اللهم صل وسلم وبارك على سيدنا محمد وعلى آله وصحبه أجمعين
ايمن: الإنسان ربي بيمتحنه باش يشوف قوة إيمانه.. وانتي من المحظوظين اللي ربي امتحنك ب سمعك .. اي عضو ينفقد منك تاخديه في الجنه.. عندك علم بيها هادي؟؟
هبه دموعها بدوا ينزلوا وقعدت تمسح فيهم..
ايمن: عارف مفيش حد حاس بيك .. يضغطوا عليك ولما تطلعي في مناسبه وتلبسي السماعه كلهم يا يشوفولك ب شفقه يا يشوفولك بهزوه يا يتهربوا منك وكأن فيك مرض معدي .. وبرضو ساكته وتخشي لدارك وتبكي.. عارف ان خوتك يغصبوا فيك على انك تمشي لموعدك في المستشفى ويغصبوا عليك انك تلبسي السماعه وان مفيش حد فاهم علاش انتي متبيش تلبسيها ..
هبه ولأول مره .. تبي ايمن يزيد يتكلم معاها اكثر.. ومبتش تقاطعه..
وهو من سكاتها لولا صوت نفسها راهو قال إنها صكرت.. لذلك كمل يتكلم..
ايمن: ضعفك . نشوف فيه قوه . اللي معتبرتيه نقصك .. نشوف فيه كمال .. انتي حاربتي سنين وتحملتي.. ارضي بقدرك وكملي حربك.. البسي سماعتك شن المشكله! .. راك كبرتي يا هب هب .. فكري في مصلحتك .. البسيها بالعكس تزيد تحلي فيك .. خلي اللي بيشبحلك بنظره خاطيه لربك .. تو يعرف ب شن يجازيه ربي .. تجاهلي كل شيء .. ركزي على روحك ... امك بوك خوتك خواتك والناس اللي يحبوك .. وطبعاً امضني تركزي فيا حتى انا ..
قال آخر جمله بخبث..
هبه رشفت خشمها: باهي تعرف علاش وذني صارلها هكي!
ايمن قرن حواجبه: لا ..
هبه تنهدت: زمان لما كنت في سادسه ابتدائي .. كان في بنت تتنمر عليا .. وانا كنت ساكته .. مره انفجرت فيها وضربتني.. واخر شيء دفتني وجيت طايحه بقوه على وذني .. بدت وذني تنزف .. ألم راسي والصداع اللي حسيت بيه هداك اليوم قاعد محفور داخلي ومستحيل ننساه.. الناس اللي مش عارفين قصتي بيقولوا عليا اني نبالغ في ردة فعلي .. لكن انا محروقه يا أيمن.. وواجعتني روحي .. بسبب وحده مختله عقلياً قعدت هكي عايشه في صداع وصراع ..
ايمن قعد ساكت بصدمه ومعش عرف يتكلم ..
هبه: صح كنت غبيه وقاعده غبيه بتصرفاتي واني كارهه السماعه .. بس انقهرت .. وهلبا .. علاش دارت فيا هكي .. علاش الناس هكي .. علاش حقدهم يعمي فيهم!
هبه كملت كلامها: كل ما نشوف السماعه او نحس بيها في وذني نذكر في الموقف والطيحه والمأساه اللي صارتلي هذاكا اليوم..
