اللهم صل وسلم وبارك على سيدنا وحبيبنا محمد
تقوى كانت من الكساد لين مقعمزه وهي ساكته...
وهادي حاجه استغربها احمد اللي كان مقعمز جنبها ..
تحديداً يوتي في ملفات خدمته متع غدوا!
شاف جيهتها اكثر من مره وهي كانت تشوف للتلفزون بس عقلها مش فيه..
لما لاحظت انه يشبحلها شافتله..
احمد: خيرك؟
تقوى: شيء..
احمد صكر اللابتوب: صايرلك شيء.. قولي هي!
تقوى قعمزت بالجنب في الصالون وحطت راسها على المسند وقعدت تشوفله وهي ساكته.. اصلا مش عارفه شن تقول حتى..
احمد: متشغلينيش .. قولي شن صاير!
تقوى تنهدت: هكي مضايقه..
احمد قرن حواجبه: ومضايقه بدون سبب؟
تقوى: خيرك رايح قصقاص انت؟
احمد: من عاشر قوم أربعين يوم..
تقوى: قلتلك معش تهدرز مع أيمن هلبا انا!..
احمد ضحك بخفه..
تقوى ابتسمت: خيرك تضحك..
احمد: علاش؟ متبينيش نضحك؟
تقوى: اضحك يا قلبي .. اصلا مفيش احلى من ضحكتك بعد ضحكتي انا وأيمن طبعاً!
احمد: ملاحظه انك ادخلي في ايمن في كل شيء ..
تقوى: خيركم تغاروا منه خوي الغالي؟
احمد: انا نغار من ايمن؟ .. اضحكي انتي..
تقوى ربعت: باهي انا توا فكرت في حاجه ..
احمد حط اللابتوب على الطاوله وانتبه معاها..
تقوى: مثلا مثلا كان طلقتني توا شن بيصير..
احمد قعد يشوف لتقوى بصمت .. ويراجي فيها دير اي لقطه ادل على أنها تبصر ..
تقوى: خاطري نجربه شعور المطلقات .. طلقني ترا يا أحمد..
احمد فمه انفتح بصدمه.. معش عرف شن يتكلم..
تقوى: خيرك تشبحلي هكي؟ .. شن فيها باهي!!
احمد: انتي مهبوله .. وزدتي هبلتي.. وبتهبليني في جرتك!
تقوى قرنت حواجبها وضمتك يديها وهي متعفلقه: اصلا انت ديما هكي .. لما نطلب حاجه تبدا تتهرب ومتبيش اديرها .. معش بنطلب منك شيء.
