فتحت التلفزيون وحضرت لي فلم زهجت قفلتو دخلت غرفتي ماجاني نوم فتحت اليوتيوب سمعت باب الشقه فتح بعد شويه سمعت باب غرفتو اتقفل قلت طال ما معاملتو معاااي بدت تتغير احاول اتقرب منو امشي اشوف لو محتاج حاجه وانا اصلا صاااحيه مشيت عايزه ادق الباب سمعتو بتكلم بالتلفون مع احمد صاحبو قال ليهو انا عارف والله دي لا غلطتي لا غلطتها بعد دايره ارجع سمعت كلامو ده قلت اذا الموضوع فيهو بنت لااازم اقيف اسمعو هسه يكون قاصدين الزفته الاسمها سهي شكلو واقع في مشكله النسمع المكالمه يمكن اقدر اساعدو
ودار بينهم الحوار
احمد : والله البت ما فيها كلااام حلوووه وراقيه
وائل : والله عارف ما فيها كلااام احتمال لو كنت شوفتها من الاول ما كان حصل كده وانا عارف الحصل ده لا غلطتي لا غلطتها
احمد : طيب غلطة منو
وائل : ما غلطة زول نتج من سوء تفاهم بيني وبين ناس امي ...
قلت ناس امو الدخلهم شنو ؟؟ ما يكونو هم زاتهم بعرفو سهي
احمد : كيف يعني سوء تفاهم
وائل : طيب قبل ما احكي ليك عايز اسالك لم يكون في بنتين وحده لابسه فستان اسود و وحده لابسه طرحه سودا وانا اقول ليك عاين اللابسه اسود انت ح تعاين لمنو فيهم احمد قال ليهو اكيييد اللابسه فستان وائل قال ليهو بس ده نفس الحصل معاااي لم ناس امي رسلو لي الـ CD حق عرس لؤي قالو لي رايك شنو في البنت اللابسه بيجي انا بقيت مركز في اللابسه فستان حسب كلامهم لي وهم طلعو قاصدين اللابسه طرحه بيجيه والمشكله كانو البنتين قاعدين جنب بعض في التربيزه وقلت لناس امي اني موافق وزي ما عارف العرس تم بسرعه وما حصل اتكلمنا صوت وصوره وبعد العقد حتي اتفاجأت انو دي ماهي لم شوفتها في الحفله عن طريق الموبايل واتاكدته لم رسلو لي الصور عشان كده اتصدمته
احمد : وهسه ح تعمل شنو
وائل : والله ما عارف بس ح اخلي القدر يتم لعبتو ويحدد مصيرنا
اتخيلو انا واقفه وسااامعه ده كلو وبعد ده كلو ما كنت مجمعه الكلام قلت ديل قصدهم منو .. ومنو اللابسين فستان بيجي وطرحه بيجيه وعرس لؤي علاقتو شنو بتكلم مع نفسي كده سمعت وائل قال ليهو من الاول يا ريت لو قالو لي اللابس طرحه بدل يقولو لي اللابسه بيجي ويسكتو كان حياتنا هسه احسن من كده
احمد : طييييب هسه هي وين ما تقوم تسمعك
وائل : لا ما بتسمعني قاعده في الغرفه التانيه وهسه تكون في سااابع نومه
احمد : يعني كل زول قاعد في غرفه براااهو
وائل : ااااي ... ياااخ خت نفسك مكاني تبني حياتك وتخطط لمستقبلك مع وحده وتجي تعيش مع وحده مختلفه خااالص اكييييد ما ح تقدر تتأقلم مع الوضع بسهوله
دقيقه دقيقه فهمتو الانا فهمتو ده وائل قال ليهو خت نفسك مكاني يعني الحوار ده كلو وائل كان بتكلم عن نفسو والبت دي لااا لااا دقيقه انا ما مستوعبه حاااجه بقيت حاسه بالدنيا لاااافه بي ورجليني ما شايلاااني وحسيت بضربات قلبي زادت ما عرفت اتصرف كيف رجعت غرفتي وبديت اعيد شريط كلامهم ده من الاول لم وصلت لكلامهم عن عرس لؤي بقيت استرجع في زاكرتي في العرس قال وحده لابسه طرحه بيجيه ووحده لابسه فستان بيجي اللابسه طرحه بيجيه دي انا طيب اللابسه فستان بيجي دي منو مافي زول في الحفله كان لابس فستان بيجي غير الشباين الـ هم صحباتي واغلي من حياتي يعني حاليا انا قاعده في مكان وحده من