دخلنا صالة المغادره وما في زول بتكلم مع التاني انا كنت بتفرج في الناس وهو شغال بالتلفون لحدي ما ندهو رحلتي
وائل وقف علي حيلو وانا غالبني اقوم ما قادره اعاين في وشو واااااي مد لي يدو للوداااع قمت ومديت ليهو يدي قال لي رحله سعيده وبتمني نودع بعض ونحن متصافين وصافيه لبن ما نكون شايلين في قلبنا من بعض الحيوان ده يعني حالف الا دموعي تنزل وما تخلفي الوعد الوعدناهو لبعض واول ما تصلي بالسلامه اتصلي علي ما تنسي منتظر اتصالك طبعا انا ما نطقت ولأ كلمه بس مشغله راسي هزاز بس شويه كده وكنت ح احضنو واقعد ابكي بعد اتفارقنا دموعي نزلت عوشرميه عوشرميه
ركبت الطياره وبديت استرجع في الزكريات من اول يوم جيت لحدي ما وصلت لـ اللحظه دي وتحسين معاملتو معاي شوشتني من القرار الكنت متخزاهو
الحمد لله وصلت السودان طلعت من المطار لقيت وليد ومجتبي الـ 2 واقفين ويتونسو بقلبي قلت وليد الجابو شنو مشيت سلمت عليهم وسألوني من وائل قلت ليهم بخير الحمد لله ونحن واقفين كده قلت هسه اركب مع منو قلت لـ وليد عرفت مواعيد الطياره كيف قال لي ودي دايره سؤال جاتني تعليمات من دبي وقعد يضحك رجعني للحنين والزكريات قلت ليهو اهااا بس والله ما كان تتعب قال لي تقولي شنو كلو من وائل جنني بالتلفونات قبل ما الطياره تقلع من هناك شابكني تمشي تنتظرها في المطار قلت ليهو ذوووق ماف بدل تقول لي تعبك راحه بقلبي قلت اصلا انت زي اخوك ما عندكم فنون الرد قعدو يضحكو وبقو واقفين ساعه يتحالفو في البوصلني منو قلت ليهم هيييييي انجزو واتفقو والله هسه اخليكم واقفين هنا وأأجر لي تاكسي 😅 قالو لي غلطانين نحن في النهايه مجتبي قال لـ وليد بوصلها انا اصلا امي موصياني لخالتي قلت ليهم اخيييرا اتفقتو وليد قال ليهو خلاص خير خلاص ي شهد نتلاقي بكره اصلا جايب ليك ناس امي قلت ليهو تمام بتكلم كده تلفونو ضرب عاين للرقم قال لي شوفتي ده وائل طبعا من قال كده قلت ليهو يلااا يا وليد نتلاقي بكره ومشيت ركبت العربيه مجتبي جا دور ساق وخليناهو واقف يتكلم
مجتبي قال لي وائل مالو ما جا معاك ما ناوي يجي قريب عشان نتعرف عليهو عن قرب قلت ليهو كان جايي معاي بس ظهر ليهو شغل طارئ بس بجي قريب كضاااابه يا انا غلبني اقول ليهو نحن علي وشك الانفصال المهم ماشين ونتونس لحدي ما وصلنا البيت يا سلاااام يااااخ من فتحت الباب نسيت كل همومي جاني حمودي جاري تحد دات ثحد دات شلتو وحضنتو قوي وبقيت احضن فيهم بالدور امي وابوي وشذي يا سلااااام يااااخ احساس لا يوصف مجتبي دخل الشنط وقعد اتونس معانا حبه ومشي فضلنا قاعدين الليل كلو نتونس شذي قالت لي واااي يا شهد بقيتي مزه ونضيفه قلت ليها كيف ده كلامك شذي اوعي تكوني كلمتي البنات اني جايه قالت لي لا ما كلمتهم مش اصريتي علي ما اكلمهم بس قلت ليهم بكره الا تجو تتغدو معاي قلت ليها اي كده تمام انا زاتي قلت لريم ما تكلمهم بس تقول ليهم ارح لشذي امي قالت لي اها يا شهد سفرتك دي كانت كيف و وائل لقيتيهو كيف بما انو اول مره تتقابلو وتقعدو مع بعض بقلبي قلت ليها والله ما عارفه احكي ليك شنو ولأ شنو قلت ليها