وهو داخل غرفتو اتلفت قال لي بالمناسبه ريحه البيت تجنن وابتسم ودخل غرفتو وااااي يا شهد هببتي شنو في داعي هسي تستاهلي بتكلم كده دخلت غرفتي فتحت الدولاب طلعت فستان كحلي ومعاهو هاف جكت حلاوي طقمت معاهم الشنطه والشبط المسا ظبطت نفسي دخلت في القشره وسرحت شعري وقبلت علي الوش عملت مكياج خفيف كحل ع ماسكرا ع ايلاينر ولبشاين خفيف طلعت تحفه بعد شويه وائل دق لي الباب قال لي شهد منتظرك طلعت وشوفتو وكـ العاده ما شاء الله لابس بنطلون جنز وقميص رمادي مكفكف اكمام اليد لحدي النص هو زاتو قعد يعاين لي التقول اول مره يشوفني مشيت قدامو عشان يحس ويكسر عينو وصلنا العربيه فتح لي الباب الود ده وجاهه وذوووق ياااخ 😅 جا ركب العربيه عاين لي قال لي ممكن اطلب منك طلب قلت ليهو اتفضل قال لي تلفوني فاضي من الصور بس ممكن تاخدي معاااي سيلفي للذكري ابتسمت وهزيت ليهو راسي نظام موافقه بقلبي قلت ليهو بتطفيني انت لكن بحلاااتك دي 😍 طلع تلفونو وقرب مني لم اختلطت ريحت عطرو بانفاسي ريحتو براها حكااايه اخد كم صوره وقال لي مشكوره تسلمي ودور العربيه مشينا ...
و قف جنب مطعم فخم قال لي وصلنا انزلي بقلبي قلت يعني صاحبو عازمنا في مطعم وانا كنت قايلاهو في بيتو يلااا ما علينا كلها اسمها في الاخر عزومه دخلنا المطعم جر لي كرسي في تربيزه فاضيه قال لي اتفضلي قعدته عدل الكرسي وجا قعد قلت ليهو جينا بدري قبل ما صاحبك يجي قال لي شكلو كده وقعد يتبسم قال لي والله في الحقيقه ما في زول عازمنا انا العازمك بس لو قلت ليك كده من الاول كان ح ترفضي وتزوغي من العزومه باي حجه زي امس صاااح قلت ليهو يعني كضبت علي قال لي ممكن تقول عليها كضبه بيضا طبعا عملت روحي زعلانه وانا بجوه اخر انبسااااط قلت ليهو زي القعده دي ممكن نقعده في البيت مافي شي جديد قال لي مالو نغير جو قال لي بالمناسبه امس ولاء اتصلت علي وقالت كان بتتكلم معاك وكانت في حاجه مزعلانه بس ما عرفتها شنو ما حكت ليك عنها .. الحيوان عايز يوقعي بالكلام وهو عارف انها زعلانه بسبب طلاقنا عايزني اقول ليهو كده عشان يفتح معاي الموضوع قلت ليهو لا ما عارفاها 😊 قال لي تمااام طبعا الجرسون نزل كل ما لذ وطاب من الاصناف اتعشينا ونزلتو التحليه وبقينا قاعدين ندردش وانا كنت حاسه انو في حاجه عايز يقولها لي لكن متردد بس في الاخر قال لي شهد قلت ليهو نعم قال لي والله ما حابي افتح معاك موضوع عرسنا لانو اتناقشنا فيهو واتقفل بس في حاجه عايز اوضحها ليك انتي في النقاش كان قلتي لي انك احتليتي مكان ما حقك صاح قلت ليهو صاح قال لي بسسس دي النقطه العايز اوضحها ليك انو ما كنت خاتي فيهو زول قبلك يعني انتي جيتي لقيتيهو فاضي وقعدتي فيهو طبعا انا ساكته ومدنقره راسي الكلام ده وقتو هسه قال لي وبعدين البسمعنا بنقول احتليتي وما احتليتي ومكان يقول بنتكلم عن قطعة ارض ولا بيت ما بقول بنتكلم عن قلبي قعد يضحك من ناحيتي