صحباااتي لاااا لاااا استحااااله طيييب ليي كده يعني وقت احب راجل واتعلق بيهو يطلع كان عايز وحده من صحباااتي طيب انا تاني اخت عيني في عينهم كيف وانا قطعت نصيبهم ي ربي دي هدي ولا ريم ولا شيماء بتكلم مع نفسي كده وراقده حاضنه المخده والدموع نازله عشره عشره يا ربي طيب اعمل شنو ... ياااا رب يكون كابوس وامي تجي تصحيني منو ولأ اكون بحلم واصحي القي روحي في بيتنا يعني عشان كده وائل اتغير معاي بعد العقد طيب انا زنبي شنو ؟؟ طيب بعد عرف ليي ما طلقني اكيييد جابني هنا عشان ينتقم مني حتي يطلقني بس والله دي ما غلطتي والليل كلو كنت بلوم في نفسي عشان صحبتي الشلت مكانها ومن ناحيه تانيه بحاول اقنع في روحي انو ما عندي ذنب
اصبحنا الصباح وانا الصداع عايز يكتلني من كتره البكا قلت البكا ما بحلني لااازم اتصرف بقيت بفكر قررت انو اواجهه وائل بالكلام بس المشكله اقول ليهو عرفت من وين وانا كنت بتسنط لكلامهم قلت المهم اني اواجهو طلعت من الغرفه لقيتو طلع الشغل ومجهز لي الشاي بالزعل شلت الشاااي دفقتو في الحوض مبزره صاااح 😅 وعملت شاي من الاول بس بالجد في اللحظه دي كرهتو وما عايزه منو حاجه وانا بشرب في الشاي كنت بفكر اواجهو كيف وافتح معاهو الموضوع قلت اول لازم اعرف دي ياتو وحده من صحباتي القاصدها مع انو صعب علي تاني ما ح اقدر اخت عيني في عينها بس احسن اعرفها دي منو احسن من اكون خجلانه منهم كلهم فجأه اتزكرت شذي اختي برضو كانت لااابسه معاهم فستان معقول يكون قصدو شذي واااااي لا يا رب تكون وحده من صحباتي ولا تكون شذي ولو هي تاني ح اعيش معاها في بيت واحد كيف وضميري شغال طول الوقت يأنب فيني حيوان خلاااص هسه في داعي يتعبني كده المهم قررت انو اعرف البت منو عشان طوااالي اواجهو بالاسم طيب البت ح اعرفه كيف ؟ اتذكرت كلامو لم قال انا وهي كنا قاعدين سوا بس قدر ما حاولت اتزكر العرس واني كنت قاعده مع منو ما اتزكرته الحاجه الوحيده المتزكراهو انو ما مرقو من الداره الأ بعد الحفله انتهت يااااخ العرس مر عليهو 5 شهور ح اتزكر تفاصيل صغيره كده كيف لقيت ما في حل غير اني احضر CD فتشتو في غرفتي ما لقيتو قلت يكون خاتيهو في غرفتو دخلت فتشتها وكنت حريصه انو ارجع كل حاجه في مكانه عشان ما يشك فيني برضو ما لقيتو اتزكرت انو بعد المغرب بمشي النادي وبخلي اللاب توب قلت بعد يطلع افتش اللاب توب بكون حافظ فيهو نسخه استسلمت من التفتيش ورجعت غرفتي وبقيت اتذكر في صحباتي وحده وحده لم كانو بنبرشو فيهو وضميري شغال يانب فيني حلف ما يخليني وتاني اتزكرت كلام امي ووصيتها لي لم بتقول لي امسكي بيتك قلت لم ارجع اواجهها كيف اقول ليها شنو معقول اقول ليها والله ما انا السبب بس هو طلع ما بحبني بحب وحده غيري استغفرته ربي ومسحت دموعي واتوضيت صليت الضهر وبقيت ادعي انو ربنا يقويني واقدر احل مشكلتي جيت اقوم من المصلايه راسي لفه وحسيت عندي هبوووط اتذكرته انو من امس ما اكلته ااكل كيف هو الحيوان ده خلي لي نفس ااكل بيها قلت ي بت يا شهد ده ما وقت انك تمرضي فيهو مشيت التلاجه اكلت جبنه قلت ترفع لي الهبوط وجيت راجعه الغرفه قلت الليله الحيوان ده اصلو ما عايزه اشوفو بس حاضنه المخده وراقده سمعت باب الشقه فتح ...
#يتبــــع ⏪⏪⏪⏪
