شغالين نتونس كده نمنا قريب صلاة الصبح تاني يوم قمنا متاخرين وتعبانين غلبنا نمشي الجامعه انا معزوره كانت خطوبتي بس هم قلة ادب منهم ساااي ما مشو ههههههه ما سمعوني كان كتلوني 😅 بس ما قصرو معاااي والله قعدنا تمينا ونستنا ضرب لينا محمد جنو من الجامعه قال لينا في شنو الشله كلها غايبه شيماء ادتو خبر الخطوبه وجنو ما قصر نشرو في قروب الدفعه وهم ما قصرو والله ضربو باركو لي وهنا نبع الحنان ما قصرت معانا تمت الناقصه بالشاااي والجبنه قلت ليها مافي داعي تسوي ليهم الجبنه مش اتسممو فطرو وشربو الشاااي خربو ميزانيتنا هسه .. امي حمرت لي قالت ليهم شهد دي لسانها اصلو فالت ومتبري منها ما تزعلو عليكم الله قالو ليها ياخالتو عمي عبدو ده اصلا ما شغالين بيهو امي عرفت انو مسمني عمي عبدو امي دي تضحك لم دمعت قالت ليهم اخدو راحتكم البيت بيتكم وبعدين السكر والشاي والبُن ما جايبهم وائل عشان تحميكم قلت ليهم والقال ليكم منو بديكم من حاجات وائل يسمكم قالو لي شهد والله كنتي مسكينه بس قام ليك ريش قلت ليهم لو سمحتو ريش واجانحين رهااام جدعتي بالمخده قالت لي كلبه شذي قالت ليهم الحاله لسه ما لبست دبله بس شكلي ح اغتالها قبل ما تلبسها وقعدنا نضحك 😅 عدينا اليوم كلو ونسه وضحك العصر جا لؤي ساق ريم وساق معاهو باقي البنات لم ودعو امي قالت ليهم عقبالكم الساعه القالو امييين باعلي صوت انا متاكده اهلهم في بيوتهم سمعوهم ما تصدقوني بهظر يااااخ 😅 وربي احلي صحبااات كان بالجد احلي يوم بوجودهم ♡ ....
انا و وائل كل يوم علاقتنا كانت بتقوي وارتباطنا ببعض بزيد وكذلك ولاء اختو وخالتو نوره كانت كل فتره بتتصل علي بتقول لي مرت ولدي العسل ومرات بتقول الغاليه مرت الغالي بعد شهر جابو الشبكه ولبسني ليها وليد اخوهو و وائل كان حاضر الخطوبه بالتلفون كان فاتحين الكاميرا صوت وصوره ومررو التلفون للناس كلها باركو ليهو لم ولاء جايبه التلفون علي وماشه وتتكلم معاهو انا اشرت ليها باصبعي لا لا نظام ما تديني ليهو قالت ليهو خطيبتك خجلااانه تتكلم معاااك قال ليها خليها هسه واهلنا حددو انو العرس يكون بعد شهرين بعد ما اخلص امتحانات ما عااارفه اركز في الامتحانات ولا في العرس
وائل ضرب لي المسا وشغلها لي قال لي يعني خجلانه تتكلمي معاااي فديو طيب بعد نتلاااقي فيس تو فيس نشوف الخجل ح يكون كيف خجلني زياده الحيوااان
من يوم حددو العرس حسيت بالوقت بقي جاري الساعه تمر زي الدقايق والاسابيع تمر زي الايام .. وائل رسل لي القروش قالي لي اختاري الشيله كل يوم انا والبنات جارين السوق كنا عاملنو موضوع اشتريت كم عبايه خليجه علي كم لبسه علي كم توب مع انو الله اعلم البس التياب دي 😅 وطقمتهم مع الشباطه والشنط لم جيت اشتري هدوم البيت دخلت محل الجلبابات البنات قالو لي عايزه شنو من هنا قلت ليهم عااايزه اشتري يعني ح اكون عايزه شنو قعدو يعاينو لي كده قالو لريم عليك الله اديها دروس بعدين ما تفضحنا مع وائل 😅 شيماء قلعت مني الشنطه الفيها القروش قلت ليها مالك قالت لي هووووس ولا كلمه امشي وراي بقو ماشين وانا ماشه معاهم زي الهبله ما فاهمه شي دخلو محل كده الهدوم الفيهو كلها مشخلعه استغفر الله 🙈 انا كنت فاكراهو محل ملابس اطفال 😅 هم بعزلو ويشترو وانا عااامله كده قلت ليهم دي الـ ح يلبسها منو ان شاء الله قعدو يضحكو قالو لي بتك المستقبليه قلت ليهم تافهااات قليلات ادب شلت باقي قروشي ورجعت لمحل الجلبابات شلت منهم 3 بعد شكل مع البنات قلت ليهم هدومكم الاشتريتوها دي بلوها واشربو مويته ريم قالت لي لا اديني ليها انا قالو ليها واااعيه يا ريمو قالو لي غايتو وائل الله يصبرو عليك اريتو كان خطب شذي ما كان تعبتنا كده شذي قالت ليهم والنبي كلمو هسه يغير رايو قلت ليهم جزم رمم قالو لي كلبه عشااان الليله اخر يوم ليك في السوق عشان كده بتنبزي فينا 😅😅😅
كان فضل شهر للعرس المسا ضرب لي وائل وصوتو كان زعلااان قلت ليهو الحاصل شنو زعلااان ليي قال لي والله قدمت للاجازه وما وافقو لي عليها عشان كنت قريب في السودان وفي عجز مهندسين في الشركه قلت ليهو خلاااص نأجل العرس قال لي لاااا ما يتاجل في تاني محاوله بشوف زول يسد مكاااني بس العرس في الحالتين ما ح يتأجل ح يكون قااائم في مواعيدو ♡ ....
#يتبــــع ⏪⏪⏪⏪