شاركتو بابتسامه قلت ليهو ممكن نأجل الكلام ده لم نرجع السودان 😊 قال لي شكلك ماخده قرارك قلت ليهو شبهه كده 😊 بعد كلامي ده لقيت ملامح وشو اتغيرت وبقي شبه زعلااان اجييي ده مالو كمان سكت حبه وبعدها قال لي نمشي بعد ده قلت ليهو اوك بس اتاكدته عندو انفصام في الشخصيه فجأه من مبسوط لزعلان غايتو 😏 طلعنا لفينا بالعربيه حبه مشينا الكورنيش وبعديها رجعنا البيت بس بالجد كان تغيير 😍 بس اخينا ده الغيرو شنو ما عارفه 😒
واصبحنا الصباح ونفس الروتين لحدي ما مشي الشغل وجا راجع سلم علي وناولني الجلبابات جابهم معاهو من المغسله اخيرا حبيباتي وصلوني ارتاح من التوب يااااخ بعد المغرب قال لي وقت مافي موضوع تعالي نتصل نتونس مع ناس السودان قلت ليهو احلي شي بقلبي قلت خلاص ح يضرب لناس بيتهم .. شويه كده واسمعو يقول الو شذويه اخبارك يعني الواحد لو ما سأل منكم ما بتضربو تسالو قلت اجييييي شذويه دي منو كمان الظهرت دي 😳 قال ليها شهد تمام التمام قاعده جنبي دقيقه دقيقه دي طلعت شذي اختي 😱 الولد ده طلع عندو حول في المشاعر انا شهد من غير دلع وهي شذويه 😒 اتونس
معاها وناولني التلفون المره دي الغربيه اتونست معاهم من غير ما ابكي احتمال عشان حسيت بالامان والاستقرار واتونست مع امي مسافه قلت ليها اديني حمودي قالت لي رافض يمسك التلفون قال زعلان منك قلت ليها افتحي الاسبيكر قلت ليهو حمودي حبيبي انا شهد نسيتني ولا فتح خشمو امي قالت لي قاعد يعاين للتلفون وساااكت قلت ليهو حبيب اختو انت زعلان مني وانا شغاله اقول ليهو حبيبي واشيل واكرر فيها ونسيت وائل خااالص انو قاعد 😅 قلت ليهو حمودي حبيبي بس سمعني صوتك وكان نفسي اقول ليهم افتحو الكاميرا اشوفكم بس كنت خايفه يشوفوني وانا لابسه التوب امي كانت ح تسألني ليه قاعده بالتوب وانتي مع راجلك لم حمودي رفض يتكلم معاي دموعي رقرقت وائل شال مني التلفون قال ليها شذي بعد تقفلي مننا اتكلمي مع حمودي وخلي التسجيل فاتح ورسليهو كده شهد بتسمع صوتو قالت لينا تمام وقفلنا منهم علي كده بعد شويه جا شايل لي التلفون قال لي شذي رسلت المقطع الصوتي الهبله بدل ترسلو في تلفوني رسلتو في تلفون وائل المهم فتحت التسجيل وبقيت اسمع فيه شذي قالت ليهو حمودي نمشي ناكل اسكريم قال ليها اااي ياااح ألح قالت ليهو طيب نسوق معانا منو قال ليها ماما وبابا قالت ليهو وشهد نسيتها قال ليها لع ثحد ما ندوقها مث هي ابت تدوقني معاها طبعا في اللحظه دي دموعي نزلت وانا من النوع الما بقدر احبسها وائل جا قفل التسجيل وناولني من التربيزه منديل قال لي انتي عويره تبكي في كلام شافع قال كده عشان زعلان بس بعد ترجعي اكيييد ح ينسي جاب لي كبايه مويه شربتها قال لي بس شكلو ظريف يوم الخطوبه اتونست معاهو صوت وصوره كان واقف جنب ابوك طبعا قلبنا القعده ونسه وبقينا نحكي في المواقف المضحكه المرت بينا وبعديها اي واحد دخل غرفتو ....
#يتبــــع ⏪⏪⏪⏪
