دخلت الطياره ولقيت رقم المقعد جنب الشباك قعدت وبديت افكر في سفرتي دي يارب ح تكون وش خير علي وتديني اضافه مميزه لحياااتي المستقبليه ♡ ولأ ح تكون واااقع مرير يصحيني من الحلم الكنت عايشه فيهو قطعت افكاري المضيفه وهي بتقول لينا اربطو حزام الامان وبعدها دعيت انو ارجع من السفره دي وانا مبسوووطه ..
وصلنا دبي ودخلت صاله الوصول كملت الاجراءات وطلعت فعلا لقيت وائل منتظرني يا سبحان من خلق الجمال علي اقدام طبعا من شوفتو عرفتو وطالع احلي من الصوره بكتييييير جا سلم علي ياااخ كان ما استغفرته ربي ومسكت نفسي قربت احضنو بس قلت بقول علي خفيفه قال لي حمد لله علي السلامه قلت ليهو الله يسلمك وساق الشنط دخلها العربيه وفتح لي الباب ذووق ياااخ كده كتير علي والله 😅 ساق العربيه وساكتين مسافه طويله وانا الخجل عايز يكتلني وشغاله العب بالدبله في اصبعي الف فيها يمين وشمال عاين لي قال لي مالك متوتره 😊 قلت ليهو ما متوتره قال لي طيب ناس البيت خليتيهم كيف قلت ليهو تمااام الحمد لله وصلوني المطار حتي ناس خالتو نوره كانو معاااي قال لي اي صااااح كنت متابع مع وليد وبعديها تاني رجعنا سكتنا لحدي ما وقف جنب عماره ما شاء الله تلخم بس اصلا دبي معروفه بالعمران ♡
نزلنا من العربيه في راجل كبير قاعد جنب العماره لؤي قال لي ده عمي عبدو رحب بي اتذكرت صحباتي لم بقولو لي عمي عبدو قلت محل ما امشي الاسم ده لاحقني عايزه اضحك بس كتمتها طلعنا الاصانصير دخل الشنطه الاولي وعايز يدخل التانيه قال لي البشوف الشنط بقول تاني ما راجعه طبعا كلااامو ده طعني جووه قلبي بس اطنشتو قلت ليهو خالتو نوره مرسله ليك معاااي حاجات قال لي اهااا 😊 هوووي ما تسمعو كلااامو ده الشنطتين مقاسهم وسط ما كبار بس هو حيوان ساااي 👊😒
الاصانصير وقف في الطابق الـ 3 وائل مشي علي الشقه طلع المفتاح فتح الباب قال لي اتفضلي دخلت شال الشنط دخلها لي الغرفه انا قعدت في الصاله جا طالع دخل المطبخ وانا بقيت اكشف في الشقه وانا قاعده في مكاني ماشاء الله عليها مع انو ما شوفت غير الصاله والمطبخ جا شايل صينيه فيها كباية مويه وكبايه فاضيه وجك عصير قلت ليهو مافي داعي للتعب قال لي ولا يهمك 😊 المفروض يقول لي تعبك راااحه وكده بس شكلو ما عندو فنون الرد بعدها بقينا الـ2 قاعدين ساكتين قام وقال لي اتفضلي واشر لي علي الغرفه مشيت وراهو دخل الغرفه قال لي ادخلي دخلت لقيتها غرفة النوم 🙈 عباره عن غرفه فيها سرير مباااالغه وكنبه شزلونق طقم السرير والدولاب والتسريحه قلت لا اكيد بحلم قرصت روحي بيدي لم نطيت 😅 قلت يا رب لو كان حلم ما تصحيني منو قال لي دي الغرفه واشر لي علي باب داخل الغرفه قال لي وده الحمااام بعد ده ارتااااحي اكيييد تعبااانه من السفر قلت ليهو تسلم طلع وقفل الباب بقيت مقهيه في الغرفه ودخلت الحمام برضو شي عجيييب وحمام مصمم تصميم حديث جيت فتحت الشنط لقيت الهدوم المشخلعه ديك في وشي استغفرته الله وزحيتها لقيت البنات خاتين لي الجلبابات في اخر الشنطه وختوها بعد اتشاكلنا فيها 😅 شلت واحد دخلت الحمام وجيت طالعه سمعت باب الغرفه بدق قلت ليهو اتفضل فتح الباب قال لي حضرت الاكل في الصفره قلت ليهو حاضر طلع وانا طلعت وراهو لقيتو قعد في كرسي في الصاله قلت ليهو انت ماعايز تاكل قال لي لا شبعااان اكلت قبل شويه 😊 قعدت في الصفره ما شاء الله فيها اكل يشهي بس غلبني ااكل قمت ألم الصحانه قال لي خليها بلمها ادخلي ارتاحي قلت ليهو ما مشكله بلمها لميتها ومشيت دخلت الغرفه تاني جا دقه الباب قلت ده اهبل ولأ شنو كل ما يجي ح يدق الباب 😒 قلت ليهو اتفضل قلت يكون هو زاتو جايي ينوم 🙈 فتح الباب بس فضل واقف في مكانو قال لي يلاااا اخدي راحتك وتصبحي علي خير ولو احتجتي لحاجه تلقيني في الغرفه الجنبك دي 😊 طبعا حيرني بقيت عامله كده جمعت كلامو بعد مسافه حتي رديت ليهو تمااام قلت ليي تعاملو معاااي بااارد كده تاني قلت احتمال عشااان اول يوم وكده ولسه ما اتعودنا علي بعض زول فاااهم يااااخ غلبني انوم والصداع عايز يشق راسي بسبب بحر الدموع النزلتها في السودان والمكان جديد علي ...
اصبحنا تاني يوم كان يوم خميس صحيت اتذكرت وصية امي قلت يا بت يا شهد قومي وبطلي كسل دخلت اتحممته وسرحت شعري وطلعت لقيتو طالع من المطبخ قمر ما شاء الله الواحد ما بقدر يعاين ليهو مرتين قال لي صباح الخير ...
#يتبــــع ⏪⏪⏪⏪
