فضل يومين وارجع السودان وائل قال لي شهد الليله ما تعملي عشا ح نطلع نتعشي بره قلت ليهو مافي داعي قبل يومين اتعشينا بره قال لي ده اعتبريهو عشا وداع او بالنسبه ليك احتفال انك ح ترتاحي مني ابتسم قلت ليهو اوك وانا العبره خانقاني سكتنا مسافه مسح شعرو بيدو وقال لي بالمناسبه يا شهد انا حاجات النسوان هنا والله ما عارف مكانها وين لكن اسئلي بنات شركتنا مش داخله معاهم ف قروب اسأليهم يوصفو ليك وانا بوديك طبعا اتخلعت قلت ليهو ما فهمتك قال لي قصدي مكان الحنه يوصفو ليك وانا بوديك واجيبك قلت ليهو لا ما عايزه مافي داعي اصلا نازله الجامعه قال لي الجامعه لسه فضل ليها شهر ونص بس لو انتي ما حابه تمااام ودخل غرفتو طبعا من جيت هنا ما اتحننته ويدي بقت بيضا زي قبل العرس واثر الصبغه ظاهره في طرف ضفوري وامي جايبه معاي حنه اهديتها لزوجة صاحب وائل هي عندها راجل تتحنن ليهو انا اتحنن عشان خاطر منو
المسا اتظبته واتمكيجت كان قمنا للقشره صعبين جا دق لي الباب طلعنا وصلنا المطعم بعد اتعشينا مسح شعرو بيدو قال لي شهد عايز اطلب منك اخر طلب وممكن تعتبريهو ترجي رفعت عيني عاينت ليهو ي دووووب لاحظته انو حلق وظبت لحيتو قال لي بعد تصلي السودان بالسلامه ياريت وبتمني من كل قلبي ما تحكي مشكلتنا لاي زول لحدي ما اجي انا ونقعد مع بعض نحلها عشان ما تتطور واصلا زي ما عارفه نحن الـ 2 ما كان عندنا يد في الحصل ده كلو بسبب القدر وما معروف احتمال يكون حصل كده لخييير لينا طبعا انا ولا رديت عليهو كنت تايهه بين ملامح وشو وكلامو .. واصل كلامو وقال والله وتالله انا البت ديك من يوم عرفت اني عقدته عليك انتي شلتها من افكاري خااالص وبقيت ما بفكر فيها يعني كنت حافظ لحقوقك كامله من بقيتي في عصمتي صاح ما اكضب عليك في الاول اتصدمته بس برضو كنت معزور ختي نفسك مكاني كان ح تتصدمي نفس صدمتي دي واكتر والله ويشهد الله اسمها ما عارفو وحالياً شكلها ما مستوعبو طبعا ده كلو وانا ساكته بس دنقرته راسي .. وحتي بعد عرفت ما كلمت زول الا ولاء اختي ونبهت عليها انو الامور تسير عادي زي الـ ما حصلت حاجه
وبالنسبه لموضوع الطلاق الماسكه فيهو ده انا اطلاقا ما فكرت فيهو وانا متاكد انك حاليا متخذه قرارك بس بتمني بعد ترجعي السودان تعيدي تفكيرك وتختي النقاط الزكرتها ليك دي في راسك حتي تحددي مصيرك وبعدين بطلي تلومي نفسك وتقولي انك قاعده في مكان وحده تانيه انا صاح كنت وافقت عليها بس لسه ما لحقت اخدت حيز جواي كانت حاجه عابره زي ما تقولي واوعدك اول ما انزل السودان نصل لحل يرضي الطرفين بس انتي اوعديني الكلام يفضل بينا لحدي ما نتلاقي تاني اتفقنا وانا ساااكته بس كلامو بالجد اثر علي وحسسني براحه نفسيه قال لي شهد ردي علي اتفقنا بعد مسافه هزيت ليهو راسي بمعني اي قال لي تمام بقينا ساكتين قال لي نمشي عشان بكره وراك شغل كتييير حسيت بلساني تقيل طلعنا وصلنا الشقه قال لي احلام سعيده وكل زول دخل غرفتو
