حق المظلوم²

*39

صهيب كان يجري في الجردينه ووراه سمر بعصاة المكنسه..

معمراش في حياته شاف اخته الصغيره الكيوت اللي يقولولها سوسو كتكوتي هكي..

فتح باب الشارع وطلع حفيان بحوايج الحوش..

وطارت هيبة الدكتور الموقر اللي يدير في عمليات كبيره مع الريح..

لأن الدنيا قرب مغرب وك اي شارع ليبي كانوا الجيران كلهم برا..

بس كمل هروبه ومشي لحوش عمه بيبات غادي.. وبالك ياخد من مالك ولد عمه حوايج ويهرب للمستشفى..

طبعا بيهرب من سمر مع عصاة المكنسه لأنها مره حرفيا مكسرتها على راس مالك و فرج ولاد عمه علاش لأنهم تنمروا على خطيبها حب حياتها..

وطبعا راسه ومعلوماته الطبيه اللي ريح خمسطاش سنه من حياته عليهم مش حايفرط فيهم بضربه من اخته الصغيره سوسو كتكوتّه

ومش تكسيره وحده لا .. ضروري العصاه تنقسم على ثلاته كمهاده متشفيش غليلها .. وسلامتك في عضامك..

علاش مسكين شن دار؟؟

كلي طاجين البسبوسه اللي سوسو مدايراته لخطيبها وحب حياتها .. عقب نصه وهي مصوراته لخطيبها وتتجكتر بيه عليه..

قعد مع ولاد عمه اللي بدوا يتنمروا عليه هو..

وفي واحد منهم صوره فيديو وهو داهش ..
علاش؟؟

تهديد طبعا وحاياخد فلوس على خاطر يحذفه..

اي هاده فرج اللي عمره 26 سنه وأمه ادورله في وحده باش تجوزه

وهو نصاب ويبتز في الناس وفلوسه كلهم حرام ..

وشكراً لي صهيب اللي ورانا اسوء ما في عيلته ل الآن ..

صهيب الدكتور الموقر .. حفيد القاضي رجب ولد ولده الكبير عبدالسلام مدعي عام كبير .. ميلتقاش في الحوش .. ليل صبح عشيه تلقوه برا ..

عمامه يا محاميين يا مستشارين ..

عائله قانونيه ب امتياز .. كان حايكون قانوني لكن بعد هلبا مشاكل سافر وقري طب زي ما يبي .. وطبعا جده بعد حرج فتره رضي بالواقع وحب شغل حفيده ..

بعد تطرف صهيب استقوا بيه ولاد عمه وفي اللي خش طب زيه وفي اللي خش هندسه ..

ولاد عمه القانونيين كان يشوف فيهم اكبر قوقعة فساد .. بجديات .. اللي يبتز واللي يتنمر واللي يرشي عارف لما بيسمع جده بيرصهم في الحبس ..

بس ابهاتهم كانوا يستروا عليهم هلبا ..

قانون مهم في عيلتهم.. اكبر ولد من كل ولد لازم يخش قانون ..