تسنيم مشت لحوش جدها وحناها مع عمها ومرته وصغاره..
شافت في عيونهم كل شيء..
شفقه .. تجنب .. كره .. حقد .. استصغار.. وتقزز
كل انسان داخله بيتأثر..
مهما حط ملامح غير مباليه من برا
قعدت مقعمزه تسمع في كلامهم .. ومتجاهلين وجودها بيناتهم..
مكأنهاش تعرفهم ولا يعرفوها..
وهاده كله يرجع لبعدها عليهم مده طويله .. متتلاقاش معاهم الا في الأعياد .. واخر سنين معش تلاقت معاهم من بعد عزي بوها..
وفي عزي امها .. جت وحده بس من نساوين عمامها ..
وحناها بس..
تنهدت بخفه .. وطلعت نقالها تشوف فيه..
ولأنها تحس بروحها مليهاش داعي عند حد..
قررت تبعت ل سندس رساله..
اكثر وحده معبرتها في الدنيا هادي..
وسندس ولأن النقال مينزلش من يدها ردت طول..
.
.
.
.
جهان لبست عبايتها وساوت وشاحها ..
قربت من ايهم نخصاته..
ايهم شافلها: خير جدك انتي؟
جهان: هيا مش بترفعني..
ايهم: لا..
جهان: ايهم عااد درتلك اللي تبيه ..
ايهم: شغلتك اصلا هادي .. هي بري انتلفي.
جهان دموعها تجمعوا: خزي عليك..
ومشت من بحداه ..
كمال: خيرها جهان؟
ايهم: منعلمش..
كمال لحقها: خيرك يا بنت..
جهان تبكي: الحيوان اهوا قلتله ارفعني لحوش عمتي .. قالي ديريلي غدي .. وحاجه حلوه ليا اربعه ساعات في الكوجينه كلي وكمل وقالي وتي روحك وبعد بنمشوا قالي مش راافعك..
