اللهم صل وسلم وبارك على سيدنا محمد ❤️🩹
ممكن حركته كانت حركه مش تمام.. وهي هكي اصلا ..
بس عنده عادي هو شاف بنت اخته وحب يسلم عليها لأن توحشها.. وآمس ملحقش يهدرز معاها الا نص ساعه وال نص ساعه شوي ولا!
اي وهو توا يشوف لتسنيم لأن بنت اخته عاطياته بالظهر..
مش مشكله اي ..
كمل طاسة القهوه ولأنها صغيره طلب وحده اخرى ..
خدي بالشوكه من البانكيك وحطه في فمه..
قام نقاله ولقي مكالمه من ايهم .. فاتها ..
ورد عيونه جيهة طاولة بنت اخته..
بس عيونه توسعوا لما لقي تسنيم تشبحله..
عليك موقف بايخ انحط فيه..
هي تسنيم كانت تتأكد هو ولالا..
ولما شافلها عرفاته!
بلع اللي في فمه وفاق من صدمته لما النادل حط القهوه وهو مضايق..
رياض شافله: وخيرك تحط فيها هكي!
النادل: انت تتشرط هلبا يا خوي ... كان مش عاجبينك برا ارض ربي واسعه .. وفي هلبا مقاهي غيرنا..
رياض قام حاجبه على كلام النادل..
و النادل قعد يشوفله وهو مضايق..
رياض ابتسم بخفه باش ميتعفلقش: حقك عليا يا خوي .. برا لخدمتك.. وجيبلي طاسة اميه بنتاعبك..
النادل: معندناش اميه ..
رياض: ناديلي مديرك ترا..
النادل سكت..
رياض: اها حقا .. انا مديرك..
النادل عيونه توسعوا..
رياض شرب من قهوته: انا رياض جمعه .. شن اسمك انت..
النادل قعد منصدم..
رياض: برا بالله عليك فوتني.. علاش متخلونيش نستجم!
النادل هز براسه ومشي بسرعه..
مسكين يحساب روحه ملزوز توا!
اما رياض رد شاف جيهة طاولة بنت اخته..
ولقي تسنيم مركزه مع كلام بنت اخته .. وتقريبا وحده اخرى مقعمزه .. واللي رجح انها رواسي..
رد على نقاله وهو متنرفز..
رياض: ها يا ايهم شن في!
ايهم: علاش متردش!
رياض: تي من انت باش تحاسبني!
