سندس طلعت من الدار لما بوها نادى عليها..
قعمزت بحداهم وقعدت تسمع في الهدرزه وهي ساكته
بشير: خيرها بنيتي متنكده؟
سندس: خاطري ضايق ونبي نطلع..
حليمه: قلتلك بري لحوش خوالك انتي اللي مبتيش..
مهند: شن صاير حقا خيرك معش مشيتي غادي؟
حليمه: متعاركه هي وجهان ..
سندس: الحيوانه الكلبه هديكا .. معش صاحبتي..
حسني: احسن نقصي مشيك غادي سلم اختي ..
بشير قام حاجبه وشاف لحسني: وانت شن دخلك فيها؟
حسني: يا بوي غادي خلط هلبا ... وشوف كمية المفرخ غادي ... اصلا كل ما تبعتوا فيها غادي نقعد على اعصابي انا..
سندس: شن قصدك .. انا اصلا منقابلش فيهم ومنطلعش من حوش خالي اصلا..
حسني: وحوش خالك فيه أيوب وكمال وايهم ..
سندس: انت تعرفهم اكثر مني ميجوش لحوشهم اصلا..
بشير: انا جدك امبكري كلمني قالي بعد العشي تعالا رياض يبيكم كلكم..
حسني: منبيش نمشي انا.. بنتعارك مع فرخ جمال لأني..
بشير: نقولك جدك كلمني...
مكملش كلمته لأن نقال حسني رن.. ورد
سندس: هه يعرف على من يرد..
حسني شافلها وهو متعفلق: ها يا رياض..
رياض: بتجي ورجلك فوق راسك باهي ؟
حسني: اهوا مهند بيجي..
رياض: اي بتجوا انتم التنين ومعاكم بوكم.. وتي روحك نوض..
حسني: شن بدير بيا بالله..
رياض: مفاجأه..
حسني جي بيسب بس تفكر بوه: تم هي صكر..
وصكر النقال..
بشير: تعرف من تسمع..
مهند: سندس .. نمشوا لدانيا؟
حليمه: ووه توا؟
مهند: اي شن فيها .. تسهر هلبا هي اصلا..
بشير: عادي خليهم يمشوا يهدرزوا على وخيتهم شوي..
.
.
