يوم المسا بنتفرج في التلفزيون قال لي شهد مدام مافي موضوع واصلا بنتفرج في التلفزيون رايك شنو نفتح الـ CD قبل ما يتم كلامو وبدون ما افكر قلت ليهو عايز تشوف منو العرسان لؤي وريم ولأ ساره 😊 طبعا ضرب التربيزه وقال لي بصوت حاااد شهد لم نطيت من الخلعه دخل غرفتو وجا شايل الـ CD قال لي بزعل مٌش قصدك عرس لؤي هندا كسر الـ CD بيدو ع 4 اجزاء قال لي انا كنت بتكلم عن CD زواجنا ولو ظاهره فيهو برضو ح اكسرو طبعا كان بتكلم معاي بحده وانا استجمعت شجاعتي وبقيت اتكلم معاهو ببرود قلت ليهو اصلا في زواجنا ما جات عشان تظهر ويعني شنو كسرت الـ سي دي ممكن عادي تكون ناسخو في الجهاز 😊 قال شهههد اوزني كلامك يااااخ لم قال لي من قوه صوتو قربت اعملها تحتي وانا احسن يكفتوني ولا ينهروني واصل كلامو انا اصلا ما قاعد احضرو لم اجي انسخو في الجهاز ولو ما مصدقه بجيب اللاب توب الحقو الـ سي دي قدامك عشان ترتاحي بعد اتأكدته انو ما عندو نسخه تانيه واتخلص من الاصل قلت ليهو علي العموم انا زاتو ما بهمني بحاجه ودي حاجه ما بتخصني كضاااابه يا انا 😅 جدع الـ سي دي المكسر في التربيزه وشال مفتاح العربيه بزعل وطلع قفل الباب بقوه قرب يشيلو في يدو قمت لقطت الـ سي دي المكسر رميتو في سلة الوسخ وداعا ساره وانا مبسووووطه انو تاني مافي حاجه بتخصها عند وائل بس من ناحيه تانيه كنت زعلانه عشان زعلته وائل مني قعدته في الصاله قلت انتظرو يرجع واعتزر ليهو بقيت بتفرج في التلفزيون بس ما عارفه البرنامج الشغال شنو لانو عقلي وقلبي كان مع وائل منتظره لحدي الساعه 11 وحضرة سيادتو ما شرف وتاني عاينه للساعه لقيتها 12 وبعديها نمت من غير ما اشعر ما صحيت الا لم حسيت بزول شالني من الكرسي فتحت عيوني عايزه اصرخ لقيتو دا وائل قلت ليهو ده شنو نزلني سريع مشي خطوتين ضربتو قلت ليهو ما بتسمع نزلني قلت ليك نزلني قال لي وقت عايزه تنومي في حاجه اسمها غرفه وسرير تقريبا 😊
قلت ليهو امممم ظريف وائل انت بتسجر طبعا لم شايلني ولم اتكلم شميت ريحة سجاير مخلوطه بريحة عطرو ريحه كده غايتو ما قادره اوصفها غير اقول ليكم تشهيكم شراب السجاير هوووي بهظر ما تمشو تجربوها 😅 سكت مسااافه دنقر راسو ودخل يدينو في جيبو قلت ليهو وائل بتكلم معاك قال لي شهد تصبحي علي خير واتلفت عايز يمشي مسكتو من معصم يدو قلت ليهو لو ما رديت علي ما بتمشي اتلفت علي قال لي لااا بعد ده ممكن امشي قلت ليهو كيف لا يعني اكضب حاسه الشم العندي واصدقك قال لي طيب وقت شميتيها بتسأليني ليي قلت ليهو عشان عايزه اسمع الرد منك قال لي طيب ناااادر والله ما بسجر الا اكون متضايق شديييد اها تاني عندك سؤال ولأ امشي قلت ليهو تعال هنا ماشي وين تعال اعمل لي كبايه جبنه تنفعك بعد كان زعلان قعد يضحك وياحلااات الضحكه في وشيهو قال لي ي بت دي سجاره عاديه ما خضرا يعني عقلي في حتتو 😅 بس شكلو كده بعمايلك دي ح تخليني اشربها بجميع الالوان قلت ليهو ههههه بطل ظرااافه طيب وقت القهوه ما بتعمل ليك حاجه في شنو غيرها حسب خبرتك قال لي لو عندك لبانه بتنفع بتشيل الريحه مشيت غرفتي جبتها ناولتها ليهو وبعدين تقريبا انت ما صغير يعني عارف السجاره ضاره بالصحه واسمها الموت البطي صاح قال لي صاح قلت ليهو طيب بتشربها لي وقت عارف قال لي ممكن اعتبر سؤالك ده خايفه علي قلت ليهو مش قلت ليك بطل ظرااافه وبعدين القال لي منو خايفه عليك انا خايفه علي خالتو نوره القلبها مقطوع عشان غربتك وانا بهنا معديها سجاره ورا سجاره قال لي موضوع السجاره دي خلاااص ممكن نقفلو بس ما وريتيني مساهره لحدي هسه مالك ولأ تكوني منتظراني لم اجي قلت ليهو طبعا لااا ولا تفكر اني في يوم انتظرك بس كنت متابعه لي فلم لحدي ما نمت قعد يضحك باعلي صوتو قال لي يا شيخهه من متين قناة الجزيره الاخباريه بتجيب افلام عاينت للتلفزيون لقيت فعلا شغاله قناة الجزيره واي لااا 🙈 ابيت اتنازل قلت ليهو اي صاح غيرتها بعد الفلم انتهي قال لي اهاااا واداني معاها ابتسامه شكلو ما صدقني 😅 قال بالمناسبه موضوع قبيل حق الـ سي دي وتحقيقك معاي ممكن اعتبرو من باب الغيره طبعا خلعني بكلامو ده سكته مسااافه قلت ليهو لا شكلو السجاره دي بالجد بدت تأثر علي عقلك ولحست مخك امشي نوم احسن قال لي علي الاقل ردي علي سؤالي قلت ليهو تصبح علي خير وجريت دخلت غرفتي
اصبحنا الصباح وحصل الروتين المعتاد طبعا عااادي بنتشاكل ونتناقش ونصبح الصباح زي الما حصل حاجه يعني زي السكرانين كلام الليل يمحي النهار وائل جا راجع من الشغل ناولني كيس قال لي ده حقك قلت ليهو فيهو شنو قال لي هندا في يدك افتحيهو وانتي تعرفي فتحتو لقيت فيهو جلبابات قال لي شايف التياب معزباك عشان كده جبت ليك ديل اضافه للعندك خجلني الحيواان 🙈 كان نفسي اقول ليهو والله صحباتي هم السبب جابو لي الهدوم المشخلعه دي 👗 😅
#يتبــــع ⏪⏪⏪⏪
#أنت_قـدري24 :
By : Ashgan ALjaaly ~
