طلعت لناس امي بره وعقلي كان مشتت يودي ويجيب تاني قلت احتمال زي ما قال ضغوطات الشغل امي قالت لي يا شهد بعد ده وضعك اختلف ما زي اول بقيتي مسؤوله وست بيت يعني دلعك ده حدو هنا وكسلك ده بطلي والله اداك نسابه وراجل ما بتعوضو حافظي عليهم كل يوم كان بتديني دروس من ديل 😅
ومرت الايام وحسيت انو اهتمام وائل بي قله. شيييد ما زي اول حتي في مكالماتو ما زي قبل العرس بقيت اراجع في زاكرتي اني عملت شنو يا ربي زعلو لقيت اخر مره اتكلمت معاهو قبل ما يتغير كان يوم بارك لي العقد ولحدي ما قفلنا كنا احلي اتنين وقطعت سرحتي بجرس التلفون فتحت الخط لقيتها دي خالتو نوره سلمت عليها قالت لي مبروك يا بتي خلاااص اخيرا ح تجتمعي مع راجلك قلت ليها كيف يعني قالت لي الزياره حقتك طلعت وبكره وليد بمشي يقطع ليك التذكره وتعملو التاشيره قلت ليها الحمد لله الشي الطبيعي المفروض بعد سمعت الخبر ده افرح بس في حاجه كانت مانعاني وناقصه فرحتي ما عارفاها شنو بعد قفلت الخط كلمت امي وابوي .. ابوي اكتر زول اتاثر عشااان انا مسافره وانا كنت مستغربه المفروض الخبر ده اول واحد يكلمني بيهو وائل .. المسا اتصل قال لي الزياره طلعت بقلبي قلت ليهو يدوووب اتزكرت تكلمني قلت ليهو اي اتونسنا كده وبرضو ما زي زمان وطبعا بدل كان بقول لي حقتي بقي يقول لي يا شهد
بعد يومين اتصل علي وليد قال لي انا واقف جنب الباب طلع ليهو ابوي دخلو الصالون جيت سلمت عليهو وقعدنا نتونس مد لي التذكره قال لي السفر بعد اسبوعين اتخلعت طبعا قلت ليهو بالسرعه دي قال لي اي والله بس عايزه تقنعيني انك ما فرحانه قلت ليهو اممممم ظريف اخد ونستو وطلع امي قالت لي بعد ده يا شهد جهزي حاجاتك وشوفي الناقصك شنو ... كان كل ما يعدي يوم خوفي كان بزيد من السفره دي وخاصه بعد تغيير معاملة وائل معاااي والاسبوعين فضل منها 3 يوم ناس عمو محمد ابو وائل كان عازمنا عشا مشينا واكرمونا اخر كرم جات ولاء قعدت جنبي بقت تتونس معااي قالت لي والله يا شهد وائل مافي اطيب من قلبو والله ما عشان اخوي لكن والله قلبو ابيض زي اللبن حتي لو زعل برجع وبنسي بقلبي قلت الحيوانه دي بتشكر لي في اخوها ماله يعني انا الكعبه قلت ليها ربنا يقدرني واسعدو قالت لي ربنا يسعدكم الاتنين اخدنا ونستنا وجينا طالعين خالتو نوره قالت لي بعد بكره بنجي نحضر سفرك قلت ليها ان شاء الله ودعناهم وطلعنا
تاني يوم جوني البنات قيلو معاااي وستفو لي شنطتي ما قصرو والله حتي هدومي بخروها لي 🙈 وشاكلتهم تاني في الهدوم الاشتروها لي ديك قلت ليهم خساره قروش بس هسه دي هدوم الواحد يلبسها استغفر الله العظيم ح اشيلها زياده وزن بس قعدو يضحكو فيني وجونا خالاتي برضو يودعوني قريب للمغرب كده البنات قالو ماشين ساعه كاااامله غالبهم يودعوني هم يبكو وانا ابكي حاضنين بعض مساااافه حتي طلعو والدموع في عيونهم وبعديهم برضو جا دور خالاتي انا ابكي وهم يسكتو فيني يا بت اهدي الببكيك شنو وانت ماشه لراجلك اريتو حال البنات قالو لامي بتك دي ما زولة غربه كلو كلو امي قالت ليهم بتتعود غايتو يا نبع الحنان شكلك عايزه تتخلصي مني سريييع سريييع هووووي ما تصدقو كلامي ده اصلا بحب اشغلها ليها حبيبتي انا ودعوني وخلو دموعي عشره عشره طبعا الليل داااك كلو ما نمت شغاله اتونس مع امي وابوي وشذي ومرقده حمودي جنبي وكل مره ابوسو قلت لابوي بكره مش ح تمشي معاااي المطار قال لي لا بكره طالع الصباح عندي شغل ضروري قلت ليهو