كانوا مقعمزين الأربعه مع بعض ويأرقلوا...
ساكتين مفيش حد يتكلم لين قطع الهدوء هاده ايمن..
ايمن: اسرع طريقه باش نطلق اختي من راجلها..
علاء نط فيه: انت خير فيتك تبي تخرب لخواتك حياشهم!!..
ايمن: بناخد تقوى معاي لحوش خوالي .. الكلب احمد حلف قال مفيش مشي.. وبعد يطلقوا نقدر ناخدها ..
رياض: هاده علاش مفكرتش اناسبك..
ايمن قام حاجبه: غايته نعطي لكلب زيك وحده من خواتي!!
رياض تنرفز: صح .. مقامي أعلى من ان اناسبك اصلا!
ايمن ضحك بهزوه..
هو رياض يلقح .. يلقح ل صهيب.. اللي هرب عيونه وطاحوا على عيون علاء اللي شاد ضحكته..
رياض: اختك تبيلها دكتور انت .. ميروحش للحوش بكل .. وتقعد عندكم مكأنهاش متزوجه..
ايمن ضيق عيونه: شن تقصد؟؟
رياض: مثلا كان صهيب خطب اختك اللي قاعده في الحوش بتوافق؟
ايمن: اسمع رياض انوض نضربك راه شن دخلك تجيب في سيرة اختي .. وبعدين هادي مفيش زواج .. اخر وحده بنخليها عانس في الحوش عندك عندي حاجه ..
علاء قعد يراجي في مصيبه بتصير..
رياض غبي .. لالا خبيث .. ايمن ذكي .. بيفهم ان صهيب حاط عينه على هنادي.. وعاد الفتنه بدت تخدم..
ايمن: واللي حاط عينه عليها .. بنفقعهله .. سمعت ولا يا صهيب غيّر سكتك..
صهيب دار روحه لاهي في النقال وميسمعش فيهم ..
رياض ابتسم بخبث: صهيب سمعت شن قال ايمن؟ .. اخخخخ متحمس بعد يعرفوا ولاد عمك انك حاط عينك على اختهم شن بيديروا .. وبذات بعد تخطط لتطليق خواتك منهم ..
علاء: غر خليها توافق هيا بعدين يصير خير..
ايمن: انتم خيركم معاي هكي .. علاش اديروا هكي ..
علاء: من لاخير معش تفاول بالطلاق مش باهي راهو .. وانتم ماشاء الله زواج اقارب الحكايه كلها .. اطلق احمد من اختك .. اخته معش تحلم بيها..
ايمن قلب عيونه..
رياض: يا ولاد مش هاده عمران فتح الله!
ايمن تلفت وين يشبح رياض وكذلك علاء وصهيب.
ايمن: هو والله..
علاء: واللي معاه خوته..
ايمن: تو يشبحنا يجي يسلم ..
