.
ممكن أكثر شخص قعد يبين في انه سعيد وهو من داخله نار .. هو فارس..
كان مقعمز وغصباً عليه على خاطر اخته نوضاته باش يقعمز يسايرها ويشرب معاها قهوه
اخت فارس مروه الصغيره كانت قريبه من بوها هلبا ومدلعها ع الاخر..
اللي تبيه تاخده .. وكذلك اللي اكبر منها ب سنتين واللي كانت فردوس ..
فردوس جميله وهلبا .. شعرها ذهبي وعيونها عسليات هلبا وكأنهم صفر .. خدت شكل امها ... تقرا صيدله ..
اما مروه ف كانت تشبه ل بوها .. عيونها قهويات وواسعات ومن كثر ما رموشها ثقيلات لين تقول على عيونها مكحلات.. فيها غمازتين ومخليات فارس يستلطفها! ..
غمازاتها بس راه .. مش لأنها اخته الصغيره ويحبها..
كانوا مقعمزين في الجردينه وفردوس تحكي ل فارس بكل برود على ولد يقرا معاها وصلت بيه المعاكسات لين يغمزلها!!
ومن كثر ما هي منصدمه من جرئة الولد..
خلت فارس يشد ضحكته .. هادي المعاكسه لطيفه عنده .. هو كان تسمعوا الكلام اللي يقول فيه ولا الشبحات لما تعجبه بنت ويعاكسها! ..
مروه: قصدي مكبره الموضوع راك يا فوفو.. خلاص فوتيه طبيعي بيكون عندك معجبين..
فارس تأفف: باهي خوكم انا مش حيط .. اصلا علاش نوضتيني يا همي انتي!
مروه: قلت مداما ماما ماشيه مع نساوين خوتي لعيت جيرانا معناها الحوش يقعد سلام ونهدرزوا مع بعض قداش لينا مهدرزناش..
فارس هز براسه وعدل تقعميزته..
وصب لروحه طاسة قهوه اخرى وبدأ يشرب فيها ويشارك في خواته في الهدرزه
بس هدرزتهم وقفت لما خشت امهم ووراها كناتها الزوز
في ناس يخشوا لحياتك باش يذموها وينتقدوها ويحاولوا يدمروها..
وفي اللي جزء من عيلتك .. هكي للأسف..
ام فارس مرا كبيره في العمر .. بس ميبانش عليها..
لسانها وكلامها وكرهها اللي اكثر من محبتها كانوا يخلوا الناس بدال ما يعطفوا عليها.. يجروا يهربوا منها..
وفارس كان واحد منهم..
عاش من صغره وهو في المشاكل.. تحمل تحمل لين مرارته انفقعت..
من عركاتها هي وعماته ... لعركاتها هي وحناه .. لعركاتها هي وسلفاتها.. لعركاتها هي والجيران.. وعركاتها هي واسلافها .. وتوا باديه في الكناين ومش عاجبينها..
