سبحان الله وبحمده
سبحان الله العظيم
استغفر الله .. استغفر الله ..استغفر الله
اللهم صل وسلم وبارك على سيدنا وحبيبنا محمد .
هبه بعد اصرار كبير ضغطت على رقم ايمن واتصلت بيه..
المكالمه الأولى مردش.. تشجعت واتصلت مره تانيه ..
أيمن: توا لما بنرد بتصكري .. علاش تتصلي بكل..
هبه رعشت وجت بتصكر بس شدت روحها في الأخير..
ايمن: خيرك متصله؟
هبه: ب ..
ايمن قام حاجبه: خيرك مش قادره تتكلمي ..
هبه: ايمن انا اسفه منقصدش اللي قلته هداك اليوم غر انت حشمتني هلبا قدام حناي وطلع مني الكلام هكي .. ومنحسابكش بتاخد على خاطرك مني هكي..
ايمن ابتسم بس مباش يوضح انه فرح: لا .. بناخد على خاطري انا انسان في النهايه وعندي مشاعر..
هبه: باهي حقك عليا .. عارفه اللي قلته غلط .. وبذات قدام حناي..
ايمن: مش عارف نقدر نسامحك ولالا ..
هبه: تأسفت انا.. شن بندير تاني؟
ايمن: انا اسف منحبهاش .. نحب المواقف اكثر .. زي مثلا افتحي روشن دارك تو نجيك..
هبه تعفلقت: حقييير اصلا الحق فيا اللي كلمتك وتأسفت..
ايمن يضحك: والله نبصر واقسم بربي نبصر هي .. ومنعرفاش وين روشن دارك اصلا .. اصبري متصكريش يا هبه..
هبه: علااش ادير هكي ..
ايمن: لأنك غاليه عليا .. واللي نحبهم نحب نراعشهم..
هبه سكتت..
ايمن: توا مكالمتك هادي نفهم منها انك موافقه واخيرا على اللي بيصير بيني وبينك؟
هبه: مش حاتلعب بيا يا ايمن؟
ايمن: واحد عاشق فيك ليه ثلاته سنين بيلعب بيك؟ ..
هبه: منعرفش .. نبي نعرف انك مش حاتكسرني في الأخير..
ايمن ابتسم: عارفه يا هبه .. عيشي باش تعرفي .. هل بنكسرك او لا .. التجربه تعلمك .. وياودي منبيش نشكر روحي بس في قدامك هلبا مواقف يدلوا اني نرضى ننكسر انا .. ولا ينكسر اللي نحبه ..
هبه: عارفه .. بس مزلت نخاف منك ..
ايمن: انا هاده علاش منكدلك عيشتك ونبي يكون في تواصل بيني وبينك .. باش نخليك تعرفيني كويس .. وباش نكملوا حوشنا مع بعض..