يعني ما ح توصلني المطار قال لي ما عندي طريقه والله دموعي جات جاريه هو طوااالي قام قلت لامي عليك الله حنسيهو يمشي معاي المطار انا عارفه كضاب ما عندو شغل قالت لي اي والله ما عندو شغل بس انتي يا شهد عارفه ابوك ما بحب الوداع قالت لي خلينا في المهم واستلمتني في النصايح 😅 يا بتي زي ما قلت ليك بطلي كسلك ده زمان بتكملي نومك وبتقومي بتلقي الشاي جاهز بس هسه الوضع اتغير بقيتي زيي و واحد زولة مسؤوليه قومي من الصباح اعملي الشاي لراجل وشوفي متطلباتو لحدي ما يطلع الشغل بعديها نضفي بيتك وبخري وادخلي مطبخك شوفي ح تعملي شنو وخلصي من بدري عشان قريب رجعتو من الشغل تتجيهي انتي خلي لم يجي يعاين للبيت يحس انو مكتمل وكان عاين ليك يلقاك مكتمله ما يحس بنقص الناس ديل ختوك في مكانه خاصه ما تخيبي ظنهم فيك سامعاني يا بتي قلت ليها حاااضر يا امي قالت لي عارفاااك واااعيه وبترفعي راسك يلا بعد ده تصبحي علي خير عشان تقومي بدري
نامتو وانا كنت بعاين ليهم بالدور ودموعي جاريه لحدي ما الصبح اذن قمت صليت وامي صحت معاااي بعد الشمس طلعت جا ابوي قال لي يلا يا شهد في اماني الله جريت عليهو حضنتو وبقيت ابكي هو زاتو دمع قال لي يا بت انتي عويره تمشي وتجي بالسلامه وودعني وسريع طلع واليوم ده بالزات طلع بدري علي غير العاده عشان ما يحضر سفري وجونا خالتي نوره و ولاء وجات معاهم ريم وانا دموعي بس جاريه والعجب لم قالو لي الوقت جا قومي البسي بقيت شغاله البس وابكي وبعد شويه جا ود خالتي و وليد عشان يوصلونا المطار وبقو يقولو الزمن جا خلاااص اطلعو ولم شفتكم جارين الشنط بقيت انا ابكي وامي تبكي وشذي تبكي ركبنا مع ولد خالتي و وليد ساق اهلو وصلنا المطار لم جيت ادخل جنس بكا وبشتنه خساره المكياج التقول ماشين يضبحوني 😅 طبعا ريم الفروض تسافر معاي لـ لؤي راجلها بس زيارتها اتاخرت قالت لي شهد اوعك تجي راجعه انتظريني هناك لحدي ما اجيك قلت ليها كويس ودعتهم انا ابكي وامي وشذي وريم و ولاء وخالتي نوره كلهم يبكو قام وليد قال لينا والله البشوفكم يقول مات ليكم زول خلاااص شهد دي رجعوها معاكم وانا بساافر بدلها الاولاااد قلبهم قاسي يااااخ 😅 وانا داخله جا حمودي جاااري مسكني قال لي ثحد ثوديني معاااك شلتو حضنتي علي شدييييد وازيد في البكا لم جا ود خالتي قلعو مني اول مره في حياااتي ابعد من اهلي دخلت صالة المغادره هديت شويه سمعت التلفون بضرب طلعتو من الشنطه لقيتو وائل قال لي متابع مع وليد وقال لي دخلتي صاله المغادره قلت ليهو اي قال لي صوتك مالو قلت ليهو مافي حاجه قالي مافي حاجه شنو وليد قال لي كملتو الدموع بطلو جرسه كلها 3 شهور وتجي راجعه قلت ليهو ان شاء الله قال لي انا ح اتابع مع استعلامات المطار هنا وبشوف الطياره بتصل متين وبنتظرك في المطار يلااا تصلي بالسلامه ورحله سعيده قلت ليهو الله يسلمك وقفلت الخط بعد شويه ندهو رقم رحلتي دخلت الطياره ولقيت رقم المقعد جنب الشباك قعدت وبعاين بالشباك وبفكر في السفره دي يا رب سفرتي دي ح تكون وش خير علي وتديني اضافه حقيقيه لحياااتي المستقبليه ♡ ولا ح تكون وااقع مرير يصحيني من الحلم الكنت عايشاهو قطعت افكاري المضيفه وهي بتقول لينا اربطو حزام الامان ...
إستكاااااانهه :
طبعا انا و وائل ما حصل اتكلمنا مع بعض صوت وصوره ما شفتو الا في الصوره وهو ما شافني الا في CD حق عرس ناس ريم و وائل ♡
#والـسناجـــل من هنا نقول ليكم مع السلامه
#يتبــــع ⏪⏪⏪⏪
