استغفر الله العظيم واتوب إليه
.
.
.
.
.
رياض كان غاطس في الخدمه .. كذب نفس الملف يعاود فيه ليه ساعه لأنه رقد ساعه بس قبل ما يجي..
خش عليه واحد من اللي يخدموا..
رياض شافله: خير شن صاير؟
....: في مرا برا وبنت ليهم ساعه يراجوا يبوا يشوفوك حاولنا نلزوهم لكن مبوش..
رياض قرن حواجبه: مقالتلكش شكون! ..
......: مبتش تقول .. تبي تشوفك..
رياض: دخلها ترا .. اصلا اليوم من لما نضت وانا حاس ان في شيء بيصير ..
دقيقه وخشت مرا في الأربعينات ووراها بنت لما تشوفها تعطيها في عمر ال 18 او ال 19..
رياض: تفضلي قعمزي يا اختي ..
المراه شافتله وهي قايمه حاجبها وقعمزت واشرت ل بنتها اللي كانت تشوف للنقال اللي في ايدها ب ملل او هي موضحه هكي.. باش تقعمز..
وبعد قعمزوا..
رياض: كيف نقدر نساعدك!
ام السعد: انا ام السعد المهدي .. جايه من الجنوب..
رياض: اي؟؟
ام السعد: من الاخير انا طليقة بوك .. ونبي نتزوج خود اختك عندك..
رياض قعد فتره باش يستوعب .. اختك!
مش قاللكم حاط احتمال كبير ان بوي متزوج الرابعه!
بس شن طيره للجنوب!
بس مينكرش مرت بوه كانت سمره وعيونها خضر ولا زرق مفهمهمش..
اي اي تقبل انها مرت بوه..
ام السعد: تزوجنا في سنة ال 96 واطلقنا في ال 2010 واختك قعدت معاي الفتره هادي كلها .. صح بوك مقصرش في المصروف بس بدوا يطلعوا عليها في هلبا كلام وعليا حتى انا .. بوي بيزوجني .. ومستحيل نخلي بنتي عند بوي .. عفست على قلبي وبنحطها عند بوها..
