غوشت من الدموع على حال مهيمن حالته حالة وغافي ع القبر