طلعنا الشقه واستلمو ريم طلعت ما شاء الله قمر 14 الضهر لؤي ضرب لريم ما عارفين قال ليها شنو بس شايفنها تشيل وتتخجل قفلت الخط قالت لينا وااااي عقدو عقبالكم بقينا نبارك ليها واي وحده تقول ان شاء الله المره الجايه انا وجا المسا البنات لم جو يلبسو الفساتين متحسسات عشان فستاني وكده قلت ليهو انتو عويرين عااادي وفستاني ده زاتو احلي من فساتينكم قالو لي كلبه نحن الحاله زعلاانين بس بالجد لم لبسو اتزكرت فستاني وقلت هسه اكون معاهو والعبره وقفت لي في حلقي بس دسيته واستغفرته والدور جانا في المكياااج بالجد طلع مكياااج خفيف وتووووحفه الشباين كنا 3 .. 6 محجبات و3 فاكات لؤي ضرب لريم تلفون قال ليها نحن واقفين تحت قالت ليهو فضل عشره دقايق وننزل نزلنا تحت باركنا للعريس وسلمنا علي اصحابو طبعا البنات من شافو اصحاب وائل اشتغلو زي بيت البكا واااي عاينو ده خطييير كيف واااي عاينو ده فظيييع كيف
النصيحه شكلهم انضف من لساني كانو لابسين قميص كبدي وبدل اوف وايت ونحن فساتين اوف وايت بالكبدي قصدي البنات وانا لابسه فستان كبدي وطرحه اوف وايت فيها لمعه طبعا اللبس ما صدفه كنا متفقين عليهو كنا بنتفق مع لؤي ولؤي بكلم اصحابو ريم ولؤي ركبو في عربيه ونحن اتوزعنا علي باقي العربات وصلنا الصاله كان العرس في صاله الوداد وعملنا الزفه بنفس التخطيط اول دخلنا نحن البنات ومعانا العروس كنت انا في اول الصف عشان فستاني مخالف
دخلنا الصاله بزفه سودانيه انصاف مدني ( حصنوها بي يس ) مشينا وقفنا في نص الصاله عملنا دايره والعروس في نصنا بعد الاغنيه انتهت دخلو الاولاد ومعاهم العريس بزفه ( يا ود يا قرض ) .. احيييي كانو بالجد قرض التقول الاغنيه عاملنها ليهم ♡ وداخلين وهم برقصو هجاجييين يااااخ والاغنيه زاته ساعدتهم والعجب لم وصلت مقطع ( ما بيتخفخف تقيل تقالتو تجنن والعجب إيدو يوم يكون متحنن) في المقطع ده كلهم مدو يدينهم قدام كلهم محننين يدينهم الـ2 والحنه فيهم تسوي كده 👋🏻 تاني وقفو صف والعريس في النص 3 ماسكنو من يدو الشمال و3 من يدو اليمين ومتماسكين شغلو ليهم اغنيه خليجيه بقو يرقصو فيها وهم جايين علينا وصلونا العريس مشي وقف قدام العروس سلم عليها في راسه اصحابو قدو اضانا بالصفافير ونحن كنا واقفين حولينهم شكل دايره بنت بعديها ولد بعديها بت يعني بت ولد بت ولد في شكل دايره كبيره والعرسان في النص تاني قعدنا علي رجلنا عشان الناس تشوف ونحن حولينهم بدلو الدبل من اليمين للشمال بعديها فتحو ليهم رقصه اسلو ريم كانت خجلانه ما عايزه ترقصها بس لؤي السرور مسكها من نصها وخلاها ترقص وشغال يهمس ليها في اضانه وهي تتبسم وخجلااانه وتعاين في قميصو غالبها ترفع وشها من الخجل نفسي اعرف كان بقول ليها في شنو يتهامسو ونحن قاعدين بس ما مشكله بعرس وبخلي راجلي يهمس لي غايتو هم برقصو وانا زاتي والله خجلت من الاولاد الجنبي التقول البرقص انا بعد رقصو فتحو اغنيه انجليزيه وقفنا بقينا نلف حولهم وهم برقصو في النص احييي رجلي نملت من القعده العرسان انتهو من الرقيص وبدت الحفله كانت بي طه سليمان هججنا سسسسمح انا الجزمه تعبتني مشيت قعدته في التربيزه وديل حلفو كان يزحو من الداره التقول ما حاضرين حفله قبل كده
بعد مسااافه طه وقف فاصل جات بت متزوجه حلاااته قالت لي ممكن اقعد معاااك ولأ معاااك نااس قلت ليها لا اتفضلي بقلبي قلت المعااي عاااملين زي الساون وعااازف الاورقن لو الحفله ما انتهت ما بقعدو بعد شويه بدت تسأل فيني قالت لي اسمك منو قلت ليها شهد قالت لي انا ولاء قلت ليها عاشت الاسامي قالت لي انتي بتبقي للعروس قلت ليها لا انا صاحبتها بس زي اختي قالت لي ماشاء الله مبروووك ليها قلت ليها الله يبارك فيك قالت لي انا لؤي العريس ود خالتي قلت ليها مبرووك ليهو البنت ظريييفه بس اسئلتها كتيييره نحن بنتونس كده البنات جو قعدو عرفتهم علي بعض التقول انا بعرفها لي سنين 😅 استاذنت مننا وقامت وهم قعدو بقينا نتونس ونعلق غااايتو كسبنا ناس كترة حسنات الحفله انتهت ومشينا مع العروس غيرت للجرتق كان بانصاف مدني بعد انصاف هججت وانتهت جرتقوهم وعايزين يمشو الفندق عشان تاني يوم مسافرين ماليزيا شهر العسل طلعنا معاها لحدي باب الصاله وهي تشيل وتحضن فينا وتبكي ونحن نبكي معاها ومره تبكي مع اهلها التقول ماشين يعدموها ولؤي شغاال يسكت فيها احيييي اريتو عرسي وراجلي بعد ده غااايتو يا صحباتي من هسه كلمتكم ما تبكو معاااي خلو مكياجي ده يتم معاااي باااقي الليل ده وما امشي مع راجلي وعيوني وارمه 😅
ركبو العربيه مشو ونحن وااقفين اي وحده راجيه اهلها يجي يسوقوها بس ما خلينا زول ما قطعنا فيهو في وقفتنا دي وانا واقفه جات طالعه البت المتزوجه القبيل القالت اسمها ولاء شايله طفله ومعاها مره امها تقريبا برضو مزه جو ماشين علي المره سلمت علي باستني بهنا وبهنا ولاء قالت لي دي امي ي شهد قلت ليها اتشرفنا وانا بقيت عامله كده وسلمت علي باقي البنات جات وقفت جنبنا عربيه كامري اتحيرنا في العربيه واقفه جنبنا ماله بعد شويه جات ولاء قالت لينا يلااا عن اذنكم ماشين وودعتني بهنا وبهنا وقالت لي ان شاء الله نتقابل تاااني اجيي يا نتقابل تاني وجات امها برضو ودعتني بهنا وبهنا وركبو العربيه ومشو خلعوني في روحي البنات شغلوها لي شنو يااا عم عبدو شايفنك عملتي شغل قلت ليهو والله انا زاتي محتاره بس اهدو معرفه ساااي قالو لي بس شكلهم ظريفين قلت ليهم اااي تاني كل وحده اهلها جو ساقوها نحن جانا ابوي وقال لينا اديتوني السهر .... شذي قالت ليهو الحاله خلينا العروس لسه قاااعده في الصاله شذي ي كضااااابه ....
#يتبــــع ⏪⏪⏪⏪
