اللهم صل وسلم وبارك على سيدنا محمد
الحمدلله
الله اكبر
استغفر الله
لا إله إلا الله
سبحان الله وبحمده سبحان الله العظيم
.
.
.
.
.
.
تسنيم رسميا قعدت خطيبة رياض..
وكانت فرحانه .. بس الحزن كان طاغي..
اليتم صعب .. بدون ام او اب .. او حتى اخ .. اختها زي البرانيه ..
ولاحظت كيف رواسي مضايقه منها..
ممكن فرحتها كانت في انها بتعيش مع شخص بيشاركها حياته .. مش أشخاص كأنها عبئ عليهم..
وممكن فرحتها كانت في انها واخيرا بيقعد عندها شخص في حياتها .. شخص حايكون حياتها بعد ما ماتوا اللي كانوا سبب في حياتها...
اليتم واعر .. مفيش حد بيشاركك فرحتك لا .. في من بيفرحوا باش تمشي ويفتكوا منك..
اليتم واعر .. كلهم بيشوفولك ب إنحطاط!
رياض خساره فيها .. شن فيها ما ينشبح؟؟ حتى امها وبوها ميتين! .. وخوتها واحد محبوس والأخر هارب..
رياض يستحق وحده خير منها .. هادي الكأبه راكبتها حتى إبتسامتها بالسيف للناس..
رياض يستحق وحده عندها احساس مش كيف هادي اللي حتى ماتت امها ومات بوها منزلتش حتى دمعه عليهم..
وهلبا كلام انقال وبينقال..
تسنيم بعد ما دوشت لبست بدلة الصلاه وصلت العشي ..
وصلت ركعتين شكر لله..
في السجده الأخيره .. مقدرتش تقيم راسها .. وبذات لما حست بشعور قداش ليه مفارقها..
بينسى الإنسان كيف بيبكي؟؟
لا .. بدايته غمه حرقه غصه بعدين دموع يبدوا يتكونوا وينزلوا غصبا عليك..
