حق المظلوم²

رياض

شن تعرفوا على الولد الصغير؟؟

•مدلع امه وبوه...

•جي في الأخير والبو والأم معش عندهم جهد يربوه..

•مش مربي ولسانه طويل!

انا رياض ... رياض جمعه إسماعيل  .. ولد عملاق الاقتصاد ... رغم انه يحاول يخفي الوضع .. بس شركاءه فاضحينه... علاش يخفي؟ .. باش ميطمعوش فيه...

مواليدي  ..

انا مولود في عام 1990 .. في شهر 9 يوم 9 اي تاريخ مميز اصلا انا منور من صغري هه..

اولاً بوي تزوج على ال 19 ... وماشاء الله تزوج ثلاته!.
الأولى لما عمره 19
الثانيه لما خش في ال 22
والثالته اللي هي امي لما عمره 36سنه..

مرته الأولى وريده .. هادي عكس اسمها تشوفها تقول شوكه مش وريده هه .. بتتحملوا تنمري اصلا ربي بيسخطني من هزوتي.. ربي يهديني..

المهم هادي تشبح لعيونها تخش في حاله نفسيه واضطرابات وهنا انا دعمت بوي في الزواج ... مسكين خش ع شوك من اولها ...

هه على ساس كنت مولود وقتها ...
مزال امي منجابتش امضني... لالا مش لهدرجه نكذب هلبا انا راه..

هادي بوي تزوجها لما عمرها 16 اييي قاصره بوي يتزوج في قاصرات .. تي حتى هو قاصر وقتها هههه حي عليا يسمعني لما يخليلي ايامي سود ... المهم تحملوني نحب نهدرز هلبا ...

ماشاء الله لا قوه بالله مزال مصكروش سنه متزوجين جابوا خوي المهدي ...

اسمه استغفر الله هادي وريده حاكمه في بوي وقتها خخخخخخخ

نبصر يفنص فيها يغمى عليها هي... بوي ربي يهديه ذوقه زفت..

خوي المهدي مرته سميه ..

بنته الكبيره وريده هادي ولادها وبناتها قريب من عمري ولا أقل بشوي ..

وبعدها ام السعد

وبعد ام السعد وسام ..

وبعد وسام  جمال

وبعد جمال امل وامال ..

بعده اختي حليمه سماها على حناي اللي مشفتهاش الله يرحمها ..

حليمه بنتها الكبيره اكبر مني ب سبعه سنين دانيه.. وقفت فتره وبعدها جابت حسني أصغر مني ب سنه

وبعد حسني مهند وبعد مهند محور الكون سندس..

بعد اختي حليمه خوي الطاهر .. طاهر؟؟... سادني تنمر..

بوي ميعرفش يختار الأسماء..

المهم الطاهر مرته زبيده ..