الضهر جوني صحباتي خليت شذي تدخلهم الغرفه التانيه طبعا العارفاني جيت بس ريم عندي نقاب كنت بمشي بيهو السوق ايام الحبسه مشيت لبستو وجيت سلمت عليهم بس من غير صوت سلمو علي بكل ادب واحترام قلت ليهم جزززم عاملين فيها الاحترام كاتلكم طبعا كلهم بقو عاملين كده رهام قالت ليهم ده ما صوت شهد رفعت النقاب قلت ليهم لا تومتها خليتهم كلهم يتصارخو واااي اصلو ما بصدق والبتقول اصلو ما معقول بقو يوصفو زي بيت البكا شغالين ساعه نبوس ونحضن في بعض طلعت العبايه والنقاب شيماء قالت لي وااااي يا شهد بقيتي مووووزه وديتي عمي عبدو الجواك وين اتزكرت عمي عبدو بواب العماره الفي دبي قلت ليها خليتو هناك وجيت 😅 هدي قالت لي يا شهد والله بقيت عمي عبدو انا العرس مززك وبقيتي تعرفي تتمكيجي كمان قلت ليهم من زمان بعرف بس كان مواهب مدفونه وهسه طلعتها ريم قالت لي والله ما كنت عايزه اسلم عليك بس جيت اطمن عليك انك كويسه انا مش قلت ليك انتظريني هناك ما عايزه معاك كلام خااالص باقي البنات قالو لي لا بالجد مالك جيتي قلت ليهو اشتهيت لأهلي ريم قالت لي ما عايزه معاك كلام بس وصفي لي الحنه الخطيره دي وين في دبي عشان لم اسافر امشي ليها طبعا هي مسافره بعد اسبوع قلت ليها الحنه دي في سودانا دا بقينا نضحك ونتونس ما خلو شمار ما قالو لي الا ريم كانت بالجد زعلانه مني شلت تلفون شذي رسلت ليها رساله قلت ليها ما ترجعي مع البنات بيتي معاي واضربي لناس بيتكم عايزاك ضروووري قرت الرساله وهزت لي براسه يعني طيب البنات قيلو معاي والعصر قالو ماشين طبعا نسيت اقول ليكم انو وائل جاب لي فل ميك اب ماركه قال ليك انتي وصحباتك عشان ما ترجعي ليهم يدك فاضيه واصلا البنات بحبو الحاجات دي وربي ده فااات الذوووق بهناك في ذمتكم ده راجل بطلقو بس الله غالب بعد قالو طالعين مشيت جبت ليهم الهدايا قلت ليهم دي حاجه بسيطه هدي قالت لي بسيطين نحن والله احييييي شهد شهتني العرس والله قعدو يضحكو 😅 ريم قالت ليهم انا ما ماشه معاكم برجي اهل لؤي جايين وبرجع معاهم قالو ليها خاينه تبيعينا لـ نسابتك قالت ليهم اصلا
المسا بعد خلاص جينا ننوم قلت لشذي انا وريم ح نطلع ننوم في الغرفه الفوق اصلا فيها سريرين قالت لي قولو عايزين تزحلقوني وعندكم كلام قلت ليها لا والله بس عايزين نتونس حبه وننوم قالت لينا ونسة نسوان وكده غااايتو ريم قالت ليها ان شاء الله تعرسي وتتونسي معانا فيها قالت ليها تمي دعوتك وقولي راجل زي وائل قلت ليها واحسن من وائل قالت لي لا بس زيو ااااخ يا دنيا يا مقلوبه الكبيره بايره والصغيره مخطوبه لا ما مخطوبه دي معرسه عديييل 😅 قعدنا نضحك ومشينا خليناها طلعنا فوق دخلنا الغرفه وقفلت الباب بالمفتاح ريم قالت لي شهد خوفتيني في شنو بالجد قلت ليها بس امسكي اعصابك من الـ ح تسمعي قالت لي شهد احكي ... حكيت ليها القصه من الاول للاخر طبعا في الاول كانت مصدومه وعامله كده تاني قلبتو بيت بكا قالت لي وااااي يا شهد وانتي فتره الـ 3 شهور مستحمله ده كلو قلت ليها استحملت عشان خاطر امي وابوي وكلام الناس وريم شغاله تبكي قلت ليها ما تبكي انا استحملت 3 شهور عشان ناس امي ما يعرفو بس شكلك ح تفضحيني هسه قالت لي وانا لم كلمتك بساره حامل ما حكيتي لـ وائل عشان يحمد ربو مليون مره انو اتزوجك قلت ليها طبعا لااا في النهايه ساره بنت زينا و واجب علينا نسترها كفايه العليها قالت لي و وائل كان طوالي