تماااام والله و وائل ما مقصر معاي في حاجه قالت لي ما شاء الله ظاهر في وشك منور بقلبي قلت والله يا نبع الحنان ما عارفه شي ساااي المظاهر خداعه وكان نفسي احكي ليها بالتفصيل طوااالي غيرت نبرة صوتها قالت لي بحده شهد بس انتي شكلك مقصره معاهو خلعتني طبعا قلتليها كيف يعني قالت لي ما متحننه مالك من مشيتي ما اتحننتي صاااح قلت ليها يا امي هناك مافي مكان حنه قالت لي يعني عايزه تقنعيني النسوان الهناك ما بيتحننو بقلبي قلت ليها وحياة ربي حنتهم سودا زي الليل 😅 واصلت كلامها يعني وديتك زي النسوان بحنتك تجيني زي البنات يدك بيضا شذي قاعده جنبي قالت لي بصوت براحه كلميها قولي ليها بالعكس وديتيني بت وجيتك مرا بس بطريقه تانيه قعدت اضحك قلت ليها قفلي ي حيوانه 😅 بقلبي قلت ليها وحياة ربي لسه بت امي قالت لي بكره الصباح بدري قبل نسابتك يجو تمشي الحنانه وتجي قلت ليها مافي داعي ياااخ قالت لي شهد اسمعي الكلام يقولو مرت ولدنا جات غبشه قلت ليها سمح قعدنا اتونسنا مسافه امي قالت بعد ده نومو عشان تصحو الصباح بدري قلنا ليها تمااام شذي قالت لي تنومي شنو قومي ارح علي الشنط دي قلت ليها خليها الصباح عليك الله والله هسه تعبانه يومين ما نايمه قالت لي ابو الزفت زاتو ده كلو سهر مع وائل وغمزت لي اي قليلة ادب ما تشتغلو بيها قلت ليها شذي امشي نومي احسن قالت لي وربي ما انوم لو ما فتحت الشنط ومشت عليها قلت ليها دقيقه ياااخ ما تخربي حاجات الناس انتي زاتو القال ليك منو انا جايبه ليك حاجه قالت لي انا ما بجيبو لي انا بقلع عايزه تفتح الشنطه قلت ليها لا دي حقتي مافيها حاجه فتحت شنطت الهدايا طلعت ليها الفستان والشنطه عايزه تطير من الفرح وما قصرت حتي شنطة هدومي فتحتها وعايزه تستولي عليها 😅 قالت لي احيييييي يا رب يديني وائل بعد الحال قلت ليها ارح نومي عشان يجيك في الاحلام قالت لي انا مش اختك وما تنسي اختك الكبيره النبي تعالي احكي لي عنو قلت ليها الصباح ومشيت نومته خليتها بس بصراحه كنت بتزكر في وائل وشغاله اقول يا ربي عمل شنو بعد انا مشيت وبتزكرني تاني ولأ خلااااص نساني لحدي ما نمته ..
الصباح امي صحتني شهد قومي امشي الحنه عشان تجي تحصلي نسابتك جريت البطانيه اتغطيت راجعه وقلت ليها امي الوقت بدري والله نهرتني قمت عين مغمضه وعين مفتحه سوقت شذي ومشينا بعد رسمو لي بس لسه ما غسلت الصبغه تلفون شذي ضرب بقت تهز لي في التلفون وتغمز لي قلت ليها يا بت جنيتي ردي ده منو قالت لي لا ح تجني انتي لانو ده حبيب القلب قلت ليها وائل قالت لي ايون ولأ عندك غيرو قالت لي بختو ليك في اضانك وبكون ماسكاهو عشان ما تملي تلفوني صبغه قلت ليها لا ما تفتحي الخط قالت لي خايفاني اسمع كلامكم 😅 قلت ليها بس اوعك تفتحي الخط نحن بنتكلم كده الخط قطع ورجع اتصل تاني قالت لي شهد الود مصر قلت ليها بس خليهو يرن كده برجع ليهو بعدين 😊 مسكين ضرب ووقف غسلت الصبغه وركبنا امجاد وصلنا البيت لقيت ناس خالتو لسه ما جو امي قالت لـ شذي تلفونك خاتاهو وين انتي قالت ليها شايلاهو معاي قالت ليها طيب ما بتردي علي وائل مالك شذي