....
بعد ما وصلوا قدام حوش الحاج جمعه ..
خش رياض وخشوا وراه علاء وأيمن..
لقوا جمعه مقعمز في الصاله اللي كانت قريبه من باب الحوش الرئيسي..
جمعه: اي كيف حالكم يا ولاد؟
ايمن: الحمدلله يا عمي وانت شن حالك وحال صحتك.
علاء قطع عليهم: انا بنخش في الموضوع طول.
جمعه شافله: خش هي.
علاء: المفروض كلمتني انا يا عمي مش تمشي ل محمد وخوته وتحطهم في موقف بايخ..
جمعه فهم ان علاء طارتله ..
بس بيدور لا؟
هو يعتبر فيه زي رياض وزي ولده .. ويبيه يخدم معاه ..
وعنده هلبا مخططات اخرات.. يتمحوروا حول علاء ..
جمعه: انا درت اللي نشوف فيه صح ..
رياض: تحسابه بيتحشم من محمد وخوته وبيجي بيخدم عندك؟
جمعه ابتسم بخفه: وهو هكي صارله اصلا..
علاء خلى روحه بارد..
ايمن: شن بتستفاد لما بتخدمه عندك انت يا عمي؟
رياض فنص في أيمن..
جمعه: زي ما مستفاد انت ودرت صيور لروحك من وراء ولاد عمك .. شن تحسابوا شهادة الهندسه تنفع.. وين بتخدموا مفيش وين تخدموا الا عندي انا أو عند محمد وخوته..
رياض قعد فاتح فمه بصدمه ..
ايمن: يعني انت أجبرت ولدك يخش للهندسة باش ميطلعش من رزقك؟
جمعه: ايوا هاده اللي يفهم فيا..
ايمن: باهي كويس ..
علاء: شن تبي انت يا عمي من الاخير ترا قولي..
جمعه: انا يا علاء نبيك جنب رياض ومتسيباش .. نبيكم ديما مع بعضكم ..
علاء: واحني ديما مع بعض اصلا !
ايمن: خيرك متفهمش انت؟ .. الراجل مدايرك ولده غر ميعرفش يعبر على مشاعره..
جمعه ضحك: اهوا قالهالكم..
ايمن: نفهم فيك ع الطاير انا ..
جمعه: بتخدم معاي وبتفوت الكليه والتدريس فيها..
علاء: وانا منحبش من يقولي دير وحط .. احتراماً ليك و ل محمد بنكمل في المشروع ومعش بندخل في شيء ..
رياض قعد ساكت وطايرتله من بوه..
جمعه: وانا بنوقف المشروع مداما هكي بيصير..