بضرب لي عشان اقنعك تجددي الزياره وانا كنت بضرب بشاكلك ما كنت عارفه الحاصل بس والله خليني اسافر وائل ما بخليهو قلت ليها ريم انا حكيت ليك عشان محتاجه زول افضفض معاهو وعشان لقيتك زعلانه في رجعتي حبيت اوضح ليك الامور لكن والله وائل ما عندو ذنب ولا حصل بالغلط غلط في حقي كل الفتره دي كان محترمني ومحافظ علي بس انا الـ ما كنت مرتاحه لأنو موضوع ساره دايما في بالي قالت لي يا حليلك ي شهوده وهسه ح تعملي شنو قلت ليها بفكر ننفصل قالت لي شنوووووو انتي جاده قلت ليها ده اخر قرار بس منتظره يجي نلقي العزر المناسب للناس طبعا ريم اتفقعت بالبكا البشوفها يقول هي ح تطلق بقيت اسكت فيها ريم عليك الله خلاص قالت لي طيب يا شهد وائل شكلو متمسك بيك اديهو فرصه قلت ليها ما بقد والله بعد عرفت الحقيقه نمنا ونحن بندردش
اصبحنا الصباح نزلنا تحت ونحن بنشرب الشاي شذي جات شايله لي التلفون قالت لي شهد هاك راجلك قلت ليها خلي ما تفتحي الخط قالت لي بفتحو ده تلفوني كده ح يقول انا الرافضه ارد عليهو فتحت الخط بعد سلمت ادتني ليهو دخلت بالتلفون الغرفه قال لي صباح الخير قلت ليهو يسعد صباحك قال لي تصرفك ده اعتبرو هروب مني قلت ليهو كيف يعني قال لي بما انك ما رجعتي شريحتك السودانيه وامس قلت ليك اتصلي علي ما اتصلتي واكيييد ما نسيتي واكيييد ما كل مره ح اضرب ازعج شذي ولو قلتي لي تاني ما تتصل اتأكدي دي اخر مره تسمعي فيها صوتي وانا بالجد كان بالجد نفسي اقطع علاقتي بيهو بس ما قدرت قلت ليهو لا ما كده بس تلفوني امس وقع مني وشاشتو اتكسرت كضابه يا انا 😅 قال لي اهااا كان كده بعتزر وبقينا ندردش لحدي ما قال لي يلااا خلي بالك من نفسك وقفل كنت بالجد مبسوووطه من اتصالو ومن ناحيه تانيه كنت بحاول ابعد منو ناولت شذي التلفون قالت لي شهد انتي متشاكله مع وائل طبعا خلعتني قلت ما تكون سمعتنا انا وريم قلت ليها اي وكمان عايزين نتفصل قالت لي شهد بطلي هظار انا جاده معاك قلت ليها كيف يعني متشاكلين قالت لي انا عارفه شايفاك بتتهربي منو في التلفون قلت ليها عايزاهو يشتاق لي بس وطلعت منها ...
اصبحنا اليوم التاني المسا جرس الباب دق جات شذي قالت لي وليد واقف ليك برا وقال مستعجل قلت ليها بخلعه وليد قالت لي اي قلت عايز شنو يا ربي !!! طلعت سلمت عليهو قال لي عملت ليك وجع وش قلت ليهو لاقياك وين انا ياااخ ❥ قال لي بس السبب وائل اتصل علي امس وقال الأ اوصل ليك التلفون ده بقلبي قلت بالسرعه دي مد لي الكرتونه لقيتو ايفون وناولني ظرف قلت ليهو ده شنو كمان قال لي دي مصاريفك حولها امس قلت ليهو تعبناك معانا قال لي ولا يهمك ده الواجب ودعني ومشي دخلت البيت شذي قالت لي الأ تديني التلفون القديم قلت ليها والله ده ما عايزه افتحو اخدت ليها زعله بعد ده ما عندي عزر غير اشغل تلفوني دخلت شريحتي بعد ساعه اتصل علي قال لي الامانه وصلتك قلت ليهو تسلم ما قصرته بس المصاريف دي ما في داعي ليها ما محتاجه ليها قاعده مع ابوي ما محتاجه قال لي ما قصة حوجه بس ده واجبي وغير الموضوع قال لي بالمناسبه قدمت للاجازه وح اجي بعد شهر ما عارفه افرح عشان ح اشوفو تاني ولأ احزن عشان ح نطلق بعد شهر
قلت ليهو تصل بالسلامه قال لي الله يسلمك دردشنا مع بعض مساااافه وقفل الخط ومن يوم قال لي جايي بقيت اخر نضافه واهتمام في جسمي وعدت الايام وفضل يومين والشهـر ينتهي والقمر يصل ....
#يتبــــع ⏪⏪⏪⏪
