اللهم صل وسلم وبارك على سيدنا وحبيبنا محمد صلى الله عليه وآله وصحبه أجمعين.
صوت التدربيك كان عالي..
عالة الشاهي والحلويات ..
صوت الهدرزه المتداخله ومش هاتفهم شيء منها ..
اي هاده عرس ..
سندس كانت لابسه سروال واسع لونه اكحل ومعاه تيشرت نص كم أخضر جيشي دكنلها لون عيونها ..
رغم ان الجو صقع وهلبا بس من الجري اللي تجري فيه كانت بتطربق ..
عائشه: هاك مفتاح الحوش وبري تلقيه في الكوجينه في الدولاب اللي جنب الثلاجه..
سندس: بري انتي يا خالتي شن نمشي لحوشكم كان يخلعني واحد من ولادك
حليمه: بري يا سندس ضروري منه البراد ..
سندس: اصلا قلتلك متشريشي ضحكوا عليك فيه ها طول انفلق..
حليمه فنصت فيها: واقسم بربي نضربك توا! .. بري بسرعه مفيش حد في الشارع الولاد كلهم في الاستراحه..
سندس: كان نلقى سليمان ولا علاء مش مسامحتكم!
خدت المفتاح وهي متنرفزه لبست جاكة صوف وخدت بدلة الصلاه الكحله لبستها وطلعت وهي مترفزه وتعارك بصوت خفيف..
فتحت باب حوش الهادي وخشت..
سندس: وقداش ما واثقه فيا عويشه .. كان نسرقهم توا!.. هيهيهيي..
خشت بسرعه للكوجينه وقعدت ادور في البراد..
علاء كان في داره .. ويدخن زياده
سمع صوت في الحوش..
وقف بالشوي من على سريره طفى طرف الدخان وتحرك فتح الباب ..
علاء: امي؟
قدم جيهة الكوجينه..
سندس: ويين بنلقاه .. ما يطلع الا في دار الخزين.. حي عليا خالتي عويشه جاها الزهايمر!
شهقت بقوه لما تلفتت ولقت علاء في الباب واقف يشوفلها وهو قارن حواجبه..
سندس: بسم الله الرحمن الرحيم شن ادير اهني؟؟
علاء: السؤال ليك انتي المفروض..
سندس: اها .. يبوا براد .. وامك بعتتني باش نجيبه .." ابتسمت بثقه" باش تشوف قداش توثق فيا..
علاء: متفرحيش هلبا ثقتها هادي بتوصلك لمواصيل الكنه..
سندس رعشت: تحرك من مكانك بسم الله عليا
