لا إله إلا الله وحده لاشريك له له الملك وله الحمد وهو على كل شيء قدير
علاء كان ماشي جاي في الجردينه وصوابع يديه قريب بينكسروا من الضغط ..
اعصابه واضح انهم راقيات..
تفوت من بحداه احتمال يضربك ..
سليمان كان مقعمز ويشوفله ممكن ليه ساعه وهو يراقب في خوه اللي واضح من شكله انه بيطلع من عقله ..
علاء قرب منه: خطيبها قالي ..
سليمان انصدم: خطيب شن .. على من تتكلم..
علاء جبد كرسي وقعمز وقعد يهز في رجله: شفت فرخ طالع من حوش عمي بشير .. ياريتني ما مشيت شريتها الخبزه متع امك هاادي..
سليمان: غر هديلي أعصابك يا راجل.. شن صاير فيك ما عمرك قعدت هكي!..
علاء تنهد: سندس انخطبت يا سليمان..
سليمان انصدم وقعد يشوف ل خوه..
علاء: وخطيبها توا كان يشوف فيها .. كاين عندهم .. انا ياريتني ما سألت ولا عرفت ..
سليمان: يعني حظراتك لأنها انخطبت..
علاء شاف لخوه: وين نندري انا .. واقسم برب العزه راسي بيتفجر واعصابي مش عارف وين بنحطهم.. وعلاش حاظرتني باهي.. تقولي منبيكش .. والله ماني طالقها لين تقولهالي في وجهي منبيكش .. وحتى كان قالتها مش طالقها ..
سليمان قعد يشوف ل خوه وهو ساكت ..
شن بيقوله؟؟
بيقوله البنت فاتاتك ومشت لغيرك .. بيجي الانفجار فيه..
بيقوله سيب البنت في حالها .. بيلقى روحه ميت من عصبية خوه اللي الواضح كان مخشش رقد حا يقتل ..
علاء شافله: اكيده غاصبينها؟ .. مفهمتش .. راسي مباش يستوعب .. زعما مزال متمتش الخطبه .. بالك متعجباشي .. ولا هو ميعجبهاش .. نمشي لحسني نقوله انا نبيها؟؟
سليمان عيونه توسعوا: خيرر؟؟ اهدى يا ولد خير بلاك .. ما عمري شفتك هكي يا علاء خيرك بدير الخياب انت؟؟ .. شن بتمشيله واصلا اكيده شك فيكم بعد سؤالك على خطيبها .. بعدك حسني في كل شيء يشك ..
علاء رد شعره للوراء بعصبيه وسكت..
سليمان: قول ل أمي تمشي تقصقص...
علاء: وينها هي..
سليمان: شن توا بتمشي للناس في الليل؟؟ .. قعمز واسكت..
