الليله هادي كانت طويله على رياض اللي قعد يأنب في روحه على طريقة كلامه مع تسنيم..
وقداش ما يتحشم كل ما يتفكر كيف كان يتكلم.
مش من عوايده يتلكمس ومعش يعرف شن يقول ..
قعد يتقلب في سريره لين ناض طلع من الحوش..
وقف في الجنان وهو مضايق..
تجاهل زيد اللي كان يكلم بالنقال وفي ايده طرف دخان..
قعد واقف يشوف للفراغ ويراجع في أفكاره..
شم ريحة الدخان قربت منه ..
وشاف لمصدرها..
زيد: غريبه ساهر لتوا.. وراك خدمه غدوا.
رياض: اي صدقت يا ولد خوي .. اللي معاشه بينقطع..
رياض جبد كرسي وقعمز...
زيد قام حاجبه وهو مضايق..
رياض وزع عيونه على الجردينه متع الحوش .. اللي كانت واسعه هلبا .. وبين كل جزء والآخر تلقى مظله وطاوله وكراسي.. او كراسي بطاولات صغار..
رياض: قررت واخيرا نتمرد..
زيد نفخ الدخان وابتسم بهزوه: على من؟
رياض: قوانين بوي اللي معش تنفع بنظري..
زيد: اووه .. اما قوانين بالضبط..
رياض: اول حاجه طفي اللي في فمك خير ما نبلعهلك عمك قدامك..
زيد قام حاجبه .. استغرب .. اول مره رياض يتكلمله على الدخان..
مكانش يحسابه يتحسس..
ولأول مره زيد يتنازل على مبادءه ويرمي طرف الدخان اللي قريب يكمل..
رياض: تاني حاجه بننهي الأختلاط اللي صاير في العيله..
زيد: يا سبحان الله ... وخيرك بعد خطرها قررت هالقرار..
رياض: توا كيف ردلي عقلي .. وعادي الإنسان يعدل أخطائه.. غلط خلطكم .. عاجبك وضع جمال انت وعيونه الزايغات؟
زيد: كمل باه..
رياض: ثالت حاجه بنوقف عليكم الفلوس .. اللي يبي الفلوس يجي يخدم تحتي وعلى قد خدمته ياخد ... اما واحد مخنوق والتاني باله في الحلوه ذا كان زمان..
زيد قعد ساكت معلقش.. تمنى انه مجاش ولا قرب عمه بكل..
رياض: تبوا فلوس بالبلوشي قعمز في الحوش وراجي جدك وبوك يموتوا وكول ورتثك وروح من عليا!
