Black Heart [ အနက်ရောင်နှလုံးသား🖤] [ Completed]

Chapter 11: Black Heart🖤

🖤

အိပ်မက်လေးတစ်ခု။
အိပ်မက်ထဲမှာ သျှန်ဟာ နေရောင်ခြည်နွေးနွေးလေးအောက်က မွှေးရနံ့တွေခြုံလွှမ်းနေတဲ့ ခရမ်းနု​ရောင်ပန်းခင်းရဲ့အလယ်မှာ ရပ်လို့နေ၏။ နံဘေးနားက ခရမ်းနုရောင် Hyacinth တွေကတော့ သျှန့်အား သူတို့ရဲ့မွှေးရနံ့နဲ့ ရုန်းထွက်မရအောင်ပင် ချုပ်နှောင်ထားသကဲ့သို့။

သျှန် Hyacinth ပင်တွေအလယ်မှာပဲ ခန္ဓာကိုယ်ကိုလှည့်ပတ်ရင်း အံ့ဩစရာကောင်းနေတဲ့ပတ်ဝန်းကျင်ကို တဒင်္ဂမှင်သက်စွာ ငေးမောလို့နေမိ၏။ ထူးထူးခြားခြား စိတ်ခံစားချက်ကလည်း အလွန်ကောင်းမွန်နေပြီး သူ့နှလုံးသားလေးပင် နွေးထွေးလာသလိုမျိုး။ မျက်လုံးတွေကိုမှိတ်ပြီး မွှေးရနံ့သင်းသင်းတွေကို စိတ်လွတ်လက်လွတ်ခံစားကြည့်တဲ့အခါ သျှန့်ရဲ့ခန္ဓာကိုယ်တစ်ခုလုံးဟာ လွတ်လပ်ပေါ့ပါးလာသလိုခံစားရပြီး ဦးနှောက်တစ်ခုလုံးက လန်းဆန်းကြည်လင်လာသည်။

" ဟား~~ ခံစားချက်ကောင်းလေးပဲ "

သျှန် မနေနိုင်စွာပဲ နှုတ်ခမ်းဖျားကနေ တိုးတိုးလေးရေရွတ်မိကာ မျက်နှာကိုပင့်မော့ရင်း လက်တွေကိုဘေးဘက်သို့ဆန့်တန်းပြီးနောက် နောက်တစ်ကြိမ်အသက်ဝဝရှူသွင်းလိုက်မိတော့၏။

ဖြောက်~

ထိုစဥ် သူ့ရဲ့ပါးပေါ်သို့ ကျဆင်းလာတဲ့ အေးစက်စက်အထိအတွေ့။ သျှန် မျက်လုံးတွေကိုဖွင့်မကြည့်ဖြစ်သေးဘဲ မျက်ခုံးတွေကိုအရင်စုကျုံ့လိုက်မိ၏။

ဖြောက်~ ဖြောက်~

တဖြည်းဖြည်း အရေအတွက်စိပ်လာတဲ့ အေးစက်စက်အထိအတွေ့တွေအောက်မှာ သျှန့်ရဲ့မျက်နှာတစ်ခုလုံးဟာ တစ်ခဏအတွင်းမှာပဲ စိုရွှဲသွားခဲ့တော့၏။ ထိုအခါ မျက်လုံးတွေကိုဖွင့်၍ အခြေအနေကိုစူးစမ်းကြည့်လိုက်တော့
ကြည်လင်နွေးထွေးနေတဲ့ အငွေ့အသက်ကနေ ရုတ်တရက်ကြီး မှိုင်းညှို့သွားတဲ့ကောင်းကင်အောက်မှာ အေးစက်နေတဲ့မိုးစက်တွေက အနှံ့အပြားရွာကျနေလျက်။ ပြီးတော့ တစိမ့်စိမ့်အေးခဲလာတဲ့အခြေအနေမှာ ချက်ချင်းဆိုသလိုညှိုးရော်သွားတဲ့ Hyacinth ပန်းပင်တွေ။ သျှန် ငေးကြည့်နေတုန်းမှာပဲ အမှုန်အမွှားတွေအဖြစ် တစ်စစီကြေမွပျက်ဆီးကာ အငွေ့ပျံသွားတဲ့ခရမ်းနုရောင်ပန်းပွင့်ငယ်လေးများက နှမြောတသစရာ ။ တစ်ခဏအတွင်းမှာပဲ တစ်ကွင်းလုံးအပြည့်ခရမ်းနုရောင်သန်းနေခဲ့သော Hyacinth ပန်းခင်းကြီးဟာ သျှန့်ရဲ့မြင်ကွင်းရှေ့မှာပဲ တစ်ခါလေးတောင်မရှိခဲ့ဖူးသလိုမျိုး အနံ့အသက်တွေကအစပျောက်ကွယ်သွားခဲ့၏။