التناقض؟
كل انسان حاتجيه فتره وحايتناقض..
دقيقه يحب الحاجه.. والدقيقه اللي بعدها يكرهها..
ومرات من داخله يبيها بس من برا يكابر .. ويخلي التناقض هو اللي صاير ...
وعلاء كان أكبر متناقض ..
يحب خوه و يكرهه
يحبه لدرجة يرمي روحه قدام الرصاص كذرع ليه..
ويكرهه لدرجة انه خاطره يرميه بالرصاص..
طلع علاء من داره لما سمع امه اللي تتكلم بصوت عالي..
لقاها لابسه عبايتها وتتكلم مع سليمان
مفهمش شن يتكلموا..
بس سأل امه ..
علاء: وين بتمشي؟؟
عائشه: بنمشي لحوش عمك بشير .. سندس مريضه..
علاء: مريضه .. كيف مريضه؟
سليمان عدل تقعميزته وقعد يشوف ل علاء..
عائشه: قالتلي حليمه ناضت الفجر مغمومه ومعش قدرت تتنفس .. لين اغمى عليها ورفعوها للمستشفى .. وهاده يصيرلها لما ترعش من حاجه.. شكلها مكوبسه بشيء..
سليمان: بنات توا مدلعات هلبا يما..
علاء شاف ل سليمان ورد شاف لأمه..
معرفش كيف يعبر على اللي يحس بيه داخله ..
عائشه طلعت وسقدها سليمان ..
اما علاء ..
قعمز في الجردينه وقعد يفكر..
.
.
.
.
.
مفتاح: كيف مزلتي مرديتيش عليهم .. تي ارفضيهم خيرك انتي!
نجاة: تبي بنتك تعنس شكلك
مفتاح: تعنس ولا ياخدوها عيت علي
خليل: علاش رافضه الولد انت .. دامك سمعت ان بنتك تبيه؟
مفتاح شاف ل خليل..