عاينت لي 😒 نظام ردي لامي قلت ليها التلفون كان جنبي ويدي محننه وشذي كانت بعيده مشت تجيب لي مويه اشرب قلت ليها بس انتي عرفتي كيف 😳 قالت لي ضرب لي كان عايزك وقال تلفونك ما بدخل معاهو وشذي ما بترد وانتي قلتي ليهو مشو وين قالت لي قلت ليهو في الحنانه وبالمناسبه قال لي انا قلت لـ شهد ارح اوديك الحنه بس رفضت يعني غشيتيني لم قلتي لي هناك مافي حنه 😒 قعدت اضحك قلت ليها كنت ما عايزه ازعلك يااااخ 😅 هسه البشوفك تحققي معاي كده ما يقول يا دووووب جيت امس هسه الواحد يزعل يرجع واصلو الشنط مستفه 😅 بمناسبة الشنط دي تعالي النديك حاجاتك طلعت ليها كيس هديتها بقت تشكر في وائل وشغاله تدعي ليهو قلت ليها وتقريبا انا بتك احق بالشكر ده منو قالت لي لو بتي كان سمعتي كلامي 😒 بقلبي قلت ده كلو بسبب الحيوان ده فتاني ليها المشكله قلت ليهو ما عايزه اتحنن وهسه عرفني اتحننته 🙈 قالت لي هسه بطلي كلام كتير وامشي اتجيهي هسه نسابتك بجو وما تنسي تضربي لـ وائل ولأ دخلي شريحتك في التلفون عشان يقدر يتصل عليك قلت ليها حاضر قمت اتحممته وقشرته واتمكيجته شذي قالت لي وووب علي ي شهد وربي العرس عملك مزه 😍 قلت ليها عقبالك بنتكلم كده جرس الباب دق جو داخلين ناس خالتو نوره ودااااك يا السلام والاحضان الا وجن بنت ولاء شغالة تحمر لي ساااي امها قالت ليها امشي سلمي علي خالتو شهد قالت ليها مااام وشغاله تحمر لي 😒 زي التقول ضرة امها ولاء قالت لي من سمعت وائل عايز يعرس وشافتك في الصاله غارت قالت تاني وائل ما بحبها وايام العرس كانت بتقول يعرسو ليك وليد بس وائل لا 😅 قلت ليها تعالي وائل قال بس بحبك انتي بقلبي قلت ليها قريب وتتفكو مني شذي كانت بتحضر في الفطور وامي وخالتو نوره بتونسو ولاء جات قعدت جنبي قالت لي شهد اها وائل كيف قلت ليها تمام بسلم عليك قالت لي انا قصدي في علاقتكم مع بعض قلت ليها ما فيها جديد قطعت كلامي خالتو نوره قالت لي شهد اها ان شاء الله وائل ما يكون اتلوم معاك قلت ليها لا والله يا خالتو وائل مافي منو اتنين وطبعا وجن حبه حبه بقت تقرب مني وعاجباها الحنه تمشي وتجي تهبشه 😅 تلفون ولاء ضرب قالت لامها دا وائل جبنا سيرة القط القط جانا ينط قعدو يضحكو فتحت الخط سلمت عليهو وادتو امها سلمت عليهو لم ادو التلفون لامي انا برااااحه عملت انسحاب دخلت الغرفه شذي جات شايله التلفون قالت لي هاك وائل دايرك مسكت التلفون وانا متوتره زي الاول مره اتكلم معاهو قال لي حمد لله علي السلامه قلت ليهو الله يسلمك قال لي ليه ما اتصلتي علي بعد وصلتي قلت ليهو نسيت قال لي طيب كده ما ح نقدر ناخد راحتنا بالكلام دخلي شريحتك السودانيه ومسكلي لي منها برجع ليك فيها قلت ليهو اوك
بعد الفطور ناس خالتو نوره قالو ماشين دخلت الغرفه جيت شايله كيس الهدايا اديتها ليهم شغالين يشكرو فيني سااااي لم راسي كبر التقول دافعه حقها من جيبي وانا عشت الدور شغاله ليهم لا والله دي حاجه بسيطه 😅 ولاء جات تودعني قالت لي شهد كلامنا لسه ما انتهي بقلبي قلت ليها مافي كلام بينا غير الطلاق طلعو ...
الضهر جوني صحباتي ....
#يتبــــع ⏪⏪⏪⏪
